Read Navajo NUMBERS 2 Bible Online

NUMBERS 2 - Navajo bible

NUMBERS 2

¹Bóhólníihii éí Mózes áádóó Éran yich'į' haadzíi'go ání,

²Diné t'ááłá'í jinítínígo Ízrel dine'é dajílínígíí t'áá hó hadah na'at'a'í bíighahgi dahazhé'é yę́ę ba'áłchíní bił bidah na'at'a'í bíighahgi ninádaji'néeh doo; níbaal bii' dahozdísinii binaadi ninádaji'néeh doo.

³Ha'a'aahjí háá'át'ááh bich'į'go éí Júdah bisiláo deínéehii bik'ehgo t'áá bí bidah na'at'a'í yíighahgi ninádaa'néeh doo; Amínadab biye' Náshan éí Júdah dine'é yinanit'a'í nilį́.

⁴Júdah bisiláo dah yinéełii dayéélta'ígíí tsosts'idiindóó ba'aan dį́įdi mííldóó ba'aan hastą́ądi neeznádiingo ánéelą́ą́'.

⁵Áádóó bíighah góne' Ísakar dine'é niná'néeh doo; Zú'er biye' Niithániyel éí Ísakar dine'é yinanit'a'í nilį́.

⁶Ísakar bisiláo dah yinéełii dayéélta'ígíí ashdladiindóó ba'aan dį́įdi mííldóó ba'aan dį́įdi neeznádiingo ánéelą́ą́'.

⁷Éí bíighah góne' Zébyulan dine'é niná'néeh doo; Híílan biye' Iiláíyab éí Zébyulan dine'é yinanit'a'í nilį́.

⁸Zébyulan bisiláo dah yinéełii dayéélta'ígíí ashdladiindóó ba'aan tsosts'idi mííldóó ba'aan dį́įdi neeznádiingo ánéelą́ą́'.

⁹Díí t'áá ałtso Júdah bisiláo deínéehii bik'ehgo dabi'déélta'ígíí t'ááłáhídi neeznádiindóó ba'aan tseebídiindóó ba'aan hastą́ądi mííldóó ba'aan dį́įdi neeznádiingo ánéelą́ą́'. Díí éí alą́ąjį' yinéeł doo.

¹⁰Áádóó shádi'ááhjígo éí Rúben bisiláo deínéehii bik'ehgo t'áá bí bidah na'at'a'í yíighahgi ninádaa'néeh doo; Shédiyer biye' Iiláízer éí Rúben dine'é yinanit'a'í nilį́.

¹¹Rúben bisiláo dah yinéełii dayéélta'ígíí dízdiindóó ba'aan hastą́ądi mííldóó ba'aan ashdladi neeznádiingo ánéelą́ą́'.

¹²Éí bíighah góne' Símiyan dine'é niná'néeh doo; Zúrishádai biye' Shiilúmiyel éí Símiyan dine'é yinanit'a'í nilį́.

¹³Símiyan bisiláo dah yinéełii dayéélta'ígíí ashdladiindóó ba'aan náhást' éidi mííldóó ba'aan táadi neeznádiingo ánéelą́ą́'.

¹⁴Éí bíighah góne' Géed dine'é niná'néeh doo; Rúwel biye' Iiláíyasaf éí Géed dine'é yinanit'a'í nilį́.

¹⁵Géed bisiláo dah yinéełii dayéélta'ígíí dízdiindóó ba'aan ashdladi mííldóó ba'aan hastą́ądi neeznádiindóó ba'aan ashdladiingo ánéelą́ą́'.

¹⁶Díí t'áá ałtso Rúben bisiláo deínéehii bik'ehgo dabi'déélta'ígíí t'ááłáhídi neeznádiindóó ba'aan ashdladiindóó ba'aan t'ááłáhídi mííldóó ba'aan dį́įdi neeznádiindóó ba'aan ashdladiingo ánéelą́ą́'. Éí naaki góne' yinéeł doo.

¹⁷Dah dajínéehgo joonéełii haníi'gi Líívai dine'é éí níbaal bii' dahozdísinii deíyeehgo hoł náás yinéeł doo. Ninádei'áahgo áádóó náádei'dii'áahgo kót'éego t'áá ałkéé' dah dajínéehii t'áá hó hadah na'at'a'í bik'ehgo dah nídazhdii'néeh doo.

¹⁸E'e'aahjígo éí Íífreiyim bisiláo deínéehii bik'ehgo t'áá bí bidah na'at'a'í yíighahgi ninádaa'néeh doo; Amáíhad biye' Iilíshama éí Íífreiyim dine'é yinanit'a'í nilį́.

¹⁹Íífreiyim bisiláo dah yinéełii dayéélta'ígíí dízdiindi mííldóó ba'aan ashdladi neeznádiingo ánéelą́ą́'.

²⁰Éí bíighah góne' Manáseh dine'é niná'néeh doo; Piidázer biye' Gaméíliyel éí Manáseh dine'é yinanit'a'í nilį́.

²¹Manáseh bisiláo dah yinéełii dayéélta'ígíí tádiindóó ba'aan naakidi mííldóó ba'aan naakidi neeznádiingo ánéelą́ą́'.

²²Éí bíighah góne' Bénjamin dine'é niná'néeh doo; Gídiyónai biye' Abáídan éí Bénjamin dine'é yinanit'a'í nilį́.

²³Bénjamin bisiláo dah yinéełii dayéélta'ígíí tádiindóó ba'aan ashdladi mííldóó ba'aan dį́įdi neeznádiingo ánéelą́ą́'.

²⁴Éí t'áá ałtso Íífreiyim bisiláo deínéehii bik'ehgo dabi'déélta'ígíí t'ááłáhídi neeznádiindóó ba'aan tseebíidi mííldóó ba'aan neeznádiingo ánéelą́ą́'. Éí táá' góne' yinéeł doo.

²⁵Náhookǫsjígo éí Dan bisiláo deínéehii bik'ehgo t'áá bí bidah na'at'a'í yíighahgi ninádaa'néeh doo; Amishádai biye' Eihaiyíízer éí Dan dine'é yinanit'a'í nilį́.

²⁶Dan bisiláo dah yinéełii dayéélta'ígíí hastą́diindóó ba'aan naakidi mííldóó ba'aan tsosts'idi neeznádiingo ánéelą́ą́'.

²⁷Éí bíighah góne' Ásher dine'é niná'néeh doo; Ákran biye' Péígiyel éí Ásher dine'é yinanit'a'í nilį́.

²⁸Ásher bisiláo dah yinéełii dayéélta'ígíí dízdiindóó ba'aan t'ááłáhídi mííldóó ba'aan ashdladi neeznádiingo ánéelą́ą́'.

²⁹Éí bíighah góne' Náftalai dine'é niná'néeh doo; Íínan biye' Aháíra éí Náftalai dine'é yinanit'a'í nilį́.

³⁰Náftalai bisiláo dah yinéełii dayéélta'ígíí ashdladiindóó ba'aan táadi mííldóó ba'aan dį́įdi neeznádiingo ánéelą́ą́'.

³¹Éí t'áá ałtso Dan bisiláo deínéehii bik'ehgo dabi'déélta'ígíí t'ááłáhídi neeznádiindóó ba'aan ashdladiindóó ba'aan tsosts'idi mííldóó ba'aan hastą́ądi neeznádiingo ánéelą́ą́'. Díí éí akéédę́ę́' t'áá bí bidah na'at'a'í bik'ehgo yinéeł doo.

³²Díí éí Ízrel dine'é dabizhé'é yę́ę bits'ą́ą́dóó da'ahílchíihii bik'ehgo dabi'déélta'; siláo deínéehii t'áá ałtso dabi'déélta'ígíí hastą́ądi neeznádiindóó ba'aan táadi mííldóó ba'aan ashdladi neeznádiindóó ba'aan ashdladiingo ánéelą́ą́'.

³³Nidi Líívai dine'é éí Ízrel dine'é t'áadoo bił bi'déélta' da; Bóhólníihii éí Mózes yich'į' haadzí'ígi ádaadzaa.

³⁴Ízrel dine'é t'áá ákǫ́ǫ́ ádaadzaago Bóhólníihii éí Mózes yich'į' yee haadzí'ígíí t'áá ałtso yik'eh ádaadzaa; bidah na'at'a'í yíighahgi ninádaa'nééh nít'éé' áádóó ahii' háá'ahiyoolchíiłii t'áá ałtso dabizhé'é yę́ę ba'áłchíní náás ahoolchíiłii bik'ehgo yił nee'ni'jį' dah nídadii'nééh.