Read Navajo HOSEA 8 Bible Online

HOSEA 8 - Navajo bible

HOSEA 8

¹Deenásts'aa' bidee' bee í'dílzoołí ázanitsééh. Atsági át'éego ana'í éí Diyin God bikin bii' sohodizin yik'i hwiidooleeł, háálá shibee aha'deet'áanii k'ídeizti' áádóó shibee haz'áanii doo ákǫ́ǫ́ ádayííł'įįd da.

²K'ad nídashookąąhgo ádashiłní, ShiDiyin God, Ízrel dine'é niidlíinii néédahoniilzin.

³Ízrel dine'é éí yá'ádaat'éehii t'óó yóó'adayiiłkaad, áko ana'í nilíinii baatįįh doonééł.

⁴Aláahgo naat'áanii ła' nideiznil, nidi éí doo shí shik'ehgo da; naat'áanii nideiznil lá, nidi éí doo bee lą́ aséłį́į' da. Eda'alyaii béésh łigaii índa óola yee ádá ádayiilaa, áko t'áá éí biniinaa ádabidi'dooldįįł.

⁵Samériya dine'é nohłíinii, béégashii yáázh be'elyaii ádaahłaaígíí doo nihá nisxin da; t'áá íiyisí bik'ee sháháchį'; haa nízáadishą' índa hasht'e'ninádoohkah?

⁶Ízrel dine'é yinaashnishgo áyiilaii éí doo Diyin God át'ée da; Samériyagi béégashii yáázh be'elyaii éí kóníshéhígo didoolzéí.

⁷Níyol k'edazdeezláago nááts'ó'oołdísii áłah áńdazhdoodlííł; akaz t'áadoo bineest'ą' dahazlį́į'ii tł'oh naadą́ą́' bąąh ádin doo áádóó azhą́ tł'oh naadą́ą́' áłch'į́į́dí nidi, dé'éyóní éí yaa nahodikai doo.

⁸Ízrel dine'é baa nahodeesdee'; ał'ąą dine'é bitahgóó doo chonídaot'į́į́ át'éii daazlį́į́'.

⁹Télii ałchinii t'áá sáhí yóó'eelwod nahalingo Asíriyagóó yóó'aheeskai. Íífreiyim éí adeenáago yił a łch'į' dah daalwo' dooleełii yooskan.

¹⁰Azhą́ ał'ąą dine'é bitahdóó bíká adoojahii dayoozkan nidi, k'ad áłah áhodeeshłííł áádóó bídahólníihii binanit'a'í nilíinii hade ádahósingo biniinaa ájíłch'į́į́dí jooleeł.

¹¹Íífreiyim éí ádił ni'iilzííh biniyé bikáá' náá'iiniihí t'óó ahayóí áyiilaago éí bikáá' náá'iiniihí bee ádił ni'iilzíihii daazlį́į́'.

¹²Shibee haz'áanii lą'í há bee ak'eshíłchį́į nidi, doo bééhózinii át'éego yaa nitsíkees.

¹³Atsį' nááhániihii shich'į' náádayiiłniih yę́ę deiyą́; nidi Bóhólníihii doo yaa bił hózhǫ́ǫ da; k'ad lą́ą doo ákwii ádajíít'įįdii yénálnii'go ádił nida'iisí'ígíí biniinaa atíhodi'doolníiłgo Ííjip kéyahgóó nihéézhdookah.

¹⁴Háálá Ízrel Ábiilaii yaa yooznahgo kin ayóó át'éii ádayiilaa; Júdah éí t'óó ahayóí kin hadaas'á binída'astł'ingo ádayiilaa. Nidi hakin hadaas'áii bik'ijį' kǫ' bidadideeshnoł, índa hakin ayóó ádaat'éii ałtso adahididook'ą́ą́ł.