Read Navajo AMOS 6 Bible Online

AMOS 6 - Navajo bible

AMOS 6

¹Dził Záíyangi doo hodítéehee kéédahoht'íinii índa Dził Samériya bighą́ą'di hasih danohsingo kéédahoht'íinii doo hojooba' ájíníi da! Ał'ąą dine'é bitahdóó aláahdi dine'é jílíinii, hwi'aląąjį' naazíinii nohłíinii, Ízrel dine'é nihaa hakáhígíí nihich'į' doo hojooba' ájíníi da!

²Kálnehígóó nídadohkahgo danół'į́ áádóó Héímath ayóó át'éego bił haz'ą́ą́góó ałnáádaahkah áádóó Gathgi Filístiya dine'é bił haz'ą́ą́ góyaa ałdó' nídadohkah. Da' díí bee óhólnííh bił haz'áaniísh biláahgo ayóó ádaat'é? Éí doodaii' nihił hahoodzooígíísh biláahgo ts'ídá ayóó át'éego bił hadahwiisdzo?

³Doo yá'áhoot'ééhgóó yoołkáał doo ha'nínígíí áts'á dabíínółnáa nidi, nihá nidahodoot'ááł baa hodoolzhishígíí ahą́dí hadziihgo ída'doołyaa.

⁴Áívori wolyéii tsásk'eh bee ádaalyaago bikáá' nijizhjée'ii áádóó bik'i dah antéhí bikáá' naanídajishjizhii áádóó dibé nanilkaadę́ę́' dibé yázhí índa béégashii shijéé'dóó béégashii yáázh dajilghałii hach'į' doo hojooba' ájíníi da!

⁵Tsin tł'óół naakits'áadah bąąh daneelzhee'go bee nida'a'néii bik'ehgo t'óó dzólníígóó dahataałii áádóó David áát'įįd yę́ęgi át'éego bibee na'a'néhí sin yee nidaanéhígíí ádá ádeilne'ii hach'į' doo hojooba' ájíníi da!

⁶T'óó bee adlání nitsxaii bee wáin dajidláanii áádóó ak'ah łikání halchinii aláahgo ílíinii bee ádazhdiltłah, nidi Jóseph dine'é yik'ee ti'dahooznii'ígíí doo bik'édí dajílíinii hach'į' doo hojooba' ájíníi da!

⁷Éí bąą k'ad hó ts'ídá átsé yisnááh dazhdooleeł áádóó naanídaashjizhgo áda'azįįdgi da'ayáanii hoł yóó'ahodoogááł.

⁸T'áá ałtsoní bee Bóhólníihii Diyin God ání, Bóhólníihii Diyin God t'áá bí ádee hadoodzíi'go ádííniid, Jéíkab bibee ádaa hodzódli' t'óó shił baa'ih; bidziilgo bił nahaz'ánígóó t'óó hojooshłxá; kin haal'áii áádóó bii' dahólóonii t'áá bił ninádideesh'ááł.

⁹Ákóhoodzaago diné neeznájílt'éego kin t'ááłá'ígíí t'áá biyi' nidzíiztą́ągo éí dazhdínóonééł.

¹⁰Éí diné bik'éí ła', doodaii' biyah adiiłk'ą́ąhii yóó'ábidoolíłígíí biniyé kindóó dabits'in ch'ííjáahgo kin biyi' góne' yidzí'ígíí áyididooniił, Ła'daásh bił nidinílt'é? Áko ádidooniił, Nidaga'. Na'ídééłkidii ánáádidoo'niił, T'áadoo yáníłti'í, háálá Bóhólníihii bízhi' doo bee yáti' da.

¹¹Shoo, Bóhólníihii yee hadoodzih, éí t'áá bí kin ayóó áníłtsoii ahiih néidiyoołkał áádóó kin áłts'íísígíí yididooséí, jó'akon.

¹²Tsé'éłkáa'giísh łį́į́' t'áá nídidoolwoł? Ákwiísh béégashii bee nihwiildlaad? Nidi doo haada yit'éii báhádzidii nináhádleeh ádaahłe' índa t'áá ákogi át'éii bineest'ą' t'óó báhádzidgo dích'íí' nináhádleeh ádaahłe'.

¹³T'áadoo dabiniyéhígíí baa nihił nidahoozhǫǫh áádóó ádadohní, T'áá nihí ayóó adanihóodziilii bee danihidziil dasiidlį́į́'.

¹⁴Nidi t'áá ałtsoní bee Bóhólníihii Diyin God ání, Ízrel dine'é danohłíinii, ana'í nilíinii nihich'į' nídahidiikáahgo ádeeshłííł; éí Héímathdóó honoojíigi tooh nílíníjį' atídanihił'į́įgo ádeeshłííł, jó'akon.