Read Navajo AMOS 7 Bible Online

AMOS 7 - Navajo bible

AMOS 7

¹Bóhólníihii Diyin God éí díí shił yit'íní áyiilaa: aláahgo naat'áanii tł'oh bá yilzhée'go áádóó bik'ijį' háánoot'ą́ągo Bóhólníihii éí nahachagiitsoh yiniyé hasht'eyiilaa, jó'akon.

²Kéyahgóó nahachagiitsoh ałtso da'ííyą́ą'go ádíshní, Bóhólníihii Diyin God nílíinii, nánooshkąąh, Jéíkab dine'é ádił nida'iisíi'ii bá yóó'anídí'aah. Haash yit'éego kééhat'į́į doo? Jó, éí t'áá díkwílt'éhí yee'.

³Bóhólníihii díí łahgo át'éego yąąh tsíńdeezkéezgo ání, Nich'į' yit'íní ályaii doo bik'ehgo ákóhodooníił da.

⁴Bóhólníihii Diyin God díí ałdó' shił yit'íní ánááyiidlaa: Bóhólníihii Diyin God kǫ' yee atídoolíiłgo yíká ádííniid, áko tónteel ałtso iididoołk'ą́ą́ł áádóó kéyah éí kǫ' bidooyį́į́ł, jó'akon.

⁵Áko ádíshní, Bóhólníihii Diyin God nílíinii, doo ákódííníił da, baa nánooshkąąh. Haash yit'éego Jéíkab dine'é kééhat'į́į doo? Jó, éí t'áá díkwílt'éhí yee'.

⁶Bóhólníihii díí ałdó' łahgo át'éego yąąh tsíńdeezkéezgo ání, Nich'į' yit' íní ályaii doo bik'ehgo ákóhodooníił da, ní Bóhólníihii Diyin God.

⁷Díí ałdó' shił yit'íní ánááyiidlaa: k'ézdongo tł'óół náát'i'ígíí bee ha'ootł'ingo ítł'inígíí bikáa'gi Bóhólníihii sizį́, áádóó k'ézdongo tł'óół náát'i'ígíí bílák'eedę́ę́' náát'i', jó'akon.

⁸Ákohgo Bóhólníihii áshíłní, Éímas, ha'át'íishą' yíní'į́? áádóó ádíshní, K'ézdongo tł'óół náát'i'ígíí lą́ą. Nít'éé' Bóhólníihii ánááshidoo'niid, Ízrel shidine'é danilíinii bitahgi k'ézdongo tł'óół náát'i'go ádeeshłííł, jó'akon. Doo t'óó haa náádideesh'áał da.

⁹Áízak bá ninádahałaah doo biniyé wódah nahaz'ą́ągo ádaalyaaígíí t'áadoo nídadoodleełí da áádóó Ízrel bihodiyingo nahaz'áanii t'áá ádzaaí nídadoodleeł índa Jerobówam baa ałk'eedóó náás ahoolchíiłii bik'ijį' nishłį́įgo diltłish bee ádahodeeshdįįł.

¹⁰Béthelgi náá'iiłniihii Amazáíyah éí Ízrel dine'é aláahgo binanit'a'í Jerobówam bich'į' hane' ájiilaago ájíní, Éímas éí Ízrel dine'é bitahgi ni' hodeez'ą́. Kéyahgi dine'é éí Éímas áníinii t'áá ałtso doo bídazhneel'ą́ą da.

¹¹Jó, Éímas ájíní, Jerobówam éí diltłish bee hodi'yoolyééł áádóó t'áá aaníí, Ízrel dine'é hakéyahdóó yisnááh dajílį́įgo ch'íhodi'doot'ish.

¹²Ákohgo Amazáíyah éí Éímas ábizhdííniid, Náasdi áhodoonííł yaa halne'ii nílíinii, nílááh, yówehjį' Júdah kéyahgóó nídílyeed; áadi bááh niyą́ą le'; áadi hólne' le'.

¹³Nidi Béthelgi ts'ídá doo ninááhodíílnih da, háálá aláahgo naat'áanii bihodiyingo haz'áanii át'é. Kwe'é haz'ą́ągi ałdó' aláahgo naat'áanii bighan.

¹⁴Áko Éímas éí Amazáíyah ábizhdííniid, Shí doo náasdi áhodoonííł yaa halne'ii nishłį́į da nít'éé'; Diyin God yá halne'ii biye' nidi, doo nishłį́į da, nidi na'niłkaadii áádóó tsin síkamor bineest'ą' áłah ííł'íinii nishłį́į́ nít'éé'.

¹⁵Dibé bikéé' naasháago Bóhólníihii náshidiiłtį́įgo áshidííniid, Nílááh, shidine'é Ízrel shá bił hólne'.

¹⁶Éí bąą k'ad Bóhólníihii bizaad yísíníłts'ą́ą́'. Shą́ą́', ádíní, Ízrel dine'é t'áadoo bik'ijį' yáníłti'go hólne'í, índa Áízak ba'áłchíní t'áadoo bik'ijį' saad hidiiłtáahgo hólne'í.

¹⁷Éí bąą Bóhólníihii kóní, Kin haal'áagi ne'asdzą́ą́ ałjiłnii nilį́į dooleeł, áádóó niye'ké áádóó nitsi'ké éí diltłish bee nidabidi'dootsił, índa nikéyah ahádahidoodzohgo kéyah t'óó bahoo'ihgi dadíítsaał áádóó t'áá aaníí, Ízrel dine'é bikéyahdóó yisnááh dajílį́įgo ch'íhodi' doot'ish.