Read Navajo NUMBERS 17 Bible Online

NUMBERS 17 - Navajo bible

NUMBERS 17

¹Áko Bóhólníihii éí Mózes yich'į' haadzíi'go ííłní,

²Ízrel dine'é bich'į' handziihgo dabizhé'é yę́ę náás ahoolchíłígíí gish bik'eh nítą́ągo nídidíínił; bá aląąjį' naazíinii t'áá ałtso dabizhé'é yę́ę náás ahoolchíiłii bik'ehgo gish naakits'áadahgo nídidííniłgo dine'é łá'í jinízínígo dahagish bikáa'gi házhi' ádadííliił.

³Áádóó Líívai dine'é bigish bikáa'gi éí Éran bízhi' ádíílííł; Ízrel dine'é dahazhé'é yę́ę náás ahoolchíiłii bá aląąjį' nidzizíinii gish t'ááłá'í hak'eh nítą́ą doo.

⁴Éí níbaal bii' dahozdísingi tsits'aa' dílzinii neeznáago bik'eh ó'oo'níiłii bee bééhániihii bii' sinilii bidááhdóó nihił ahínéishkahígi nidadoohnił.

⁵Ákohgo diné bigish nídideeshtį́łígíí éí ch'ilátah hózhóón bąąh hodooleeł, áádóó Ízrel dine'é nich'į' saad dahółónígíí dabidideeshxił.

⁶Áko Mózes éí Ízrel dine'é yich'į' haadzíí', áádóó aląąjį' nidzizíinii t'áá ádzíłtso dahagish Mózes baa dadziiznil; dahazhé'é yę́ę náás ahoolchíiłii bik'ehgo aląąjį' nidzizíinii gish t'ááłá'í hak'eh nítą́, áko gish naakits'áadahgo Éran bigish éí dahagish bitah sitą́.

⁷Áádóó Mózes éí níbaal bii' hodílzinii bii' neeznáago bik'eh ó'oo'níiłii bee bééhániihii si'ánígi Bóhólníihii bidááhdóó gish niinínil.

⁸Áko biiskání Mózes éí níbaal bii' hodílzinii bii' neeznáago bik'eh ó'oo'níiłii bee bééhániihii si'ání góne' yah ajííyáá nít'éé'; jó, Éran bigish éí Líívai dine'é bá sitánígíí bąąh hada'neesą́ągo bílátah da'iigaigo bąąh bineest'ą' álman wolyéhígíí dadínéesą́ą́ lá.

⁹Ákohgo Mózes éí Bóhólníihii bits'ą́ą́dóó gish t'áá át'é Ízrel dine'é yich'į' ch'íiníjaa', áko deinééł'į́į'go diné łá'í nízínígo dabigish nídeidiyiitą́.

¹⁰Áádóó Bóhólníihii éí Mózes ííłní, Éran bigish éí tsits'aa' dílzinii neeznáago bik'eh ó'oo'níiłii bee bééhániihii bii' sinilii bidááhdóó ninánítį́į́h; éí bá bee ééhózinii át'éego hasht'e'sitą́ą doo, áádóó shich'į' saad dahółónígíí dabididííłhił, áko doo dadínóonéeł da.

¹¹Áádóó Mózes ákódziidzaa; Bóhólníihii hach'į' yee haadzí'ígíí bik'ehgo ádziidzaa.

¹²Ízrel dine'é éí Mózes yich'į' hadaasdzíi'go ádeiłní, Jó, danii'né, ánihi'niidįįd; t'áá áníiltso ánihi'niidįįd.

¹³T'áá ałtso Bóhólníihii biníbaal bii' hodílzinii bit'áahjį' nehekáhígíí daniné. T'áásh áníiltso dadíníi'nééł lá?