Read Navajo NUMBERS 16 Bible Online

NUMBERS 16 - Navajo bible

NUMBERS 16

¹Nít'éé' Líívai biye' Kóhath, éí biye' Ízxar, éí biye' Kórah wolyéego Déíthan áádóó Abáíram índa Án ahíjii'eezh. (Déíthan áádóó Abáíram éí Iiláíyab biye'ké nilį́ áádóó Án éí Pííleth biye' nilį́; éí t'áá ałtso Rúben dine'é danilį́.)

²Éí Mózes bidááhdóó Ízrel dine'é yił nídahidiikaigo naakidi neeznádiindóó ba'aan ashdladiingo naat'áanii ánéelą́ą́'; dah deínéehii béédaho'dílzinii yił ałtah ahiisdláá'.

³Áko áłah áda'diilyaago Mózes áádóó Éran yik'ijį' danilį́įgo ádeiłní, Nihí t'áá íiyisí ádíhwíínółnííh, háálá oonéłígíí t'áá ałtso dadiyin áádóó bitahgi Bóhólníihii hólǫ́, ákoshą' ha'át'íí biniyé Bóhólníihii bidine'é dah yinéłígíí bilááh ánóht'éego í'doołyaa?

⁴Áko Mózes éí yidiizts'ą́ą'go ni'jį' tsé'yaa neeshjool,

⁵áádóó Kórah índa yił dah yikahígíí ábijiní, Yiską́ągo t'ah abínídą́ą́' Bóhólníihii háí bíí' jílį́įgo áádóó jidiyingo ííshjání áhodoolííł, índa ádíighahjį' nihodoolóós; éí néidiiłtíinii ádíighahjį' niidoolóós.

⁶Kót'éego áda'doohłííł; Kórah áádóó nił dah yikahígíí t'áá ałtso éí tsin bijeeh dilidgo łikání halchinii bee naakáhí nídahididoohnił;

⁷éí kǫ' biih dahidoohkááł áádóó yiską́ągo Bóhólníihii binááł tsin bijeeh dilidgo łikání halchinii bik'i yadeidoohjih, áko Bóhólníihii náhodiiłtíinii bidiyį́į́' jílį́į doo; Líívai dine'é nohłíinii, ayóogo ádídahwíínółnííh.

⁸Áko Mózes éí Kórah ííłní, Da'íísółts'ą́ą́', baa nánihooshkąąh, Líívai dine'é nohłíinii, da'íísółts'ą́ą́'.

⁹Díísh doo ílį́įgo baa nitsídaahkees da? Ízrel dine'é biDiyin God éí Ízrel dine'é dah yinéełgo yits'ánihinínilii t'áá bí áháníjį' ádích'į' ninihii'éshígíí Bóhólníihii biníbaal bii' hodílzin góne' nidaałnish doo índa dah oonéłígíí binááł nidaał'a' doo biniyé nánihidiinil.

¹⁰Jó, nihí índa danihik'is Líívai dine'é danilíinii t'áá ałtso t'áá nihił áháníjį' ádích'į' kónihiilaa. Da' ákoósh nihí náá'iiłniihii ałdó' dadoohłeełgo hádaaht'į́?

¹¹Áko ni áádóó nił dah yikahígíí t'áá ałtso bił Bóhólníihii bik'ijį' danohłį́įgo áłah í'doołyaa. Áádóó Éranshą' éí ha'át'íí nilį́įgo bich'į' saad dahonohłǫ́?

¹²Áko Mózes éí Iiláíyab biye'ké Déíthan áádóó Abáíram hágo yididooniił biniyé yíká i'ííł'a'; nít'éé' ábi'doo'niid, Doo akǫ́ǫ́ diit'ash da.

¹³Díísh t'įįhdígo át'é nínízin? Kéyah yá'áhoot'éehgi abe' índa tsés'ná bitł'izh bee áda'azįįdgo haz'ą́ą́dę́ę́' ch'ínihííní'eezhgo honoojíidi nanihidííłtsiłgo ánít'į́. T'áá hazhó'ó t'áá ni t'éí nihinanít'áago ádi'nilyaa.

¹⁴Áádóó ałdó' kéyah yá'áhoot'éehgi abe' índa tsés'ná bitł'izh bee áda'azįįdgo haz'ą́ąjį' t'ah doo anihí'éesh da, doodaii' dá'ák'eh índa ch'il na'atł'o'ii nihíí' dadooleełígíí t'ah doo nihaa diní'aah da. Da' díísh diné bináá' hahidíínił? Nihí doo akǫ́ǫ́ diit'ash da.

¹⁵Áko Mózes t'áá íiyisí báhóóchįįdgo Bóhólníihii ííłní, Bináádahaniihii t'áadoo nił nilíní; dabitélii t'ááłá'í nidi doo bighanishtį́į da, doo nidi ła'da atíhooshłaa da.

¹⁶Áádóó Mózes éí Kórah ííłní, Ni áádóó nił dah yikahígíí t'áá ałtso Éran bił yiską́ągo Bóhólníihii bidááhdóó nidoohkah;

¹⁷bíni'dii diné łá'í nízínígo tsin bijeeh dilidgo łikání halchinii bee naakáhí nídeididooniłgo tsin bijeeh dilidgo łikání halchinii yiih deidoojih; Bóhólníihii binááł łá'í nootínígo tsin bijeeh bee naakáhí nidahidoohjih; naakidi neeznádiindóó ba'aan ashdladiingo bee nida'ohkáa doo; ni áádóó Éran ałdó' nidinołt'éego t'áá ał'ąą tsin bijeeh dilidgo łikání halchinii bee naakáhí doohjih.

¹⁸Áko diné łá'í nízínígo tsin bijeeh dilidgo łikání halchinii bee nidaakáhígíí nídeidiinilgo kǫ' yiih deizką́ągo bikáa'jį' tsin bijeeh dilidgo łikání halchinii yadayiijaa', áádóó níbaal bii' dahozdísinii yah e'etiinídóó Mózes áádóó Éran yił deizį'.

¹⁹Nít'éé' Kórah éí t'áá dah oonééł nít'éé' áłah áyiilaago níbaal bii' dahozdísinii yah e'etiiní bidááhdóó Kórah éí Mózes áádóó Éran yik'ijį' danilį́įgo nidaazį'; Bóhólníihii bits'ádi'nílíidii éí dah oonéłígíí t'áá ałtso bich'į' yit'íní silį́į́'.

²⁰Áádóó Bóhólníihii éí Mózes áádóó Éran ííłní,

²¹Díí dah oonéłígíí bits'ánóh'aash, áko t'óó hodíínáá'ígo áhodeeshdįįł.

²²Áko tsé'yaa jineeshjoolgo ájíní, Diyin God nílíinii, ats'íís dabiníłch'i t'áá ałtso biDiyin God nílíinii, diné t'ááłá'í ádił asiih; ákoósh dah oonéłígíí t'áá ałtso bich'į' náhóóchįįd?

²³Áádóó Bóhólníihii éí Mózes yich'į' haadzíi'go ííłní,

²⁴Dah oonéłígíí ábidiní, Kórah, Déíthan índa Abáíram dabiníbaal naaznilídóó nahgóó oohjeeh.

²⁵Nít'éé' Mózes nídii'na'go Déíthan áádóó Abáíram yich'į' níyá áádóó Ízrel dine'é badahastóí hakéé' yíkai.

²⁶Ákohgo dah oonéłígíí áyidííniid, Baa nídanihooshkąąh, díí diné doo yá'ádaashóonii dabiníbaalídóó nahgóó oohjeeh, índa daabíhígíí t'ááká ła' daosił lágo, doodaii' éí ádił da'asiihígíí t'áá át'é t'áá bił ádoohdįįł.

²⁷Áko Kórah, Déíthan índa Abáíram dabiníbaalídóó t'áá da'níłts'ą́ąjigo bits'ájiizhjéé', áko Déíthan áádóó Abáíram ch'íní'áazhgo biníbaal bich'éédą́ą́'dóó bizáanii, dabiye'ké índa ba'áłchíní yił deizį'.

²⁸Áádóó Mózes ání, Díí bee nihił béédahózin doo; naanish t'áá át'é ááshłíił doo biniyé Bóhólníihii shiníł'a' áádóó doo t'áá shí shíniik'eh ááshníił da.

²⁹Díí diné jidínóonéłígíí diné t'áá ałtso daninéhígi át'éego, doodaii' atíbidi'doolníłígíí diné t'áá ałtso atídabidi'doolníłígi át'éego ákóhodooníiłgo éí doo Bóhólníihii shiníł'a' da.

³⁰Nidi Bóhólníihii t'áadoo le'é ániidí ííléehgo ni' ąą ádzaago abiisna'go, dabinaalye'é t'áá át'é t'áá bił áádóó t'áá dahináago ni' ąą ádzaa góyaa daazlį́į'go índa díí diné éí Bóhólníihii bá dahojííłchįįdígíí bik'idadi'doohtį́į́ł.

³¹Ałtso saad bee niyázhníłti'go t'áá naazínígóó biyaagi ni' ałts'áádláád,

³²áádóó ni' ąą ádzaago ha'áłchíní t'áá bił, Kórah yidiikaii yę́ę t'áá ałtso índa hwee dahólónígíí t'áá át'é ałdó' t'áá bił ni' abiisna'.

³³Hó áádóó t'áá át'é bídazhdéét'i'ígíí t'áá dajiináago ni' ąą ádzaa góyaa azhníídee'go hak'ijį' ni' ałch'į' ánádzaa, áko dah oonéłígíí bits'ą́ą́' ałtso diné neezná.

³⁴Áko binaagóó Ízrel dine'é t'áá ałtso haal'áhígíí éí hadazhdeeshghaazhgo hak'ee dah diijée'go ádaaní, Nihí éí ni' doo adanihidoołnah da.

³⁵Áádóó Bóhólníihii bits'ą́ą́dę́ę́' kǫ' bidadíínáadgo naakidi neeznádiindóó ba'aan ashdladiin diné, tsin bijeeh dilidgo łikání halchinii náádayiisnii'ígíí íísdįįd.

³⁶Ákohgo Bóhólníihii éí Mózes yich'į' haadzíi'go ání,

³⁷Náá'iiłniihii Éran biye' Eliyéízar bich'į' handziih, Tsin bijeeh dilidgo łikání halchinii bee nidaakáhígíí néididooniłgo kǫ' da'níłts'ą́ą'jį' níléígóó iidiyoołkał, háálá tsin bijeeh dilidgo łikání halchinii bee nidaakáhígíí dílzin.

³⁸Díí diné ádił da'asiihgo t'áá bí yá nináninídee'; bíni'dii tsin bijeeh dilidgo łikání halchinii bee nidaakáhígíí éí dootsiłgo niteelgo ádadoolníiłgo didlidgo bikáá' náá'iiniihí bik'ínáltihígíí ádoolnííł, háálá Bóhólníihii binááł bee nááda'iiniihgo chodao'į́į́ nít'éé'; éí bąą dadílzin; éí Ízrel dine'é bich'į'go bee ééhózinii át'ée doo.

³⁹Náá'iiłniihii Eliyéízar éí díí diné daneeznánígíí béésh łitsoii bee tsin bijeeh dilidgo łikání halchinii nideikáago yee náádayiiłniih nít'é'ígíí néidiinil, áádóó éí ał'ąą yída'dees'ne'go bikáá' náá'iiniihí yik'i ninádei'niłgo ádayiilaa.

⁴⁰Díí Ízrel dine'é bich'į' bee ééhániihii át'ée doo, áko diné ła' doo Éran biye'ké náás ahoolchíiłii jílį́į́góó Bóhólníihii binááł tsin bijeeh dilidgo łikání halchinii nááhizhdoołnih biniyé doo áháníjį' nizhdoogáał da; éí doo Kórah áádóó bił dah yikah yę́ę ádabi'diilyaaígi doo áhodi'doolníił da. Díí éí Mózes binahjį' Bóhólníihii hach'į' haadzíí'.

⁴¹Nidi biiskání Ízrel dine'é dah yinéłígíí t'áá ałtso Mózes áádóó Éran yich'į' saad dahasłį́į'go ádaaní, Bóhólníihii bidine'é nisoołtseed.

⁴²Ákohgo dah oonéłígíí ahíikaigo Mózes áádóó Éran yik'ijį' daazlį́į'go níbaal bii' dahozdísinii deiníł'į́į́ nít'éé'; jó, k'os bik'iildoh lá, áko Bóhólníihii bits'ádi'nílíidii yit'íní silį́į́'.

⁴³Áko Mózes áádóó Éran éí níbaal bii' dahozdísinii bidááhdę́ę'go niní'áázh.

⁴⁴Áko Bóhólníihii éí Mózes yich'į' haadzíi'go ání,

⁴⁵Díí dah oonéłígíí bitahdę́ę́' bits'ánóh'aash, áko t'óó hodíínáá'ígo áhodeeshdįįł. Áko Mózes áádóó Éran tsé'yaa jineeshjool.

⁴⁶Ákohgo Mózes éí Éran ííłní, Tsin bijeeh dilidgo likání halchinii bee naakáhí ła' nídii'aahgo bikáá' náá'iiniihí bikáá'dę́ę́' kǫ' ła' biih nijáahgo bikáa'gi tsin bijeeh dilidgo łikání halchinii yaajáahgo oonéłígíí bich'į' tsxį́įłgo bił dílyeedgo bee á k'ééhoodǫǫłii bá ánílééh, háálá Bóhólníihii bits'ą́ą́dę́ę́' atí'él'į́ naałniih hááłnii'.

⁴⁷Áko Éran éí Mózes áhodííniidígi ádziidzaa; tsin bijeeh dilidgo łikání halchinii diltłi'go nízhdiiką́ągo dah oonéłígíí bitah góne' bił nízhdiilwod; jó, diné bitahgi naałniih hááłnii' lá, áko tsin bijeeh dilidgo łikání halchinii jidiiłtłah áádóó bee á k'ééhoodǫǫłii diné bá náádziisnii'.

⁴⁸Ákohgo daneeznánígíí áádóó dahinánígíí bita'gi dzizį́, áko naałniih ánáhodiilzee'.

⁴⁹Áko naałniih dahóóghą́'ígíí éí dį́į́'ts'áadahdi mííldóó ba'aan tsosts'idi neeznádiin ázhnéelą́ą́'; Kórah bił ałch'odadzisne'go ádzísdįįdígíí bilááh ázhnéelą́ą́'.

⁵⁰Áádóó Éran éí níbaal bii' dahozdísinii bich'éédą́ą'gi Mózes baa nídzídzá, áko naałniih ánásdįįd.