Read Navajo HOSEA 4 Bible Online

HOSEA 4 - Navajo bible

HOSEA 4

¹Ízrel dine'é danohłíinii, Bóhólníihii áníinii deínółts'ą́ą́', háálá t'áá aaníinii áádóó ajooba'ii índa Diyin God yééhósinii ádinígíí biniinaa díí kéyahgi kéédahat'íinii Diyin God bik'éhá'ááh.

²T'óó da'ahódziih, dabiyooch'ííd, t'óó nida'ałtseed, da'ni'įįh áádóó ahaa da'dilyéego t'óó tsé'édin áhooniił; t'áá ałkéé' nida'ahiltseedgo bidił bits'ádaazlį́įgo ádaalne'.

³Éí bąą kéyah chaał nidi'ni' áádóó yii' kéédahat'íinii t'áá ałtso naaldlooshii índa tsídii bida'niiná; t'áá aaníí łóó' ałdó' daniné.

⁴Ákondi diné náánáła' t'áadoo yináádiiltłi'í índa t'áadoo ła' yiditehí, háálá nihidine'é náá'iiłniihii yich'į' saad dahółónígi ádaat'é.

⁵Jį́įgo áádóó tł'ée'go nihí áádóó áhodooníiłii yaa halne'ii ałdó' bił dadidohgoh áádóó nihimá ádeeshdįįł.

⁶Shidine'é doo shéédahojísinígíí bąą ádzísdįįd; doo t'áá k'ad shéédahoosįįdígíí biniinaa shí ałdó' shináá'iiłniihii danohłíinii doo nihidínéesįįł da áádóó łah Diyin God bibee haz'áanii baa deisoonahgo biniinaa shí ałdó' niha'áłchíní t'óó beidiyeeshnah.

⁷Wózhǫ́ k'ee'ąą dínéest'ą́ągo t'ah biláhígo shich'į' ádił ninááda'iisíí'. Éí bąą bee baa daha'niihii t'óó baa yádahasingo ádeeshłííł.

⁸Shidine'é ádił nida'iilzíhígíí yee hwiih danilį́ áádóó yee ádił nida'iilzíhígíí k'ad yidáahjį' bi'niiná.

⁹Diné ádaat'éhígi át'éego náá'iiłniihii ákódajít'é. Áko ádajít'éii bąą atíhodeeshłííł áádóó baa nidajikaígíí biniinaa k'ééhodideeshdlííł.

¹⁰Da'ayą́ą doo nidi, doo hwiih dadooleeł da. Adilyé yaa naakai doo nidi, ba'áłchíní ádaadin doo, háálá Diyin God dadzółts'ą́ą́' yę́ę doo dazniizį́į' da.

¹¹Ałjiłnii áádóó wáin índa wáin ániidíii biniinaa doo ak'idazhdootą́ą́' át'ée da.

¹²Shidine'é bitsin dayókeed áádóó bigish éí t'áá aaníí át'éii nihaa deididoo'ááł danízin, háálá ałjiłniigi át'éego nitsídaakeesgo biniinaa biDiyin God yits'ą́ą́' yóó'adahaaskaigo ajił t'éí bił nidahodíłchiid.

¹³Dziłghą́ą'di nááda'iiłniihgo dawók'ą́ą́góó chéch'il biyaagi, t'iists'óóz biyaagi índa t'iis biyaagi tsin bijeeh dilidgo łikání halchinii náádayiiłniih, háálá bichaha'ohgóó t'óó dahózhóní yee'. Éí bąągo danihich'é'éké ajił bił nidahodíłchiid áádóó danihizháá'áád t'óó da'dilé.

¹⁴Danihich'é'éké ajił t'óó bił nidahodíłchiidgo áádóó danihizháá'áád da'diléego éí doo atídeeshłíił da, háálá diné danilínígíí t'áá bí ałjiłnii yich'į' ch'í'ídiyoo'nił áádóó ałjiłnii yił nidahałáago náá'iiniih yaa naakai; éí bąą diné ts'ídá doo ak'ida'dootą́ą́' át'éégóó t'óó nida'ádiilchǫǫh.

¹⁵Ízrel dine'é nohłíinii, azhą́ da'ołjił nidi, Júdah dine'é ádił da'oolziih lágo. Kin shijaa' Gílgal góyaa doo doohkah da índa Beth-éíven góde ałdó' dooda. Ts'ídá t'áá aaníí Bóhólníihii hiná; doo t'áá ádzaagóó ádee hadidoohdzih da.

¹⁶Háálá béégashiitsa'ii t'ą́ą́' sitínígi át'éego Ízrel dine'é daastee'. Ákoósh hootsogi dibé yázhí ałchozhígi át'éego Bóhólníihii bi'iisą́ą doo?

¹⁷Íífreiyim éí e'elyaii bich'į' nahadlá bił ayóó áhoot'é; t'áadoo baa nánít'íní.

¹⁸Tó tsi'na'iiłáii ałtso dayoodlą́ą'go t'áá áłahjį' bida'ajił yaa deíkááh; binanit'a'í danilíinii baa yáhásinii t'éí bił ayóó ádahoot'é.

¹⁹Bił yóó'ííyolii daazlį́į́', áko nááda'jiiłniihgo biniinaa t'óó ádaa yá dazdínóodzįįł.