Read Navajo AMOS 2 Bible Online

AMOS 2 - Navajo bible

AMOS 2

¹Bóhólníihii kóní, Mó'ab kéyahdóó dajílíinii táadi, doodaii' dį́įdi bee haz'áanii k'ídajizti'go biniinaa dooshą' léi' t'áadoo atíháshłééh lá, háálá Íídam dine'é aláahgo binanit'a'í yę́ę bits'in azhdííłk'ą́ą'go łeeshch'iih t'éí násdlį́į́'.

²Áko Mó'ab bik'ijį' kǫ' ádeeshłíiłgo Kíriyathgi bidziilgo bił nahaz'áanii ałtso adidook'ą́ą́ł áádóó hahóó'áago áádóó hahodidoodlałgo índa deenásts'aa' bidee' bee í'dílzoołí ayóó íits'a'go áníigo Mó'ab dine'é nabízdįįd doo.

³Áko biníí'dóó ándahodiyii'aahii áádóó naat'áanii danilíinii t'áá bił áhodeeshdįįł, ní Bóhólníihii.

⁴Bóhólníihii kóní, Jó, Júdah dine'é táadi, doodaii' dį́įdi bee haz'áanii k'ídajizti'go biniinaa dooshą' léi' t'áadoo atíháshłééh lá, háálá Bóhólníihii bibee haz'áanii doo dazniizį́į' da índa bibik'eh ó'oo'níiłii doo bik'eh dahojííł'įįd da, nidi dabizhé'é yę́ę ádáát'įįdígi át'éego dabiyooch'íidgo yóó'aheeskai.

⁵Áko Júdah bik'ijį' kǫ' ádeeshłíiłgo Jerúsalem kin haal'áagi bidziilgo bił nahaz'áanii ałtso adidook'ą́ą́ł.

⁶Bóhólníihii kóní, Jó, Ízrel dine'é táadi, doodaii' dį́įdi bee haz'áanii k'ídajizti'go biniinaa dooshą' léi' t'áadoo atíháshłééh lá, háálá diné t'áá ákogi ádaat'éii béésh łigaii bik'é haa nidahaniih índa diné badahojoobá'íii ké bik'é haa nidahaniih.

⁷Badahojoobá'íii dabitsii' bąąhdę́ę́' łeezh dibahí nidi k'ad yídin ádaanééh índa a'ohgo ádaat'éii t'óó nayídadziłtaał; dinééh índa bizhé'é yił ch'ikę́ę́h t'ááłá'íígíí yaa nidilt'é, áko shízhi' dílzinii doo ílį́į́góó íílééh.

⁸Bikáá' náá'iiniihí t'ááłá'í ní'ánígo bíighahgóó éé' ąąh naaznilii yikáá' nídanjah índa biDiyin God bikin bii' sohodizin góne' wáin nináhályéhígíí áde deidlą́.

⁹Shí t'éí dahanááł Ámor dine'é ádeeshdįįł; éí gad alááh áníłnéezii nahalin índa chéch'il nahalingo bidziil, nidi bineest'ą' wódahdę́ę́' yaa nihideeshtih áádóó behétł'óól wóyahdę́ę́' hadeests'ǫł.

¹⁰Shą́ą́', shí éí Ííjip kéyahdę́ę́' ch'ínihiní'eezhgo dízdiin nááhaijį' honoojíidi tánihidíí'eezh, áko Ámor dine'é bikéyah yá'áhoot'éehii nihíí' dooleeł biniyé biih nihíí'eezh ni'.

¹¹Ákohgo danihiye'ké shá dahalne' doo biniyé ła' nídiinil áádóó diné ániid nidaakaii ła' Názarait danilį́į doo biniyé nídiinil. Ízrel dine'é danohłíinii, da' díísh doo t'áá aaníi da? ní Bóhólníihii.

¹²Nidi Názarait danilíinii éí wáin deidlą́ągo ádaahłaa áádóó dahalne'ii danilíinii, T'áadoo dahołne'é, dabidohníigo bich'į' hadasoohdzíí'.

¹³Tł'oh naadą́ą́' ałch'į' bida'astł'ǫ́ǫgo tsinaabąąs bide ályaaígi át'éego t'áá íiyisí yaa kódashoohłaa, jó'akon.

¹⁴Dilwo'ii éí doo ch'aa anóchééł át'ée da doo áádóó bitsxe'ii doo bitsxe' da dooleeł índa ayóó át'éii doo yisdá'ádóltééł át'ée da dooleeł.

¹⁵K'aa' yee adziiłt'óóh dooleełígíí doo yíneel'ą́ą da doo áádóó dilwo'ii yisdá'ádidooltéłígíí doo yíighah da dooleeł índa łį́į́' nabiyéhígíí t'áá bí yisdá'ádidooltéełgi nidi doo yíneel'ą́ą da doo.

¹⁶T'áá éí bijį́ siláo dahayóii bitahdóó doo nídanilyéesii t'áá łichí'ígo yóó'adahidoojah, ní Bóhólníihii.