Read Navajo AMOS 9 Bible Online

AMOS 9 - Navajo bible

AMOS 9

¹Bikáá' náá'iiniihí bíighahgi Bóhólníihii sizį́įgo yiiłtsą́ áádóó áshíłní, Kin bíyah daniitł'inígíí bílátahgi nídiiłhaałgo ch'é'étiingi naa dah sitání ditsxizgo bąą áyah daniitł'inii t'áá ájít'é hak'ijį' nidahałdaasgo ádíílííł, áko dadzidziihígíí diltłish bee nidahodeestsił. Bitahdę́ę́' ch'íjílyeed nidi, doo yóó'azhdoolwoł da áádóó bitahdę́ę́' ch'íjígháah nidi, doo yisdázhdoogáał da.

²Azhą́ hool'áágóó ti'hoo'nííh góyaa adziiskai nidi, áádę́ę́' hááhodiyeesh'ish; yót'ááhgóó adziiskai nidi, áádę́ę́' adááhodeesh'ish.

³Áádóó azhą́ Dził Kármel bighą́ą'di nida'ádizhnil'in nidi, há hodídéesh'įįłgo nináhodiyeesh'ish, áádóó azhą́ tónteel bitł'ááh góyaa shits'ąą nídazdeest'į́į' nidi, áadi tł'iish ahidahodiyoołhashgo há hadeesdzih.

⁴Azhą́ hwe'ana'í biyisnááh dadzizlį́į' nidi, áadi diltłish bee nahodi'dootsxiłgo bee hadeesdzih; doo yá'át'éhígi áhodeeshłíłígíí biniyé háká yish'áał doo, yá'át'ééhjí éí dooda.

⁵T'áá ałtsoní bee Bóhólníihii Diyin God éí nahasdzáán yideelchidgo ałtso diłhį́įhgo áádóó nihokáa'gi kéédahat'íinii t'áá ałtso yínííł danilį́įgo ííł'į́. Ííjip kéyahdi Náil tooh nílíní góyaa ayóó át'éego tooh wó'ądadziiłhaał áádóó tó yaa ná'nool'ąął nahalingo nihokáá' ákóhodoonííł.

⁶Yá'ąąsh aghánáhóó'áadi bighango áyiilaa, áádóó nahasdzáán yik'i dah asbaalgo áyiilaa. Tónteel bits'ą́ą́dóó tóhígíí dah doołdóóh néidi'niihgo nahasdzáán bikáa'jį' naałtingo ííł'į́. Díí t'áá ałtso áyoolíiłii éí Bóhólníihii bee wójí.

⁷Bóhólníihii ání, Ízrel dine'é danohłíinii, da' shich'į'goósh doo Iithiyópiya dine'é nidahonohłin da? Shą́ą́', Ííjip kéyahdę́ę́' éí Ízrel dine'é ch'íní'eezh ni' áádóó Káftor kéyahdę́ę́' éí Filístiya dine'é ałdó' ch'íní'eezh índa Kir haz'ą́ą́dę́ę́' éí Síriya dine'é ałdó' ch'íní'eezh.

⁸Ízrel dine'é yee bóhólníihgo bił haz'áanii éí bąąhági át'éego bił haz'ą́ągo Bóhólníihii Diyin God biníł'į́, jó'akon, áko éí nahasdzáán bikáa'jį' t'óó áhodeeshdįįł, nidi Jéíkab dine'é éí doo ałtso ádeeshdįįł da, ní Bóhólníihii.

⁹Háálá bee hadeesdzihgo éí bee aghá'níldéhí bee tł'oh naadą́ą́' ats'áníldéehgo t'ááłá'í nidi doo ła' ni'jį' naalts'íi daígíí nahalingo ał'ąą dine'é t'áá át'é bitahgóó Ízrel dine'é ats'áhodínéeshdah.

¹⁰Shidine'é bitahgóó ádił nida'iilzíihii éí doo yá'át'éehii doo nihidídóołniił da, doo nihaa nídóot'įįł da, daanínígíí éí t'áá át'é diltłish bee nidahodi'dootsił.

¹¹Éí bijį́ David bighan nahasdázígíí áńdeeshdlííł; éí nídeeshtł'į́įłgo ninádeesh'ááł; ałk'idą́ą́' ahéé'ítł'inígi át'éego áńdeeshdlííł.

¹²Íídam dine'é áádóó ał'ąą dine'é t'áá ałtso ch'éékaígíí shízhi' bee dayídóojiiłii bíí' dooleeł, ní Bóhólníihii, díí áyoolíiłii jílíinii.

¹³Bóhólníihii ání, Jó'akon, ayizhii éí t'áá bikéé' ła' nináhwiiłdlaad doo áádóó k'éédídléehii éí t'áá bikéé' ła' wáin yąąh hayiiníihii éí bílástsii' k'inéididlée doo. Dził daní'áii bąąhdę́ę́' ch'il na'atł'o'ii bitoo' łikanii nidahidilch'ą́ął doo, áádóó dah daask'idgóó bee nídahidi'eeł doo.

¹⁴Shidine'é Ízrel yisnááh danilíinii nahjį' kódeeshłíiłgo daabíí' nít'éé' yę́ę bíí' nídadoodleełgo ádeeshłííł áádóó kin hadaas'áii nidahaazhchxǫ' yę́ę hasht'éédeidoodlíiłgo yii' kénáádahat'į́į doo. Áádóó ch'il na'atł'o'ii k'éédadilyéehgi k'idadi'dooléełgo wáin deidlą́ą doo índa dáda'ak'ehgi k'idadi'dooléełgo bits'ą́ą́dóó aneest'ą' deiyą́ą doo.

¹⁵Áko hakéyahgi k'ééhodideeshdlééł áádóó hakéyah haa diní'áanii biyi'dóó doo ch'ínááhodi'nólkaad át'ée da doo, ní Bóhólníihii nihiDiyin God.