Read Navajo AMOS 3 Bible Online

AMOS 3 - Navajo bible

AMOS 3

¹Ízrel dine'é danohłíinii, Ííjip kéyahdę́ę́' ch'ínihiní'eezhii t'áá ánółtso Bóhólníihii bizaad yee nihik'ijį' nilį́įgo yáłti'ígíí dadoohts'į́į́h.

²Nihokáá' dine'é danilíinii bitahdóó nihí t'éiyá nihééhasin; éí bąągo doo ákwii ádaot'įįdii t'áá át'é biniinaa atínihideeshłííł.

³Hazhó'ó ahazhdeet'ą́ągo lá t'éiyá t'áá ła' joo'ash doo ni.

⁴Da' náshdóítsoh bitsiijį' ditł'ooígíí naalzheehgo t'ah doo shóyoołt'eehgóósh áníi doo? Náshdóítsoh yáázh bitsiijį' ditł'ooígíí yidoolghałii t'ah doo shóyoołt'eehgóósh bi'áándę́ę́' yichxa doo?

⁵Da' ni' bikáa'gi tsídii éí łoh bee doodlohii doo bá si'ą́ą́góósh t'áá yiih doogááł? Da' t'áá áhoodzaadę́ę́'ésh łoh t'áá azdooloh?

⁶Kin haal'áajį' deenásts'aa' bidee' bee í'dílzoołí ádííniidgo t'áá aaníí diné nídadooldzííł. Kin haal'áii bik'ijį' doo yá'áshóonii ahóóle'go Bóhólníihii éí binaanish át'é.

⁷T'áá aaníí, Bóhólníihii Diyin God doo haada adoolíił da, nidi bá naal'a'í bá dahalne'ii t'áá nahont'inee ááníłígíí yił ch'íyii'aahgo índa áánííł.

⁸Náshdóítsoh bitsiijį' ditł'ooígíí ayóó íits'a'go áníigo, háishą' t'áadoo nídooldzíił da? Bóhólníihii Diyin God hahadziihgo, háishą' doo bá yáłti'góó yíneel'ą́ą doo?

⁹Áshdad kin haal'áagi índa Ííjip kéyahgi bidziilgo bił nahaz'áanii bikáá' nidasoozį́įgo baa nidahodołdlaadgo ádadohní, Samériya dził naaznilígíí bighą́ą'di áłah nohłį́į doo, áko bitahdę́ę́' ayóó át'éego hahóó'á índa bide ádahólzinii nihił béédahodoozįįł.

¹⁰Áko bidziilgo bił nahaz'ánígóó t'áá na'níle'dii aghadayiis'nilii hasht'e' nidayiiznilígíí éí ts'ídá yá'át'éhígi ádadooníłígíí doo bił béédahózin da, ní Bóhólníihii.

¹¹Éí bąągo Bóhólníihii Diyin God kóní, Ana'í doonéełgo nihikéyah yinídoot'ihgo bee nihidziilii nihits'ą́ą́' yaa kódeidoolííł, índa bidziilgo nihił nahaz'ánídóó ałtso nihighada'doolyééł.

¹²Áko Bóhólníihii kóní, Na'niłkaadii éí dibé bijáád t'áá naakihígo, doodaii' bijaa' t'áá ałní'ídóó náshdóítsoh bitsiijį' ditł'ooígíí bizéé'dóó hááyoo'nizhígi át'éego Samériyadóó Ízrel dine'é éí bik'i dah asdáhí naanáz'áhígíí índa tsásk'eh bijáád t'éiyá yił dah dadínóochééł.

¹³Bóhólníihii Diyin God éí t'áá ałtsoní bee Bóhólníihii Diyin God nilíinii ání, Íísíníłts'ą́ą́', Jéíkab ba'áłchíní danilíinii díí bee bił hólne'.

¹⁴Ízrel dine'é bee haz'áanii dajiizti'ii biniinaa atíhodeeshłíłígíí t'áá éí bijį́ Béthelgi bikáá' náá'iiniihí ałdó' ałtso nihideeshchxǫǫł, áádóó bikáá' náá'iiniihí bidee' yadaa'áhígíí k'íhidoolniiłgo ni'jį' adínóodah.

¹⁵Kin bii' nídabeehahii índa kin bii' nídabeeshį́įhii nihideeshchxǫǫł áádóó áívorii wolyéii bee kin ádaalyaii ádin dooleeł, áko kin ayóó ádaat'éii ałtso ádin dooleeł, ní Bóhólníihii.