Read Navajo AMOS 5 Bible Online

AMOS 5 - Navajo bible

AMOS 5

¹Ízrel dine'é nohłíinii, díí saad dadoohts'į́į́h, dooládó' lá ayóó ánihiishłaago bik'ee yishchxa da.

²Ízrel ch'ikę́ę́h bízháán naagháii naa'íígo'go doo náádoo'nééh ádzaa da; bikéyahgi doo bidi'niidzíí'góó t'áadoo náábidoołáłí da.

³Jó, Bóhólníihii Diyin God kóní, Kin haal'áádóó miilgo adahaazbaa'ii t'áá neeznádiiní doodzih, áádóó kin haal'áádóó neeznádiingo adahaazbaa'go t'áá neeznált'éhí daadzíi'go Ízrel dine'é yaa nídookah.

⁴Jó, Bóhólníihii éí Ízrel dine'é ííłní, Shíká ádaaht'į́įgo dahinohnáa doo.

⁵Nidi Béthel kin shijaa'góó, doodaii' Gílgal kin shijaa'góó, doodaii' Bíyer-shííba kin shijaa'góoda t'áadoo nidaahkaí, háálá Gílgaldóó dine'é yisnááh biniyé abidi'niit'áah doo índa Béthel t'áadoo nídoodleełí da.

⁶Bóhólníihii hádaaht'į́įgo dahinohnáa doo, áko kǫ' bee iih hodoo'nilígi át'éego Jóseph bikindóó dine'é bitahgi doo didooltłił da, áádóó Béthelgi hodook'ą́łígíí t'áadoo yiinółtsésí da dooleeł.

⁷T'áá ákóne' át'éii yę́ę dích'íi'go ádaał'íinii áádóó nihokáa'gi ts'ídá t'áá ákogi át'éii yę́ę yóó'adahidoh'aahígíí, Bóhólníihii hádaaht'į́.

⁸Éí Dilyéhé índa Átsé'ets'ózí áyiilaii, chááháłhiłígíí abíní ánáyiil'įįhii, jínígíí tł'éé' ánáyiil'įįhii, tónteel bits'ą́ą́dóó tó yókeedii éí nahasdzáán bikáa'jį' tó kwííł'íinii éí Bóhólníihii bee wójí.

⁹Éí dziil yik'ijį' nilį́įgo ó'oołdįįł, áko bine' nida'adzi'ii ałtso niyiiłchxǫǫh.

¹⁰Aań'dítį́įhgi aditehgo sizíinii deijoołxá; t'áá ákóne' át'éego halne'ii yik'ee dadiniih.

¹¹Hojoobá'ígo ádaat'éii t'óó bik'i naahkaigo áádóó bitł'oh naadą́ą́' t'óó bighadahidoht'aahgo bąą azhą́ tsé hasht'e'nibída'ałne'ii bee kin ádaohłaa nidi, doo bii' kéédahoht'į́į da dooleeł áádóó ch'il na'atł'o'ii k'idadooláa nidi, bits'ą́ą́dóó wáin doo ła' dadoohdlį́įł da.

¹²Háálá bee haz'áanii dahooti'ii áádóó ádił nida'ayołzíihii t'óó ahayóigo shił bééhózin; t'áá ákogi ádaat'éii atídaoł'į́ áádóó bee naho'diiniihii nídahidoohnííł índa aań'da'ditį́įhgi hojooba' ádaat'éii áts'ą́ąjį' bida'ayołnííh.

¹³Éí bąągo diné hóyáanii t'óó déesyéelgo bíyoołkáał doo, háálá doo yá'át'ééhgóó hoolzhish.

¹⁴Yá'át'éehii hádaaht'į́, doo yá'át'éehii éí dooda; ákódaaht'į́įgo t'éí dahinohnáa doo. Índa t'áá ádadooniidígi át'éego t'áá ałtsoní bee Bóhólníihii Diyin God nihił hólǫ́ǫ dooleeł.

¹⁵Doo yá'át'éehii bik'ee dadinohniih; yá'át'éehii t'éí ayóó'ádeínóh'ní; t'áá ákóne' át'éii bee niłdzilgo dáń'dítį́įhgi nihaa nídóot'įįł. Áko t'áá ałtsoní bee Bóhólníihii Diyin God éí Jóseph dine'é yidziihígíí ajooba'da yee yik'iizhdoodliił daats'í.

¹⁶Éí bąą t'áá ałtsoní bee Bóhólníihii éí Diyin God, Bóhólníihii kóní, Da'nítiin t'áá ałtsogóó índa kintah da'nítiingóó diné chaał hahodidoołdlałgo, Ayáhéi', ayáhéi', daaníigo k'ééda'didléehii yínííł danohłį́, deiłníi doo; chxaał nidahałe' dayiichįįhii daachxa doogo hágo bidoo'niid.

¹⁷Ch'il na'atł'o'ii k'éédadilyéhígóó cha háá'áa dooleeł, háálá ákǫ́ǫ́ nihitah ch'ídeeshááł, ní Bóhólníihii.

¹⁸Bóhólníihii beidoołkááł bíká dadínóh'į́į'ii doo hojooba' ájíníi da! Bóhólníihii beidoołkáłígíí ha'át'íísh nihá íidoolííł? T'óóyee' chahodoołhiłgo doo adinídíin da doo.

¹⁹Diné éí náshdóítsoh bitsiijį' ditł'ooígíí yits'ą́ąjį' dah diilwodgo shash bidááh yílwodígi át'éego, doodaii' yah anííchą́ą'go kin yideelchidgo kin bąąhdę́ę́' tł'iish bidoołhashígi át'éego

²⁰Bóhólníihii beidoołkáałdi chahodoołhiłgo doo adinídíin da doo áádóó t'áá íiyisí chahodoołhiłgo doo nidi hool'in da doo.

²¹Hodílzingo áłah nídaohdleehii ts'ídá jooshłxá; ts'ídá doo nisxin da áádóó baa áłah danohłį́į nidi, doo baa shił hózhǫ́ǫ da.

²²Azhą́ didlidgo nááhániihii áádóó ak'áán nááhániihii shich'į' náádahołniih nidi, éí doo dínéesįįł da áádóó hózhǫ́ǫ́jí biniyé neesk'ahii náádahołniihígíí doo t'áá k'ad nééł'į́į' da.

²³Sin bee dahohtaałgo hahooł'áhígíí shits'ą́ąjį' kódaahłééh. Tsin tł'óół naakits'áadah bąąh daneelzhee'go bee nida'a'néii bee nidaahnéego doo yínísts'ą́ą' da doo.

²⁴Nidi tó náálį́ nahalingo doo haada yit'éii hólǫ́ǫ le' índa ts'ídá bidziilgo tó nílį́ nahalingo ts'ídá t'áá ákwii át'éii hólǫ́ǫ le'.

²⁵Ízrel dine'é nohłíinii, dízdiin nááhaijį' honoojíidi didlidgo náádahaniihígíí áádóó náádahaniihiísh shich'į' náádahołniih nít'éé'?

²⁶Jó, e'elyaii bich'į' nidahohłáa doo biniyé ádaahłaaígíí éí nihidiyin bidi'níinii Mólak biníbaal nidaah'áá nít'éé' áádóó nihidiyin bidi'níinii Káíyan bisǫ' nidaah'áá nít'éé'.

²⁷Éí bąą Damáskas kin haal'á bilááhgóó yisnááh danohłį́įgo ánihideeshłííł, ní Bóhólníihii, éí T'áá'ałtsoní biDiyin God wolyéii.