Read Navajo HOSEA 6 Bible Online

HOSEA 6 - Navajo bible

HOSEA 6

¹Tį', Bóhólníihii bich'į' t'ą́ą́' nídiikah, háálá bí ninihiizhnizh, áko bí nánihidoołdzih; adanihideesnih nidi, hasht'éénihidoodlííł.

²Naaki yiską́ą́dóó bik'ijį' hinááh ánánihidoodlííł; táá' yiską́ągo náánihididoołjahgo binááł dahinii'náa dooleeł.

³Haa'íshą' Bóhólníihii béédahoniilzin dooleełgo yéego hádeiit'į́į doo. T'áá abíní ná'oodleełígi át'éego ch'íhodoołeeł; átsé hodiłtį́hígíí índa akée'di nahałtį́hígíí bee nínáháltłohígi át'éego nihaa hodooleeł.

⁴Íífreiyim nílíinii, haash nideeshłííł? Júdah nílíinii, haash nideeshłííł? Bee yá'ánóht'éhígíí éí abínígo áhí dah shoogishígíí nahalin; abínígo dahtoo' t'áá áko ádįįhígíí nahalin.

⁵Éí bąągo shá dahalne'ii danilíinii bee nahoyéłne'; shizaad bee ádahoséłdįįd áádóó jishgishígíí nahalingo há nihodeesh'ááł.

⁶Háálá aa a'ááh hasin éí nisin, nááhániihii éí dooda, áádóó didlidgo nááhániihii biláahgo Diyin God yéédahósinígíí nisin.

⁷Nidi átsé hastiin ádzaaígi át'éego shibee aha'deet'áanii k'ídeizti'go na'adlo' shindayiisdéél.

⁸Gíliyad kin haal'áádóóígíí ádił nida'iilzííh áádóó nida'ałtseedgo dił nidaashchii'go ádahale'.

⁹Da'ni'įįhii éí diné yaa niheekaígi át'éego Shííkem kin haal'áágóó atiin bąąhgóó nááda'iiłniihii áłah nádleehgo nida'ałtseed; doo ákǫ́ǫ́ áhát'íinii yaa naakai.

¹⁰Dine'é Ízrel bee wójíhígíí bitahgi ts'ídá doodahígi ádaat'į́įgo yiiłtsą́. Ákwii Íífreiyim be'ajił hólǫ́; Ízrel ádoolchxǫ'.

¹¹Shidine'é éí yá'ádaat'éehii bíí' danilíinii baa nídiní'ą́ągo, Júdah nílíinii, ni ałdó' niba' aneest'ą́ągo ná haz'ą́ą doo.