Read Navajo HOSEA 9 Bible Online

HOSEA 9 - Navajo bible

HOSEA 9

¹Ízrel nílíinii, ał'ąą dine'é bił nidahoozhǫǫhígi át'éego t'áadoo nił nihoozhǫǫhí, háálá niDiyin God bits'éíníyáago íłjił nít'éé'; da'oolch'ííhgóó t'áá át'é ałjiłnii nááyííłbįįhii nił ayóó áhoot'éé nít'éé'.

²Oolch'íihgi índa wáin bąąh haha'níihgi t'áá bíni'ídi doo ha'doołtsoł da; wáin ániidíii ałdó' bá ádin doo.

³Díí Bóhólníihii bikéyahgi doo náádahojídlǫ́ǫ da dooleeł, nidi Íífreiyim dine'é éí Ííjip kéyahgóó nihéédookah índa Asíriya kéyahgi ch'iyáán dááchǫ'ii deiyą́ą doo.

⁴Wáin éí Bóhólníihii bich'į' nááhániihígíí doo yadeidooził da índa náádayiiłniihígíí doo yaa bił hózhǫ́ǫ da doo. Náádayiiłniihígíí éí yínííł nidaakaii dabibááh nidahalin; éí dayííyą́'ígíí t'áá ałtso nidabiiłchxǫǫh doo; bááh náádeidiyoołnihii t'áá bí t'éí dabibááh át'ée doo, áko Bóhólníihii bikin góne' doo yah adookáał da.

⁵Hodílzingo áłah ná'ádleeh néit'aah góne' haa daoht'į́į doo? Bóhólníihii bá hodílzingo áłah ná'ádleeh bijį́į́ góne' haa daoht'į́į doo?

⁶Háálá ó'oodįįłii yik'ee aheeskaigo Ííjip dine'é éí áłah áhodoolííł áádóó Mémfis kin haal'áádóó dine'é yóó'ádahodoolííł, jó'akon; béésh łigaii bá haz'ánígi ch'il ahoshí hadínóot'į́į́ł; dabiníbaal góne' ch'il deeníní hadínóot'į́į́ł.

⁷Atíbidi'doolníłígíí baa hoolzhiizh índa k'éébidi'doolnííł beiníłką́. Ízrel dine'é bił bééhodoozįįł; áhodooníiłii yaa halne'ii doo áhályą́ą da; níłch'i k'ehgo diné yáłti'ii diigis silį́į́', háálá t'óó ahayóígóó ádił nida'iyoołzíí' áádóó ayóó át'éego bik'ee dadinohniih.

⁸Halne'ii éí shiDiyin God yił Íífreiyim yik'i ha'ídées'į́į́' nít'éé', nidi t'áá hidighááhgóó tsídii bee wódleehí bá naaznil áádóó biDiyin God bikin bii' góne' bik'e' diniih hólǫ́.

⁹Ts'ídá t'áá Gíbiyah kin haal'áadi bídayééłkaah yę́ędą́ą́' át'éhígi át'éego díí diné ałdó' t'áá bí ádadoolchxǫ'; Bóhólníihii éí doo ákwii ádáát'įįdii yénálniih doo; ádi ł nida'dziiszíi'ii biniinaa atíhodoolííł.

¹⁰Ízrel éí honoojíigi ch'il na'atł'o'ii bik'ízhníyáhígíí nahalingo bik'íníyá. Ts'ídá átséedi tsin fig bineest'ą' neest'ánígíí nidahojílingo dahazhé'é yę́ę daash'į́į́ nít'éé', nidi Béíyal-píyor yaa haaskaigo baa yáhásinii yá ats'á'ádadeest'ą́ áádóó ayóó'ádayó'nínígíí yił ahidaałt'éego doo daaldinii daazlį́į́'.

¹¹Íífreiyim dine'é yee ayóó át'éii tsídii yóó'eet'a' nahalingo bił yóó'ahodoogááł, áko doo bá ni'iichíih da doo áádóó doo bá ootsą́ą da doo índa ts'ídá doo bá í'dí'nóotsąął da.

¹²Azhą́ áłchíní bee hazlį́į' nidi, doo dahinaahgóó yąąh dabíni'go ádeeshłííł, áko diné doo ła' yidziih da doo. T'áá aaníí, bits'ą́ą́' dah diiyáago doo hojooba' ájíníi da.

¹³Íífreiyim éí Táir ayóó áhonóolningi bił haz'ánígi át'éego yiiłtsą́. Íífreiyim ba'áłchíní nidadootsiłjį' ayíí'eezh.

¹⁴Bóhólníihii nílíinii, ha'át'íishą' baa didíí'ááł? Bits'ą́ą́' atsą́ ha'ii'eełgo índa abe' atse' bii' abe' ádingo ádíílííł.

¹⁵Doo yee yá'ádaashóonii t'áá ałtso Gílgal kin shijaa'gi hólǫ́; ákwii dahojooshłxáá nít'éé'. Doo yá'ádaashónígi ádaat'ínígíí biniinaa shighandóó ch'íhodínéeshkał, áko doo ayóó'ánááhwíínísh'níi da dooleeł; binanit'a'í danilíinii t'áá ałtso shik'ijį' danilį́.

¹⁶Íífreiyim atíbi'diilyaa, behétł'óól danilíinii ałtso bił nídahooltsei. Bineest'ą' doo bąąh náhódle' át'ée da. Azhą́ ninááda'iiłchíih nidi, bada'áłchíní ayóó'ádayó'níinii t'óó naastseed dooleeł.

¹⁷ShiDiyin God éí nahjį' kóhodoolííł, háálá doo dadzółts'ą́ą' da nít'éé'. Áko ał'ąą dine'é bitahgóó ałtso taizhdookah.