Read Navajo HOSEA 5 Bible Online

HOSEA 5 - Navajo bible

HOSEA 5

¹Nááda'iiłniihii danohłíinii, da'íísínółts'ą́ą́'; Ízrel dine'é danohłíinii, da'doohts'į́į́h; aláahgo naat'áanii ba'áłchíní danohłíinii, da'íísínółts'ą́ą́': jó, nihá nihoot'aah, háálá Mízpah kin haal'áagi łohígi ádanoht'éé nít'éé' áádóó Dził Téíborgi tł'óół yistł'ónígi ádanoht'éé nít'éé'.

²Nidaalteehii t'áá íiyisí doo yá'áshóonii yiih níídee', áko t'áá ádzíłtso t'áá shí dadideeshteh.

³Íífreiyim dine'é bééhasin índa Ízrel dine'é ts'ídá doo shits'ąą nízhdót'į́į́ł át'ée da. Íífreiyim nílíinii, k'ad ayóogo íłjił. Ízrel éí ádoolchxǫ'.

⁴Ádaaníłígíí bąą doo biDiyin God yich'į' ninádahókááh át'ée da, háálá ajił t'éí bíni' dadineesdlį́į'go Bóhólníihii doo yéédahósin da.

⁵Áádóó Ízrel bibee ádaa hodzódli' bidáahgi hólǫ́ǫgo baa halne'. Éí bąągo Ízrel áádóó Íífreiyim ba'át'e' yii' didoogoh, áádóó Júdah dine'é ałdó' ákódoonííł.

⁶Bidibé áádóó bibéégashii nideiniłkaadgo Bóhólníihii hádaat'į́į doo biniyé dah didookah, nidi t'áadoo bik'ídazhdookah da; jó, Bóhólníihii hats'áhoníle'.

⁷Áko Bóhólníihii na'adlo' yindayiiłdeełgo dahináá nít'éé'; jó, wótashki' nidajiishchį́. Índa lą́ą dah néitį́įhgo dá'ák'ehgóó nidazhniłt'ą'ii t'áá bił hó ałdó' haa nahodidoodaał.

⁸Gíbiyah kin haal'áagi deenásts'aa' bidee' bee í'dílzoołí bee ádadohniih áádóó Réímah kin haal'áagi béésh dilní bee í'dílzoołí bee ádadohní. Beth-éíven kin shijaa'gi hadadołgháásh, Bénjamin nílíinii, t'ą́ą́' nídínít'į́į́'.

⁹Íífreiyim dine'é bi'deesteh bijį́įdi t'áadoo nídoodleełí da. T'áádóo nídí ádooníłígíí Ízrel dine'é danilíinii bitahgóó baa hashne'.

¹⁰Júdah binanit'a'í danilíinii éí bee dahoodzoii nahjį' kódeile'ii nidahalin; éí bąągo bee hashké nísdzinii tó adáálį́ nahalingo hak'i yeideeshkááł.

¹¹Íífreiyim bide áhólzin áádóó ánihwiit'aah bá ninázhnítłizh, háálá t'áádóo nídí diné bibee haz'áanii bee akéé' nizhníyá.

¹²Éí bąągo Íífreiyim bich'į'go ch'osh ałchozhiigi ánísht'é áádóó Júdah dine'é, Éí dííłdzidii, dashó'ní.

¹³Íífreiyim daatsaahgo ádaa ákoniidzį́į'go áádóó Júdah éí hadadeeznihgo ádaa ákoniidzį́į'go Íífreiyim éí Asíriya kéyahgóó ííyá; aláahgo naat'áanii ayóó át'éii yich'į' i'ííł'a'; ákondi nándidoołáłígíí doo yíneel'ą́ą da, áádóó hadadínínihę́ęgi doo náyółdziih át'ée da.

¹⁴Jó, Íífreiyim dine'é bich'į' náshdóítsoh bitsiijį' ditł'ooígíigi ánísht'ée doo áádóó Júdah dine'é bich'į' náshdóítsoh bitsiijį' ditł'ooígíí biyázhígi ánísht'ée doo. T'áá shí nihodiyeeshnishgo índa yisháał doo; dahodideeshhéełgo doo ła' yisdáhodoołtéeł da.

¹⁵Bee ádił nida'dziisíi'ii baa ákódazniizį́į'jį' áádóó shíká dazdéez'į́į́' dadzizlį́į'jį' hats'ą́ą́' dah dideesháałgo t'óó shighangóó nídeeshdááł. Hach'į' hodiiznáa'go haleebee shíká dazdéez'į́į' dooleeł.