Read Navajo NUMBERS 23 Bible Online

NUMBERS 23 - Navajo bible

NUMBERS 23

¹Áádóó Béílam éí Béílak ííłní, Kwe'é bikáá' náá'iiniihí tsosts'idgo shá ádíílííł índa béégashii tsosts'idgo áádóó deenásts'aa' tsosts'idgo kwe'é shá hasht'edíílííł.

²Ákohgo Béílam ádííniidígíí bik'ehgo Béílak ádzaa, áádóó Béílak índa Béílam éí dóola yázhí áádóó deenásts'aa' éí bikáá' náá'iiniihí yik'eh nítį́įgo nááyiyiisnii'.

³Áko Béílam éí Béílak ííłní, Didlidgo nááhíłniihígíí bíighahgi sínízį́; shí níláhgóó deeshááł, Bóhólníihii daats'í shaa hodooleeł; t'áá shił ííshją́ą́ áyiilaaígíí bee nił náhodeeshnih. Áko yílk'id góde haayá.

⁴Béílam éí Diyin God baa honíle'go áyidííniid, Bikáá' náá'iiniihí tsosts'idgo hasht'edaashłaa; éí bikáa'gi dóola yázhí áádóó deenásts'aa' náádaháłnii'.

⁵Áádóó Bóhólníihii éí bizaadígíí Béílam yizayííláago ííłní, Béílak bich'į' nídídáahgo kót'éego bich'į' hadíídzih.

⁶Béílam éí Béílak yaa nádzá, áko didlidgo nááhániihígíí yíighahgi sizį́; bí áádóó Mó'ab dine'é binanit'a'í t'áá ałtso yił naazį́.

⁷Áádóó Béílam éí bee ak'idi'dootį́įłii yee haadzíi'go ání, Mó'ab kéyahdóó Béílak aláahgo naat'áanii nilíinii éí Áram kéyah ha'a'aahjí dził naaznildę́ę́' shił nát'áazhgo ání, Hágo, Jéíkab shá bidíníídzįįł; Hágo, Ízrel dine'é binídzin.

⁸Ha'át'éegoshą' hóyée'go bá haasdziih doo, éí Diyin God doo hóyée'go bá haadzíí'góó? Ha'át'éegoshą' hóyée'go bá hadeesdzih, éí Diyin God doo hóyée'go bá haadzíí'góó?

⁹Jó, tsénít'i' bighą́ą́'dóó yish'į́, índa yílk'id bighą́ą́'dóó yish'į́; jó, t'áá sahdii kééhat'į́, áádóó ał'ąą dine'é bitahgóó doo bił ólta' da.

¹⁰Łeezh dibahí doo jóołta' ánéelą́ą'daígi át'éego Jéíkab dine'é doo jóołta' át'ée da. Ízrel dine'é dį́į'go dashijaa'ígíí éí t'ááłá'í shijaa' t'áásh yídóoltah? T'áá ákogi át'éii nilínígíí daaztsánígi át'éego háni'dii dadeestsaał; háni'dii bí át'éé nít'éé' yę́ęgi át'éego shá nihonít'i' doo!

¹¹Áko Béílak éí Béílam ííłní, Haa lá shííníł'įįd? Shą́ą́' shida'ana'í bidíníídzįįł biniyé níká i'ííł'a', nidi shoo, t'óó bik'ijiisínídli'.

¹²Áádóó ábizhdííniid, Jó, Bóhólníihii t'éí yíísínísts'ą́ą'go shich'į' yee hahadziihígíí t'éiyá bee hahasdziih doo.

¹³Áko Béílak áháłní, Hágo, nánooshkąąh, łahdę́ę'go anáádiit'ashgo áádę́ę'go náádínííł'įįł, nidi doo t'áá át'é yidííłtséeł da; t'áá áhánígóóígíí t'éiyá dínííł'įįłgo áádóó shá bidíníídzįįł.

¹⁴Áádóó Dził Pízgah bighą́ą'di Zófim dzígaijį' hoł ní'áazhgo bikáá' náá'iiniihí tsosts'idgo áyiilaago bikáa'gi dóola yázhí áádóó deenásts'aa' bik'eh nítį́įgo nááyiyiisnii'.

¹⁵Béílam éí Béílak ííłní, Kwe'é didlidgo nááhíłniihígíí bíighahgi sínízį́; shí éí níláahdi Bóhólníihii bidááh deeshááł.

¹⁶Áko Bóhólníihii éí Béílam yaa honíle'ii áádóó bizaadígíí Béílam yizayííláago ííłní, Béílak bich'į' nídídáahgo kót'éego bich'į' hadíídzih.

¹⁷Áádóó Béílak baa nídzídzáago, shoo, didlidgo nááyiyiiłniihígíí yíighahgi Mó'ab dine'é bindanit'a'í yił naazį́. Áko Béílak áháłní, Bóhólníihii lá, ha'át'íí ní?

¹⁸Ákohgo Béílam bee ak'idi'dootį́įłii yee haadzíi'go ání, Béílak yiizįįhgo shíísíníłts'ą́ą́', Zípor biye' nílíinii, shíísíníłts'ą́ą́',

¹⁹Diyin God éí doo diné át'ée dago doo biyooch'íid da, doodaii' doo diné biye' át'ée dago doo łahgo át'éego tsíńdíkees da. Yee haadzí'ígíí lá íidoolíił ni. Doodaii' yee haadzíi'ii lá nizhónígo yi'doolíił ni.

²⁰Jó, ak'idajishdliih doogo bee shich'į' ha'oodzíí'; ak'idzisdli'ígíí doo łahgo áńdeeshdlíił da.

²¹Jéíkab dine'é hach'į' doo ákwii át'éii t'ah doo ánéeh da, doodaii' hodílgizgo áhólzinii Ízrel dine'é bitahgi doo ła' yoo'į́į da. Bóhólníihii haDiyin God hoł hólǫ́, áádóó hatahgóó aláahgo naat'áanii baa ha'niihii bee naho'dighaash.

²²Diyin God éí Ííjip kéyahdę́ę́' ch'ééhoní'eezh. Jó, béégashii ałchinii bidee' báhádzidii há nahalin.

²³Álíleego bee ééhózingo bee nahadláii doo bee Jéíkab dine'é bik'ijį' ídlį́į da; binahjį' ił ééhodoozįįłgo nahagháii doo bee Ízrel dine'é bik'ijį' ídlį́į da; díí hoolzhishdóó Jéíkab dine'é áádóó Ízrel dine'é baa yáti'go áhodidoo'niił, Ha'át'íí lá yówéé'át'éego Diyin God naashnish lá!

²⁴Shoo, dine'é éí náshdóítsoh bitsiijį' ditł'ooii ayóó át'éii nahalingo nídahididookah, áádóó náshdóíyáazhgi át'éego nídahididookah, áko yił deezdéelii ałtso yoolghalgo áádóó yiyiisxínígíí bidił yoodlą́ą'go índa dínóotééł.

²⁵Áádóó Béílak éí Béílam ííłní, Ts'ídá doo bidíníídzįįł da. Ts'ídá doo bik'ijiidíídliił da.

²⁶Nidi Béílam haadzíi'go Béílak ííłní, Shą́ą́' nił hweeshne'go ádíshní, Bóhólníihii ánínígíí t'éiyá t'áá át'é bi'deeshłííł, dishníi ni'?

²⁷Áko Béílak éí Béílam ánéidoo'niid, Nánooshkąąh, hágo, náánáłahdę́ę'go nił anáádeesht'ashgo Diyin God bił yá'át'éehgo éí áádę́ę'go shá bidíníídzįįł.

²⁸Áko Dził Píyor bighą́ą́'góó Béílak éí Béílam yił náánát'áázh; éí áádóó Jiisháíman honoojíí góyaa ayoot'į́į́'.

²⁹Ákohgo Béílam éí Béílak ííłní, Kwe'é bikáá' náá'iiniihí tsosts'idgo shá ádíílííł, índa dóola yázhí tsosts'idgo áádóó deenásts'aa' tsosts'idgo kwe'é shá hasht'edíílííł.

³⁰Áádóó Béílam ádííniidígíí bik'ehgo Béílak ádzaa; éí dóola yázhí índa deenásts'aa' éí bikáá' náá'iiniihí t'áá ałtso yik'eh nítį́įgo nááyiyiisnii'.