Read Navajo NUMBERS 18 Bible Online

NUMBERS 18 - Navajo bible

NUMBERS 18

¹Áko Bóhólníihii éí Éran áyidííniid, Níbaal bii' hodílzingi nahadláhígíí bik'ijį' doo ákwii ádaał'į́į́góó éí ni áádóó niye'ké áádóó nizhé'é yę́ę bits'ą́ą́dóó náás ahoolchíiłii bił bá nináhinohdéeh doo, áádóó ni áádóó niye'ké biłgo éí náá'iiłniihii danohłį́įgo doo ákwii ádaaht'į́į́góó bá nináhinohdéeh doo.

²Áádóó nik'isóó Líívai dine'é danilíinii éí nizhé'é yę́ę bidine'é bits'ą́ą́dóó danilį́įgo bił nídííkah, áko éí nihíká anájahgo ni áádóó niye'ké biłgo níbaal bii' hodílzinii bii' neeznáago bik'eh ó'oo'níi łii bee bééhániihii si'ání góne' nihá nidaal'a' doo.

³Áko bee nihídahólníihii éí yaa ádahalyą́ą doo, índa níbaal bii' hodílzinii t'áá át'é yaa ádahalyą́ą doo, nidi łeets'aa' chodao'íinii dadílzinígíí áádóó bikáá' náá'iiniihí éí doo yit'áahjį' nidaakai da doo, ákót'éego éí bí índa nihí ałdó' doo bił dadínóohnéeł da.

⁴Ákohgo nihíká anídaajahgo níbaal bii' dahozdísinii yaa ádahalyą́ą doo; níbaal bii' hodílzinii bina'anishgi t'áá át'é yindaal'a' doo; doo Líívai dine'é nilíinii doo ła' nihit'áahjį' nidaakai da doo.

⁵Áádóó nihí éí hodiyingo haz'ánígi áádóó bikáá' náá'iiniihí baa ádahołyą́ą doo, ákohgo Ízrel dine'é t'óó báhádzidgo bee atí'él'íinii doo bik'i nááhwiidoodleeł da.

⁶Shoo, shí éí Ízrel dine'é bitahdę́ę́' nihik'isóó Líívai dine'é nídiinil; Bóhólníihii bá aa yílyáii át'éego nihaa diní'ą́, áko níbaal bii' dahozdísinii yindaal'a' doo.

⁷Éí bąą ni áádóó niye'ké bił náá'iiłniihii danohłį́į́jí nihindaanishígíí bikáá' náá'iiniihí binaagi t'áá át'é báhígíí índa dáádiníbaal bine'jíígíí baa ádahołyą́ą doo; díí nihindaanish át'ée doo; náá'iiłniihii dadoohłeeł biniyé naanish nihaa diní'ą́, áko doo náá'iiłniihii nilíinii éí áajį' niníyáhígíí hodi'yoolyééł.

⁸Áádóó Bóhólníihii éí Éran ííłní, Jó, Ízrel dine'é diyingo shaa nídeidiyii'aahígíí bits'ą́ą́dóó bił dah nídi'diilnihgo náádahaniihii t'áá át'é ałdó' níí' át'é; éí ni'doolzį́'ígíí bąą naa diní'ą́, áádóó hool'áágóó bik'eh hoogáałii át'éego niye'ké bił nihaa diní'ą́.

⁹Áko aláahgo diyingo náádahizhdoołnihii doo doodlidígíí éí ła' ni'ą́ą́hálzįįh: ak'áán náádahizhdoołnihii, ádił oodzíí'jí náádahizhdoołnihii áádóó doo ákǫ́ǫ́ ájíít'įįdjí náádahizhdoołnihii éí t'áá át'é shich'į' náádahizhdoołnihgo éí ni índa niye'ké bił aláahgo nihá dílzin doo.

¹⁰Áádóó éí aláahgo hodiyingo haz'ą́ągi nídaahdį́įh doo; diné nohłíinii t'áá ánółtso díí nídaahdį́įh doo; éí nihá dílzingo át'ée doo.

¹¹Díí éí níí' dooleeł: Ízrel dine'é aa deidiyii'aahii, t'áá éí bił dah nídi'diilnihgo nááhániihii, niye'ké índa nitsi'ké bił nihaa diní'ą́; éí ahóyéel'áágóó bee nihoní'áanii át'é; nighandóó t'áá ałtso ádąąh dah haldeehígíí t'éí deiyą́ą doo.

¹²Áádóó ak'ah áádóó wáin índa tł'oh naadą́ą́' t'áá át'é agháago yá'át'éehii éí áłtsé daneest'áanii át'éego Bóhólníihii yaa nídeidiyii'aahígíí nihaa diní'ą́.

¹³Kéyah bikáa'gi t'áá ha'át'íhída átsé nídant'į́hígíí Bóhólníihii yaa nídeidiyii'aah dooígíí éí naa diní'ą́; nighandóó t'áá ałtso ádąąh dah haldéhígíí t'éí deiyą́ą doo.

¹⁴Ízrel dine'é bitahgi dílzingo nidahideest'áanii t'áá ałtso níí' dooleeł.

¹⁵Áádóó alą́ąjį' nidahachíhígíí t'áá ałtso éí diné, doodaii' naaldlooshii éí Bóhólníihii baa náhidit'aahígíí ni doo, nidi diné alą́ąjį' nidahachíhígíí t'ą́ą́' nááhidííłnih; naaldlooshii doo daadáanii áłtsé nidahachíhígíí t'ą́ą́' nááhidííłnih.

¹⁶Índa t'ą́ą́' náádahidoonihii éí t'ááłá'í bee nídeezidígíí t'ą́ą́' nááhidííłnih; bą́ą́h aníłínígíí bik'ehgo béésh łigaii ashdla' shékel wolyéii hodiyingo haz'ą́ą́ góne' choo'íinii bik'ehgo t'ą́ą́' nááhidííłnih; shékel wolyéii naadiin gíírah bą́ą́h ílį́ bíighah.

¹⁷Nidi béégashii, doodaii' dibé, doodaii' tł'ízí áłtsé nidahachíhígíí éí doo t'ą́ą́' nááhidííłnih da, háálá éí dadílzin; éí dabidiłígíí bikáá' náá'iiniihí bik'ídííłtah, índa dabik'ah didííłił; éí Bóhólníihii bich'į' łikání halchinii didlidgo nááhániihii át'ée dooleeł.

¹⁸Áko dabitsį'ígíí éí nihíí' nidahaleeh doo; ajéíts'iin náásee bi ł nídi'dilnihígíí áádóó ajáád nish'náájíígíí nihíí' neheleehígi át'éego nihíí' doo.

¹⁹Bił dah nídi'diilnihgo náádahaniihii dílzinígíí t'áá át'é éí Ízrel dine'é Bóhólníihii yaa deidiyii'aahígíí niye'ké índa nitsi'ké bił nihaa diní'ą́; éí ahóyéel'áágóó bee nihoní'áanii át'é; áshįįh bee aha'deet'áanii ahóyéel'áágóó Bóhólníihii binááł ni áádóó na'áłchíní náás ahoolchíiłii nihich'į' bee nihodiní'ą́.

²⁰Áko Bóhólníihii éí Éran ííłní, Dabikéyah doo ła' nihíí' da doo, doodaii' bitahdóóígíí doo ła' nihíí' da doo, Ízrel dine'é bitahgi shí nihíí' nishłį́.

²¹Áádóó Ízrel dine'é ninádeidiyii'aahii t'áá át'é neeznáá daníjaa'ígíí éí t'ááłá'ígo shijaa' Líívai dine'é daabíí' dooleełgo baa diní'ą́; jó, éí yikiin níbaal bii' dahozdísinii yindaal'a'go nidaalnish.

²²Áádóó Ízrel dine'é níbaal bii' dahozdísinii yíighahjį' ts'ídá doo nidaakai da doo, ákódaadzaago ádił da'doolzihgo dadínóonééł.

²³Nidi Líívai dine'é t'éiyá níbaal bii' dahozdísinii yindaal'a' doo, áádóó doo ákwii ádahat'íinii yá nandeeh doo; díí nihá bee nihoní'ą́ągo ahóyéel'áago náás da'ahíínółchíih doo, áko Ízrel dine'é bitahdóó bíí' ninádahadleeh dooleełii ádin doo.

²⁴Nidi Ízrel dine'é éí neeznáá daníjaa'ígíí éí t'ááłá'ígo shijaa' Bóhólníihii yaa nídeidiyii'aahígíí Bóhólníihii bich'į' bił dah nídi'diilnihgo náádahaniihii Líívai dine'é daabíí' dooleełgo baa diní'ą́; éí bąą ábidííniid, Ízrel dine'é bitahdóó danihíí' dooleełii ádin doo.

²⁵Áádóó Bóhólníihii éí Mózes yich'į' haadzíi'go ání,

²⁶Kót'éego Líívai dine'é bich'į' handziihgo ábidiní, Ízrel dine'é éí Bóhólníihii yaa nídeidiyii'aahii danihíí' dooleełgo nihaa diní'ánígíí éí bits'ą́ą́dóó neeznáá daníjaa'ígíí éí t'ááłá'ígo shijaa' Bóhólníihii bich'į' bił dah nídi'diilnihgo nááhániihii Bóhólníihii baa dahidoh'aah doo.

²⁷Áko díí bił dah nídi'diilnihgo náádahoołnii'ígíí t'áá haná'ál'isídę́'ígi át'éego áádóó t'áá ch'il na'atł'o'ii bitoo' ál'į́į́dę́'ígi át'éego nihá bił ólta' doo.

²⁸Kót'éego Ízrel dine'é nihaa nídeidiyii'aahígíí éí nihí neheleehígíí t'áá át'é ła' át'éego Bóhólníihii bich'į' bił dah nídi'diilnihgo nááhániihii át'éego náá'iiłniihii Éran baa dahohjáah doo.

²⁹Nihaa dadeest'áanii t'áá át'é bits'ą́ą́dóó Bóhólníihii bich'į' bił dah nídi'diilnihgo náádahaniihii náádahołniih doo; éí dadílyinii agháadi yá'ádaat'éehii t'áá át'é náádahołniih doo.

³⁰Éí bąą ábididííniił, Agháadi yá'ádaat'éehii bił dah nídi'diilnihgo náádahoołnii'go, áko índa nihí Líívai dine'é danohłíinii ch'ínííłna'ígíí nihíí' dooleełgo bee nihaa nitsáhákees doo; éí t'áá haná'ál'isídę́ę́'ígi át'éego áádóó t'áá ch'il na'atł'o'ii bitoo' ál'į́į́dę́ę́'ígi át'éego bee nihaa nitsáhákees doo.

³¹Áko nihí áádóó niha'áłchíní bił t'áá nihí danohsinígi nídaohdį́įh doo, háálá níbaal bii' dahozdísinii bindaał'a'ígíí bideená nihaa deet'áanii át'é.

³²Áádóó agháadi yá'ádaat'éehii bił dah nídi'diilnihgo náádahoołnii'go ádił oodzíí' doo bee ádidahodidoołt'ih da, nidi Ízrel dine'é bits'ą́ą́dóó dílzingo aa dahidit'aahígíí doo dadoołchxǫǫł da, doodaii' daołchxǫ'go dadínóohnééł.