Read Navajo NUMBERS 27 Bible Online

NUMBERS 27 - Navajo bible

NUMBERS 27

¹Nít'éé' Jóseph biye' Manáseh ba'áłchíní náás ahoolchíiłii Méíkir éí Manáseh biye', Gíliyad éí Méíkir biye', Híífer éí Gíliyad biye', Ziilófehad éí Híífer biye', éí Ziilófehad bitsi'ké yíkai; éí bitsi'ké kódaolyé: Mála, Nóah, Hágla, Mílka índa Térza.

²Áko éí níbaal bii' dahozdísinii bich'éédą́ą'gi Mózes áádóó náá'iiłniihii Eliyéízar áádóó naat'áanii danilíinii índa dah oonéłígíí t'áá ałtso yidááhdóó niikaigo ádaaní,

³Nihizhé'é yę́ę honoojíidi ádin; éí Kórah yił ahíikaigo Bóhólníihii yich'į' nidaalteeh nít'é'ígíí doo yił naakai da nít'éé', nidi t'áá bí ádił ni'iisíihgo daaztsą́, áko biye'ké éí t'áadoo hazlį́į' da.

⁴Ha'át'íísh biniyé nihizhé'é yę́ę biye'ké t'áadoo hazlį́'ígíí biniinaa dabik'is bitahdóó bízhi' doo bééhodoozįįł da? Éí bąą nihizhé'é yę́ę dabik'is bitahdóó kéyah nihíí' dooígíí ła' nihaa dinoh'aah.

⁵Kót'éego Mózes éí díí yaa nídaat'ínígíí Bóhólníihii baazhdiní'ą́.

⁶Áko Bóhólníihii éí Mózes yich'į' haadzíi'go ííłní,

⁷Ziilófehad bitsi'ké t'áá aaníígóó hadaasdzíí'; t'áá aaníí bizhé'é yę́ę bik'is bitahdóó kéyah daahóó' dooígíí hataadidíí'aał, áko bizhé'é yę́ę bikéyah baa dadidíí'ááł.

⁸Áádóó Ízrel dine'é bich'į' hadíídzihgo kóbididííniił, Diné ła' biye' t'áadoo hazlį́į́'góó bí daaztsą́ągo bikéyah bitsi'ké bíí' nidahaleehgo ádaałe' doo.

⁹Nidi bitsi' t'áadoo hazlį́į́'góó éí bik'isóó bíí' dooleełgo baa dahidoh'aah doo.

¹⁰Bik'isóó ałdó' doo hólǫ́ǫ́góó bizhé'é yázhí bíí' dooleełgo baa dahidoh'aah doo.

¹¹Nidi bizhé'é yázhí doo ła' hólǫ́ǫ́góogo éí t'áá hak'éí nilínígíí ła' kéyah bíí' dooleeł, áko Ízrel dine'é bich'į' yee nihoní'áanii bee nihodiit'aah doogo Bóhólníihii éí Mózes yich'į' yee haadzíí'.

¹²Áádóó Bóhólníihii éí Mózes ííłní, Nílááh, díí Dził Ábarim góde hasínáahgo kéyah éí Ízrel dine'é baa diní'ánígíí dínííł'įįł.

¹³Áko nííníł'į́į'go t'áá nik'is Éran anábi'dooltínígi át'éego ni ałdó' nidine'é daazlį́'ígóó ándi'doolnííł.

¹⁴Háálá honoojí Zin hoolyéegi dah oonéłígíí saad dahółǫ́ yę́ędą́ą́' shibik'eh ó'oo'níiłii bik'ijį' nííníltee'; tóogi dabinááł ts'ídá dinishyingo áshíínísin doo nít'éé'; éí Méribah tóodi Kéídesh nahós'a' Zin honoojíigi áhóót'įįd.

¹⁵Ákohgo Mózes éí Bóhólníihii yich'į' haadzíi'go ání,

¹⁶Bíni' Bóhólníihii éí nihokáá' dine'é t'áá ałtso biníłch'i yiDiyin God nilíinii diné ła' dah oonéłígíí yá sizį́įgo íidoolííł;

¹⁷éí yá ch'énádáah doo índa yilą́ąjį' yah anáhádáahgo yoo'ish doo índa yah anáyii'éesh doo, áko éí Bóhólníihii bits'ą́ą́dóó dah oonéłígíí doo dibé yaa áhályáanii bee ádinígíigi ádaat'ée da doo.

¹⁸Áko Bóhólníihii éí Mózes ííłní, Nan biye' Jáshowa bił nídiit'aash; éí yá'át'éehgo diné bii' honít'i'ii bik'i dah didíílnihgo

¹⁹náá'iiłniihii Eliyéízar áádóó dah oonéłígíí t'áá ałtso bidááhdóó bił nidíí'ash, áko t'áá dabinááł bee óhólnííh baa díísįįł.

²⁰Áádóó bee níhólníhígíí bąąh nidíílééł, áko Ízrel dine'é dah yinéłígíí t'áá ałtso bik'eh dahół'į́į doo.

²¹Áádóó náá'iiłniihii Eliyéízar wolyéii yidááhdóó néidzįįhgo, áko há na'ak'íyáłti'go Yúrim bibee nihodiit'aahii há bee Bóhólníihii binááł há na'ídíkid doo, áko éí bik'ehgo Jáshowa áádóó Ízrel dine'é dah yinéłígíí t'áá ałtso hazaad k'ehgo ch'énákah doo índa yah anákah doo.

²²Ákohgo Mózes éí Bóhólníihii áhodííniidígíí bi'jiilaa; Jáshowa bił nízhdiit'áazhgo náá'iiłniihii Eliyéízar áádóó dah oonéłígíí t'áá ałtso bidááhdóó bił nizhní'áázh,

²³áádóó Jáshowa bik'i dasdees'nii'go binaanish dooleełígíí baa dadzisįįdgo Mózes hwee Bóhólníihii yee haadzí'ígíí ájiilaa.