Read Navajo NUMBERS 1 Bible Online

NUMBERS 1 - Navajo bible

NUMBERS 1

¹Bóhólníihii éí Mózes yich'į' haadzíí'; Sáínai honoojíidi níbaal bii' dahozdísinii góne' naaki nídízííd binih ła'a jį́į́ góne' éí Ííjip kéyahdę́ę́' ch'ééjí'náádóó bik'ijį' naaki náhááh góne' áháłní,

²Ízrel dine'é dah deínéehii t'áá ałtso ahii' háá'ahiyoolchíiłii bitahgi dabizhé'é yę́ę ba'áłchíní da'ahílchíihii bik'ehgo bee dabi'dééji'ígíí łá'í nízínígo yíní łta',

³Ízrel dine'é danilíinii bitahgi naadiindóó yówehgo béédááhaii ana'al'į́ yídaneel'áanii t'áá ałtso dah deínéehii Éran bił yídííłtah.

⁴Áádóó nihíká adoojahii éí dine'é danilíinii dabizhé'é yę́ę bits'ą́ą́dóó náás ahoolchíiłii aląąjį' naazínígíí łá'í nítínígo

⁵éí diné nihíká adoojahígíí kódaolyé: Shédiyer éí Rúben dine'é nilį́įgo biye' Iiláízer,

⁶Zúrishádai éí Símiyan dine'é nilį́įgo biye' Shiilúmiyel,

⁷Amínadab éí Júdah dine'é nilį́įgo biye' Náshan,

⁸Zú'er éí Ísakar dine'é nilį́įgo biye' Niithániyel,

⁹Híílan éí Zébyulan dine'é nilį́įgo biye' Iiláíyab,

¹⁰Jóseph ba'áłchíní Íífreiyim dine'é nilį́įgo Amáíhad biye' Iilíshama, áádóó Manáseh dine'é nilį́įgo Piidázer biye' Gaméíliyel,

¹¹Gídiyónai éí Bénjamin dine'é nilį́įgo biye' Abáídan,

¹²Amishádai éí Dan dine'é nilį́įgo biye' Eihaiyíízer,

¹³Ákran éí Ásher dine'é nilį́įgo biye' Péígiyel,

¹⁴Dúwel éí Géed dine'é nilį́įgo biye' Iiláíyasaf,

¹⁵Íínan éí Náftalai dine'é nilį́įgo biye' Aháíra.

¹⁶Díí éí dah da'ínéehii bitahdę́ę́' náhaasdlá'ígíí áádóó dabizhé'é yę́ę bidine'é danilínígíí Ízrel dine'é miilgo dah deínéehii yiląąjį' naazíinii danilį́.

¹⁷Áko Mózes índa Éran díí diné dabi'dééji'ígíí néidiinil,

¹⁸áádóó naaki nídízííd binih ła'a jį́į́ góne' dah da'ínéhígíí t'áá ałtso áłah áyiilaago da'azhé'é yę́ę ádadóone'é danilínígíí bits'ą́ą́dóó da'ahílchíihii dabízhi' bik'ehgo diné naadiindóó yówehgo béédááhaii dayéélta'.

¹⁹Mózes hach'į' Bóhólníihii yee haadzí'ígi át'éego Sáínai honoojíidi diné jííłta'.

²⁰Rúben dine'é nilíinii Ízrel alą́ąjį' bá yizhchíinii ba' áłchíní náás ahoolchíiłii éí ahii' háá'ahiyoolchíłígíí dabizhé'é yę́ę ya'áłchíní danilį́įgo dabízhi' bik'ehgo diné naadiindóó yówehgo béédááhaii t'áá ałtso ana'al'į́ yídaneel'áanii

²¹éí Rúben dine'é bits'ą́ą́dóó dízdiindóó ba'aan hastą́ądi mííldóó ba'aan ashdladi neeznádiingo ánéelą́ą́'.

²²Símiyan dine'é nilíinii bidine'é náás ahoolchíiłii éí ahii' háá'ahiyoolchíłígíí dabizhé'é yę́ę yada'áłchíní danilį́įgo éí dabi'déélta'ii dabízhi' bik'ehgo diné naadiindóó yówehgo béédááhaii t'áá ałtso ana'al'į́ yídaneel'áanii

²³éí Símiyan dine'é bits'ą́ą́dóó ashdladiindóó ba'aan náhást'éidi mííldóó ba'aan táadi neeznádiin ánéelą́ą́'.

²⁴Géed dine'é nilíinii bidine'é náás ahoolchíiłii éí ahii' háá'ahiyoolchíłígíí dabizhé'é yę́ę yada'áłchíní danilį́įgo éí dabi'déélta'ii dabízhi' bik'ehgo diné naadiindóó yówehgo béédááhaii t'áá ałtso ana'al'į́ yídaneel'áanii

²⁵éí Géed dine'é bits'ą́ą́dóó dízdiindóó ba'aan ashdladi mííldóó ba'aan hastą́ądi neeznádiindóó ba'aan ashdladiin ánéelą́ą́'.

²⁶Júdah dine'é nilíinii bidine'é náás ahoolchíiłii éí ahii' háá'ahiyoolchíłígíí dabizhé'é yę́ę yada'áłchíní danilį́įgo éí dabi'déélta'ii dabízhi' bik'ehgo diné naadiindóó yówehgo béédááhaii t'áá ałtso ana'al'į́ yídaneel'áanii

²⁷éí Júdah dine'é bits'ą́ą́dóó tsosts'idiindóó ba'aan dį́įdi mííldóó ba'aan hastą́ądi neeznádiin ánéelą́ą́'.

²⁸Ísakar dine'é nilíinii bidine'é náás ahoolchíiłii éí ahii' háá'ahiyoolchíłígíí dabizhé'é yę́ę yada'áłchíní danilį́įgo éí dabi'déélta'ii dabízhi' bik'ehgo diné naadiindóó yówehgo béédááhaii t'áá ałtso ana'al'į́ yídaneel'áanii

²⁹éí Ísakar dine'é bits'ą́ą́dóó ashdladiindóó ba'aan dį́įdi mííldóó ba'aan dį́įdi neeznádiin ánéelą́ą́'.

³⁰Zébyulan dine'é nilíinii bidine'é náás ahoolchíiłii éí ahii' háá'ahiyoolchíłígíí dabizhé'é yę́ę yada'áłchíní danilį́įgo éí dabi'déélta'ii dabízhi' bik'ehgo diné naadiindóó yówehgo béédááhaii t'áá ałtso ana'al'į́ yídaneel'áanii

³¹éí Zébyulan dine'é bits'ą́ą́dóó ashdladiindóó ba'aan tsosts'idi mííldóó ba'aan dį́įdi neeznádiin ánéelą́ą́'.

³²Jóseph ba'áłchíní nilíinii, Íífreiyim dine'é náás ahoolchíiłii ahii' háá'ahiyoolchíłígíí dabizhé'é yę́ę yada'áłchíní danilį́įgo dabi'déélta'ígíí dabízhi' bik'ehgo naadiindóó yówehgo béédááhaii t'áá ałtso ana'al'į́ yídaneel'áanii

³³éí Íífreiyim dine'é bits'ą́ą́dóó dízdiindi mííldóó ba'aan ashdladi neeznádiin ánéelą́ą́'.

³⁴Áádóó Manáseh dine'é nilíinii bidine'é náás ahoolchíiłii éí ahii' háá'ahiyoolchíłígíí dabizhé'é yę́ę yada'áłchíní danilį́įgo éí dabi'déélta'ii dabízhi' bik'ehgo diné naadiindóó yówehgo béédááhaii t'áá ałtso ana'al'į́ yídaneel'áanii

³⁵éí Manáseh dine'é bits'ą́ą́dóó tádiindóó ba'aan naakidi mííldóó ba'aan naakidi neeznádiin ánéelą́ą́'.

³⁶Bénjamin dine'é nilíinii bidine'é náás ahoolchíiłii éí ahii' háá'ahiyoolchíłígíí dabizhé'é yę́ę yada'áłchíní danilį́įgo éí dabi'déélta'ii dabízhi' bik'ehgo diné naadiindóó yówehgo béédááhaii t'áá ałtso ana'al' į́ yídaneel'áanii

³⁷éí Bénjamin dine'é bits'ą́ą́dóó tádiindóó ba'aan ashdladi mííldóó ba'aan dį́įdi neeznádiin ánéelą́ą́'.

³⁸Dan dine'é nilíinii bidine'é náás ahoolchíiłii éí ahii' háá'ahiyoolchíłígíí dabizhé'é yę́ę yada'áłchíní danilį́įgo éí dabi'déélta'ii dabízhi' bik'ehgo diné naadiindóó yówehgo béédááhaii t'áá ałtso ana'al'į́ yídaneel'áanii

³⁹éí Dan dine'é bits'ą́ą́dóó hastą́diindóó ba'aan naakidi mííldóó ba'aan tsosts'idi neeznádiin ánéelą́ą́'.

⁴⁰Ásher dine'é nilíinii bidine'é náás ahoolchíiłii éí ahii' háá'ahiyoolchíłígíí dabizhé'é yę́ę yada'áłchíní danilį́įgo éí dabi'déélta'ii dabízhi' bik'ehgo diné naadiindóó yówehgo béédááhaii t'áá ałtso ana'al'į́ yídaneel'áanii

⁴¹éí Ásher dine'é bits'ą́ą́dóó dízdiindóó ba'aan t'ááłáhídi mííldóó ba'aan ashdladi neeznádiin ánéelą́ą́'.

⁴²Náftalai dine'é nilíinii bidine'é náás ahoolchíiłii éí ahii' háá'ahiyoolchíłígíí dabizhé'é yę́ę yada'áłchíní danilį́įgo éí dabi'déélta'ii dabízhi' bik'ehgo diné naadiindóó yówehgo béédááhaii t'áá ałtso ana'al'į́ yídaneel'áanii

⁴³éí Náftalai dine'é bits'ą́ą́dóó ashdladiindóó ba'aan táadi mííldóó ba'aan dį́įdi neeznádiin ánéelą́ą́'.

⁴⁴Mózes áádóó Éran éí díí diné yiyííłta'; éí Ízrel dine'é binaat'áanii naakits'áadahgo dabizhé'é yę́ę yik'eh nízį́įgo bił ajííłta'.

⁴⁵Kót'éego díí Ízrel dine'é t'áá ałtso yéélta'ígíí éí dabizhé'é yę́ę bits'ą́ą́dóó bik'ehgo Ízrel dine'é naadiindóó yówehgo béédááhaii t'áá ałtso ana'ííł'į́ yídaneel'áanii

⁴⁶éí t'áá ałtso yéélta'go hastą́ądi neeznádiindóó ba'aan táadi mííldóó ba'aan ashdladi neeznádiindóó ba'aan ashdladiin ánéelą́ą́'.

⁴⁷Nidi Líívai dine'é éí dabizhé'é yę́ę bik'ehgo t'áadoo atah dabi'déélta' da.

⁴⁸Háálá átséedi Bóhólníihii éí Mózes yich'į' haadzíi'go áyidííniid,

⁴⁹T'áá hazhó'ó Líívai dine'é t'éiyá doo yídííłtah da, doo nidi Ízrel dine'é bitahjį' bił íídííłtah da.

⁵⁰Nidi Líívai dine'é éí níbaal bii' hodílzinii, éí neeznáago bik'eh ó'oo'níiłii bee bééhániihii bii' sinilii, áádóó łeets'aa' t'áá át'é índa t'áá ałtsojį' bił chodao'íinii bee hódahólníih doogo nihodíínił, índa níbaal bii' hodílzinii áádóó t'áá ałtsojį' bił chodao'íinii t'áá bił nidajiyéego baa ádahojilyą́ą dooleeł, índa níbaal bii' hodílzinii binaagóó ninádaji'néeh doo.

⁵¹Áko níbaal bii' hodílzinii nihidoogéełgo Líívai dine'é éí ninádei'dii'áah doo, índa nináádoot'áałgo Líívai dine'é éí ninádei'áah dooleeł, índa t'áá háiida doo Líívai dine'é nilíinii níbaal bii' hodílzinii yíighahjį' deeyáii éí bidi'yoolyééł.

⁵²Áádóó Ízrel dine'é éí dahaníbaal ninádaji'nił doo; diné t'ááłá'í nízínígo t'áá hó haníbaal ninát'áahgi, t'áá hó hadah na'at'a'í bíighahgi ninádaji'néeh doo.

⁵³Nidi Líívai dine'é éí níbaal bii' hodílzinii, éí neeznáago bik'eh ó'oo'níiłii bee bééhániihii bii' sinilii, binaagóó biníbaal ninádei'nił doo, áko Ízrel dine'é dah yinéełii atí'él'į́ doo bik'i hwiidooleeł da; Líívai dine'é éí níbaal bii' hodílzinii, éí neeznáago bik'eh ó'oo'níiłii bee bééhániihii bii' sinilii, bee bídahólníihgo yaa ádahalyą́ą doo.

⁵⁴Áko Ízrel dine'é t'áá ákǫ́ǫ́ ádaadzaago Bóhólníihii éí Mózes yich'į' yee haadzí'ígíí t'áá át'é yik'eh ádaadzaa.