Read Navajo NUMBERS 10 Bible Online

NUMBERS 10 - Navajo bible

NUMBERS 10

¹Áádóó Bóhólníihii éí Mózes yich'į' hanáánáádzíi'go ání,

²Béésh łigaii bee dilní bee í'dílzoołí naakigo íidoolíiłgo íínísin; hasht'e'nibí'dííłniił, áko éí choiníł'į́įgo Ízrel dine'é t'áá ałtso bá nídiiłts'į́įhgo áłah nádleeh doo áádóó dah nídii'néeh doo.

³Áko t'áá áłah nídiiłts'į́įhgo níbaal bii' dahozdísinii bich'éédą́ą'gi t'áá ałtso naa áłah nádleeh doo.

⁴Nidi t'ááłá'í nídiiłts'į́įhgo éí Ízrel dine'é bitahdę́ę́' aląąjį' naazíinii éí miilgo yinanit'a'í danilíinii naa áłah nádleeh doo.

⁵Áko bee i'níłníihgo éí nízaadgóó nídiiłts'į́įhgo ha'a'aahjígo dah oonéłígíí dah nídii'néeh doo.

⁶Áádóó bee i'níłníihgo éí naaki góne' nízaadgóó nídiiłts'į́įhgo shádi'ááhjígo dah oonéłígíí dah nídii'néeh doo, áko nihidoonéełgo nízaadgóó bá nídiiłts'į́įh doo.

⁷Áádóó oonéłígíí áłah ádooníiłgo éí áłts'ísígo dilní nídiiłts'į́įh doo, nidi doo bee i'ílníhígi át'éego nízaadgóó nídiiłts'į́įh da doo.

⁸Éran biye'ké náás ahoolchíiłii nááda'iiłniihii danilį́įgo éí dilní yee áńdadi'niih doo; díí bik'ehgo hoogáałii hool'áágóó náás oochííłgóó nihá át'ée doo.

⁹Áko nihikéyahgi ana'í nihich'į' nahwiiłnáago bik'ijį' anaa' ádaahłéehgo nízaadgóó éí dilní didííłts'į́įłgo bee i'dííłnih, áko Bóhólníihii nihiDiyin God binááł nihéédahodoonihgo nihi'ana'í bits' ą́ąjį' yisdádoohkah.

¹⁰Áko nihił dahózhǫ́ bijį́ áádóó dahodíínóhsingo áłah náhdleeh bá nídahoot'aah góne' índa dah néitį́į́h góne' didlidgo nááhidoonihii áádóó hózhǫ́ǫ́jí nááhániihii náádahołniihgo ałdó' éí dilní bá nídoołts'į́įh doo; díí éí nihiDiyin God binááł bee nihééhániihii át'ée doo; jó, shí Bóhólníihii nihiDiyin God nishłį́.

¹¹Naaki nááhai góne' naaki nídízííd binih naadiin jį́į́ góne' níbaal bii' hodílzinii, éí neeznáago bik'eh ó'oo'níiłii bee bééhániihii bii' sinilii, bikáá'dóó k'os dah diilzhóód.

¹²Áádóó Ízrel dine'é éí Sáínai honoojíídóó dah dadiiná, áko éí Péíran honoojíigi k'os niildoh.

¹³Díí índída nihidadziiznáago Bóhólníihii éí Mózes yich'į' yee haadzí'ígíí bik'ehgo dashdiiná.

¹⁴Júdah dine'é daníjaa'go bidah na'at'a'í yik'ehgo alą́ąjį' dah diiná; díí dah oonéłígíí éí Amínadab biye' Náshan á sizį́.

¹⁵Áádóó Ísakar dine'é dah yinéłígíí éí Zú'er biye' Niithániyel á sizį́.

¹⁶Áádóó Zébyulan dine'é dah yinéłígíí éí Híílan biye' Iiláíyab á sizį́.

¹⁷Áko níbaal bii' hodílzinii ni'diit'ą́ągo éí Gérshan áádóó Miirárai biye'ké éí níbaal bii' hodílzinii deíyeehgo dah diiná.

¹⁸Áádóó Rúben dine'é daníjaa'go bidah na'at'a'í yik'ehgo dah diiná; díí dah oonéłígíí éí Shédiyer biye' Iiláízer á sizį́.

¹⁹Índa Símiyan dine'é dah yinéłígíí éí Zúrishádai biye' Shiilúmiyel á sizį́.

²⁰Áádóó Géed dine'é dah yinéłígíí éí Dúwel biye' Iiláíyasaf á sizį́.

²¹Índa Kóhath dine'é éí níbaal bii' hodílzinii góne' dadílzingo chodao'íinii deíjáahgo nihidahaazná, áko t'ah doo jínééhgóó haba' níbaal bii' hodílzinii nideiz'ą́.

²²Áádóó Íífreiyim dine'é daníjaa'go bidah na'at'a'í yik'ehgo dah diiná; díí dah oonéłígíí éí Amáíhad biye' Iilíshama á sizį́.

²³Índa Manáseh dine'é dah yinéłígíí éí Piidázer biye' Gaméíliyel á sizį́.

²⁴Áádóó Bénjamin dine'é dah yinéłígíí éí Gídiyónai biye' Abáídan á sizį́.

²⁵Áádóó Dan dine'é daníjaa'go bidah na'at'a'í yik'ehgo éí akéédę́ę́' aa ádahalyą́ą doo biniyé dah diiná: díí dah oonéłígíí éí Amishádai biye' Eihaiyíízer á sizį́.

²⁶Áádóó Ásher dine'é dah yinéłígíí éí Ákran biye' Péígiyel á sizį́.

²⁷Índa Náftalai dine'é dah yinéłígíí éí Íínan biye' Aháíra á sizį́.

²⁸Kót'éego Ízrel dine'é dah deínéehii ahíłkéé' deínééh.

²⁹Áko Mózes yaadaaní nilíní, Mídiya dine'é nilíinii Rúwel biye' Hóbab ííłní, Bóhólníihii, Kéyah nihaa dideesh'ááł, nihidííniidígóó yii'nééł; hágo tį', áko yá'át'éhígi ádaniil'į́į doo, háálá Bóhólníihii éí yá'ádaat'éehii Ízrel dine'é yeididoo'áałgo yee nihoní'ą́.

³⁰Nít'éé' Hóbab áháłní, Doo nihił déshkai da; t'áá shí shikéyahgóó áádóó shik'éí bich'į' nihéédeeshdááł.

³¹Áádóó Mózes ání, Baa nánooshkąąh, doo nihits'ą́ą́' nihidíínáał da, háálá ni t'éí ééhonísin; honoojítahgi yii'néełgo nihá hwííní'į́įgo nihíí'ish doo.

³²Áko nihił dínínáá ládą́ą́' yá'ádaat'éehii Bóhólníihii nihá áyoolííł dooleełígíí t'áá ákót'éego nihí ałdó' nich'į' t'áá ákódeii'níił doo.

³³Áádóó Bóhólníihii bidziłdóó dashdiináago tágí jį́ joonééł; há dazdéez'į́į'go Bóhólníihii bitsits'aa' dílzinii éí bee aha'deet'áanii bii' sinilii halą́ąjį' yit'áałgo tágí jį́ joonééł, áko haa'ída nidahizhdoonéełgi baa nidazh'nitá.

³⁴Áko Bóhólníihii bits'ą́ą́dóó k'os hakáa'gi jį́įgo nihináldohgo dah nízhdii'nééh.

³⁵Nít'éé' tsits'aa' dílzinii niheet'áahgo Mózes ániih, Bóhólníihii díldzíiłgo háni'dii ni'ana'í danilíinii tanánoołka' doo; háni'dii nik'ee nidanichée doo.

³⁶Áádóó hasht'e'niit'áahgo Mózes ániih, Bóhólníihii nílíinii, Ízrel dine'é t'óó ahayóí miilgo ánéelą́'ígíí bił nááhonídlǫ́ǫ le'.