Read Navajo AMOS 4 Bible Online

AMOS 4 - Navajo bible

AMOS 4

¹Béíshan kéyahdóó béégashii danohłíinii, Dził Samériya bikáa'di nidaahkaii, badahojoobá'íii bide áhoot'é ádahwíínóhsinii, hojooba' nahas'áanii t'óó bik'i nidaohkaii, nihadahastiin, Doodlį́įłii ła' nihaa dahohkaahgo haa'íshą' da'diidlį́į́ł, dabidohníinii, díí saad dadoohts'į́į́h.

²Bóhólníihii Diyin God bihodiyinii yee ádee hadoodzíí'; jó, béésh názhahí áchį́į́h bąąh si'ání bee yóó'anihidi'yoot'ishii beidoołkááł; t'áá daohdzí'ígíí łóó' bee hahadleehí názhahígíí bee yóó'anihidi'yoot'ish.

³Áko ahéé'ítł'inii nidahaasdááz góne' t' áá k'éhézdon ch'íhidoohjah áádóó bidziilgo nahaz'ą́ą́dóó ch'ínihidi'yooltł'ił, ní Bóhólníihii.

⁴Nílááh, bąąhági át'éii biniyé Béthel kin shijaa'jį' dadohkááh; Gílgal kin shijaa'gi bąąhági át'éii bee tsi'haohkááh; t'áá ákwíí abíní náádahidoołnihii nidahohjááh, t'áá táá' yoołkááł bik'eh nihee dahólóonii neeznáá daníjaa'ígíí éí t'ááłá'ígo shijaa' nidahohjááh.

⁵Díík'ǫsh bááh bił ályaago nááhániihii baa ahééh hasingo náádahołniih, áko t'áá níík'eh náádahaniihii baa dahołne', háálá, Ízrel dine'é danohłíinii, ákódaaht'į́į dooleełígíí nihił yá'ádaat'ééh, ní Bóhólníihii Diyin God.

⁶Nihikin hadaas'áagi t'áá ałtsogóó awoo' doo bąąh chinii nihaa diní'ą́ áádóó kéédahoht'į́į́góó t'áá át'é bááh bídin danohłį́į́ nít'éé', nidi t'áadoo shich'į' nináhisoohkai da, ní Bóhólníihii.

⁷Da'agizhígíí t'ah táá' nídeezid hadziihgo doo nahałtingóó ádeeshłííł, áko t'ááłáhígo kin haal'áhígíí bik'i nahałtingo náánáłahgo kin haal'áhígíí éí doo bik'ijį' nahałtingóó ádeeshłííł. Kéyah t'ááłáhígo bik'i nahodoołtį́į́ł; náánáłahgoígíí éí doo bik'ijį' nahałtingóó biniinaa hodoogą́ą́ł.

⁸Áko naakigo kin haal'áádóó, doodaii' táa'go kin haal'áádóó éí t'ááłáhígo kin haal'áhígóó tó doodlį́įłii yiniyé yah dadikai nít'éé', nidi t'áadoo tó yee hwiih daazlį́į' da, ákondi t'áadoo shich'į' nináhisoohkai da, ní Bóhólníihii.

⁹Nihidáda'ak'eh áádóó nihich'il na'atł'o'ii k'éédadilyéehjį' hadoh bił ních'igo áádóó dá'áchaan bik'ijį' áshłaa índa nahachagiitsoh éí nihitsin fig naazkaadii deíl'áá nít'éé' yę́ę índa áliv naazkaadii deíl'áá nít'éé' yę́ę ałtso nihits'ą́ą́' yaa nahodeeskai, ákondi t'áadoo shich'į' nináhisoohkai da, ní Bóhólníihii.

¹⁰Ííjip kéyahdi naałniih bitaasnii'ígi át'éego naałniih bee atínihiishłaa; nihi'ashiiké ániid nidaakaii diltłish bee ásíłdįįd; nihilį́į́' ałtso nahjį' kóshłaa, índa dah wohnééł yę́ęgi t'óó baa'ih dahalchinii daałchingo áshłaa, nidi t'áadoo shich'į' nináhisoohkai da, ní Bóhólníihii.

¹¹Diyin God nishłį́įgo Sádam índa Gomárah kin haal'á yii' kéédahat'íinii ásíłdįįdígi át'éego shí atínihiishłaa, áko nihik'i nida'deezk'ą́ą'go tsídzi'dę́ę́' háánihi'diis'nil, ákondi t'áadoo shich'į' nináhisoohkai da, ní Bóhólníihii.

¹²Éí bąą Ízrel dine'é nohłíinii, kónihideeshłííł. Ízrel dine'é nohłíinii, nihiDiyin God bidááh doohkahígíí biniyé hasht'e'ádadołnééh, háálá ádeeshníłígíí bee nihi'nish'nííh.

¹³Háálá dził naaznilgo índa nídadiyołgo ííł'íinii, jó'akon, áádóó diné bintsíkees bił bééhózingo yee yił halne'ii índa abíní éí chááháłhiłgo ánáyiil'įįhii áádóó nihokáá' aghádahaz'áágóó yik'i naagháii éí t'áá ałtsoní bee Bóhólníihii Diyin God wolyé.