Read Navajo JONAH 2 Bible Online

JONAH 2 - Navajo bible

JONAH 2

¹Áádóó Jónah éí łóó' bibid biyi'di Bóhólníihii haDiyin God bich'į' sozdilzingo

²ájíní, Ti'hooshníhígíí biniinaa Bóhólníihii bich'į' sodeeszingo shidiizts'ą́ą́', áádóó hool'áágóó ti'hoo'nííh haz'ą́ bitł'ááhdę́ę́' hadeeshghaazhgo shiinéé' disíníts'ą́ą́'.

³Jó, ayóó ánízáád góyaa ashiyíníłhango tónteel ałníí' góne' sélį́į́', áádóó tó t'áá át'é shik'i diilkǫ'; nito' náádadiidáhígíí áádóó yilk'oołígíí t'áá át'é shik'i diilkǫ'.

⁴Ákohgo ádííniid, Nits'ą́ąjį' ch'íshidi'yeelghan; azhą́ ákót'ée nidi, nikin bii' sohodizin dílzinii si'ą́ą́góó sonáádideeszįįł.

⁵Tó shináálk'ołgo shii' sizíinii bide áhoodzaa; tó ditánígíí shik'i diilkǫ', áádóó táyi' ch'ilígíí éí shitsiits'iin bik'ídeesdiz.

⁶Yaago dził nidanees'ą́ąjį' niníyá; nahasdzáán bidáádíljah hool'áágóó shich'ą́ą́h nikidadii'á nahalin; azhą́ ákót'ée nidi, Bóhólníihii shiDiyin God nílíinii, a'áándę́ę́' she'iina' shá háínídlá.

⁷Shii' sizíinii doo bidziil da silį́į'go Bóhólníihii bénááshnii', áádóó nikin bii' sohodizin dílzinii si'ą́ąjį' shisodizin disíníts'ą́ą́'.

⁸T'áá ádzaaí yich'į' nidahałáii éí aa a'ááh hasin yóó'adeidiyii'aah.

⁹Nidi shizaad bee ahééh nisinii nich'į' nááhideeshnih; bee ádee hadeesdzíi'ii éí ádeeshnííł. Bóhólníihii éí bee yisdá'iildééh.

¹⁰Áádóó Bóhólníihii éí łóó' yich'į' haadzíi'go ni' hóółtseijį' Jónah łóó' bídeeskwi.