Read Navajo NUMBERS 21 Bible Online

NUMBERS 21 - Navajo bible

NUMBERS 21

¹Nít'éé' Kéínandóó aláahgo naat'áanii Éírad wolyéii Kéínan nahós'a'gi shádi'áahjigo kééhat'į́. Ízrel dine'é éí naalchi'í yíkai yę́ędę́ę́' yinéełgo yaa hodiizts'ą́ą́'. Áko Ízrel dine'é yich'į' nídiibaa'go ła' deisná.

²Áko Ízrel dine'é ádee hadaasdzíi'go Bóhólníihii yich'į' ádee hadaasdzí'ígíí ádaaní, Díí dine'é t'áá aaníí nihílák'ee dííní'ą́ągo bikin hadaas'áii ts'ídá ałtso atídadiilnííł.

³Áádóó Bóhólníihii éí Ízrel dine'é yidiizts'ą́ą'go Kéínan dine'é hálák'ee yidíí'ą́ągo bikin hadaas'áii t'áá bił ts'ídá ałtso ádadzisdįįd, áko éí nahós'a'gi Hórmah hoolyée doo, jidííniid.

⁴Áko Dził Hordóó dah náázhdii'náago Íídam kéyah bik'ee'ąą ahéézhdoo'nééł biniyé Tónteel Łichíí' bíighahjígo ch'ízhníná, áko diné yinéłígíí doo asht'é'égóó bąąh nidahwiizkaad.

⁵Ákohgo diné éí Diyin God áádóó Mózes yik'ijį' hadahadziihgo ádaaní, Ha'át'éegoshą' honoojíigi danii'née dooleeł biniyé Ííjip kéyahdę́ę́' ch'ínihííní'eezh? Jó, kwe'é bááh ádin, tó nidi ádin áádóó díí mána yilzhólíii deidą́ągo doo binádadiidzįįd da.

⁶Nít'éé' Bóhólníihii éí tł'iish báádahadzidii diné yitahjį' yi'níłnii'go diné ahidayiishxazh, áko Ízrel dine'é t'óó ahayóí daneezná.

⁷Áádóó diné éí Mózes yaa yíkaigo ádaaní, Ádił da'siilziihéi; Bóhólníihii bik'ijį' áádóó ni nik'ijį' hadahaadzíí' lá; Bóhólníihii nihá néinikąąh, áko díí tł'iish nihits'ą́ąjį' yéé'doołnih. Ákohgo Mózes éí diné yá sodoolzin.

⁸Áko Bóhólníihii éí Mózes ííłní, Tł'iish bááhádzidii béé'díídlíiłgo tsin adíítsihgo bąąh dah hididííłt'eeł, áko tł'iish ahidahwiishxazhígíí t'áá ádzíłtso éí tł'iish béé'ályaago dah hidiilt'e'ígíí bik'i dadzizghalii éí dajiináa doo.

⁹Áádóó Mózes éí béésh łitsoii bee tł' iish béé'jiidlaago tsin adzíítsigo bąąh dah dzistį́; diné t'áá háiida tł'iish bishxashii éí tł'iish dah hidiilt'e'ígíí yik'i níghalii éí hináa doo.

¹⁰Ízrel dine'é dah náádii'náago Óbathgi ninááná'ná.

¹¹Áádóó Óbathdóó náás náádeesnáago Áíjii-ábarim honoojíigi Mó'ab kéyah binaashiijí háá'át'ááhjígo ninááná'ná.

¹²Éí áádóó dah náádii'náago Zííred yíldzisgi níbaal nináádeisnil.

¹³Kodóó dah náádii'náago éí Árnan tooh nílínígíí wónaaníjígo éí Ámor dine'é bikéyah bibąąhdę́ę́' honoojíidi ninááná'ná, háálá Árnan tooh nílínígíí éí Mó'ab dine'é bikéyah áádóó Ámor dine'é bikéyah bita'dę́ę́' ch'ínílį́įgo bee hoodzo.

¹⁴Éí bąą Bóhólníihii ninábah yę́ę bee naaltsoos si'ánígíí biyi' góne' áhá'ní, Tónteel Łichíi'gi áádóó Árnan tooh nílínígi naazbaa';

¹⁵éí Ar kin shijaa' bich'į'go taah daasdzisígóó, éí Mó'ab dine'é bikéyah hoodzo bibąąhgóó naazbaa', ha'ní.

¹⁶Kodóó Ízrel dine'é éí Bíyergóó dah náádii'ná; ákwe'é Bóhólníihii éí Mózes yich'į' tó hahadleeh dooleełígíí yaa yáłti'go ání, Diné áłah ánílééh, áko tó baa dideesh'ááł.

¹⁷Áko Ízrel dine'é díí sin yee dahóótáál, Tó hahadleeh nílíinii, tó haninééh! Tó bich'į' dahohtaał;

¹⁸naat'áanii danilíinii tó yíká ida'iizgeed; diné binanit'a'í danilíinii bigish yee tó yíká nida'azgeed. Áko honoojíídóó Mátanah hoolyéégóó Ízrel dine'é dah náádii'ná;

¹⁹Mátanah hoolyéédóó Nahéíliyel hoolyéejį' nááná'ná, índa Nahéíliyel hoolyéédóó Béímath hoolyéejį' nááná'ná.

²⁰Béímath hoolyéédóó Mó'ab kéyahgi Dził Pízgah bighą́ą'di yíldzisjį' nááná'ná, Dził Pízgah hoolyéédóó Jiisháíman honoojíí góyaa ayoot'į́į́'.

²¹Áko Ízrel dine'é éí Ámor dine'é aláahgo binanit'a'í Sáíhan wolyéii yich'į' ada'as'a'go ádaaní,

²²Nihíni'dii nikéyah góne' ch'ídii'nééł; nidá'ák'eh, doodaii' nich'il na'atł'o'ii bitah góne' éí doo adii'néeł da, áádóó nitóhadahadleehgi nidi nito' doo nits'ą́ą́' dadiidlį́įł da; aláahgo naat'áanii be'atiingóó hadidii'néełgo nił hahoodzooígíí ałtso bii' hadidiikah.

²³Áko Sáíhan bikéyah bił hahoodzo góne' Ízrel dine'é hadidoonéłígíí t'áadoo yadi'ní'ą́ą da, nidi Sáíhan bidine'é t'áá ałtso áłah áyiilaago honoojíígóó Ízrel dine'é yich'į' nídiibaa'; Jéíhazjį' aní'eezhgo Ízrel dine'é yił da'ahoogą́ą́'.

²⁴Ákohgo Ízrel dine'é éí diltłish yee ałtso nidahastseed; Sáíhan bidine'é Árnan tooh nílínídóó Jábak tooh nílíníjį' t'áá Áman dine'é bihoodzooíjį' bikéyah yę́ę hóó' daazlį́į́', háálá Áman dine'é bikéyah bidziilgo bich'ą́ą́h hoodzo.

²⁵Áko Ízrel dine'é díí kin hadaas'á t'áá át'é deisnáago Ámor dine'é bikin hadaas'áá nít'éé' yę́ęgóó t'áá át'é Ízrel dine'é kéédahat'į́; Héshban kin haal'áhígi áádóó binaagóó t'áá át'é kin dah naazhjaa'ígóó kéédahat'į́.

²⁶Jó, Héshban kin haal'áii éí Ámor dine'é aláahgo binanit'a'í Sáíhan wolyéii bikin haal'áá nít' éé'; bí átséédą́ą́' Mó'ab dine'é aláahgo binanit'a'í yił ahóbáahgo hakéyah t'áá át'é Árnan tooh nílíníjį' ałtso haghaiideet'ą́.

²⁷Éí bąą saad bee hódzą́ yee yádaałti'ígíí ádaaní, Hágo Héshban kin haal'áajį' dadohkááh, háni'dii Sáíhan bikin haal'á ánáhódle'go bidziil le';

²⁸jó, Héshban kin haal'áádę́ę'go hodiiltłah; Sáíhan bikin haal'áádę́ę́' kǫ' doonał; éí Mó'ab kéyahgi Ar kin shijaa'ídi índa Árnan tooh nílínígi dah daask'id bighą́ą'di ádaalyaii bee hódahólníhígíí ahodiisk'ą́ą́'.

²⁹Mó'ab dine'é noh łíinii, doo hojooba' ájíníi da! Kíímash yich'į' nahałáhí nohłíinii, dooládó' hojooba' ánihi'diilyaa da; biye'ké nidabidi'nilchée doogo ninéidiní'ą́ índa bitsi'ké yisnááh dadooleełgo Ámor dine'é aláahgo binanit'a'í Sáíhan wolyéii yich'į' ninéidiní'ą́.

³⁰Naa'abídadziyeelt'ohgo bik'eh dadeedlį́į́'; Héshban kin haal'áádóó Dáíban kin haal'áajį' ałtso ádahosiildįįd, áádóó Nófah kin haal'áajį' éí Médiiba kin haal'áii bíighahjį' t'áá át'é doo siláhígóó ádeiilyaa.

³¹Kót'éego Ámor dine'é bikéyahgi Ízrel dine'é kééhat'į́į́ nít'éé'.

³²Áádóó Mózes éí Jéízer kin haal'áii hadoolziłgo ákǫ́ǫ́ i'jííł'a', áko kin dah naazhjaa'ígíí deisná; ákwii Ámor dine'é kéédahat'ínígíí ch' ídeineeskaad.

³³Áádóó dah náádiikaigo Béíshan kéyah bich'į' atiingóó yíkai, áko Béíshan kéyahdóó aláahgo naat'áanii Ag wolyéii bidine'é t'áá ałtso yił hak'ijį' danilį́įgo Édriyai kin haal'áagi hach'į' anaa' daniidzį́į́'.

³⁴Nidi Bóhólníihii éí Mózes ííłní, T'áadoo bik'ee nił yé'í; bidine'é t'áá ałtso índa bikéyah ałdó' t'áá bił nílák'ee hodíí'ą́, áko Ámor dine'é aláahgo binanit'a'í Sáíhan wolyéii Héshban kin haal'áagi kééhat'ínígíí íinilaaígi át'éego hó ałdó' ákóhodíílííł.

³⁵Ízrel dine'é éí Ag wolyéii áádóó haye'ké índa hadine'é ałtso nideistseedgo doo ła' hináágóó ádayiilaa, áko hakéyah bíí' daazlį́į́'.