Read Navajo NUMBERS 29 Bible Online

NUMBERS 29 - Navajo bible

NUMBERS 29

¹Áádóó tsosts'id nídízídígíí binih ła'a jį́į́ góne' dahodíínóhsingo áłah náhdleeh doo, índa doo nidaołnish da doo. Éí bijį́ dilní bee na'a'né nihá néiit'aah doo.

²Áko nááda'ayołniihgo didlidgo nááhániihii Bóhólníihii bich'į' łikání halchingo náádahidoołnihígíí éí dóola yázhí t'ááłá'ígo, deenásts'aa' t'ááłá'ígo índa dibé yázhí dabiką'ii tsosts'idgo ła' béédááhaii hadaałt'éii,

³áádóó ak'áán nááhániihii át'éego ómer bee í'neel'ąąhí bee ak'áán táadi haaką́ągo ak'ah bił ałtahgo dóola yázhí bóóltą'go, ak'áán naakidi haaką́ągo deenásts'aa' bóóltą'go,

⁴índa ak'áán t'ááłáhídi hahakaahgo dibé yázhí tsosts'idígíí bik'eh nítį́įgo bił náádahołniih doo,

⁵áádóó tł'ízíchǫǫh t'ááłá'ígo éí ádił ni'iidzííhjí nááhániihii át'éego éí bee nihá k'ééhoodǫǫł doo.

⁶Díí éí dah néitį́įhgo didlidgo nááhániihii índa ak'áán nááhániihii bóóltą'go áádóó t'áá ákwíí jį́ didlidgo nááhániihii éí ak'áán nááhániihii áádóó yanáadzi'go nááhániihii bił ahóóltą'go áda'ał'ínígíí bik'ehgo Bóhólníihii bich'į' didlidgo łikání halchingo náádahołniih doo.

⁷Áádóó tsosts'id nídízídígíí binih neeznáá jį́į́ góne' dahodíínóhsingo áłah náhdleeh, áádóó doo adą́ą́góó nihii' naazíinii dahodísingo sohodizin áń'daał'įįh doo, índa ákóne' t'áá ha'át'éegoda doo nidoołnish da.

⁸Nidi nááda'ayołniihgo didlidgo nááhániihii Bóhólníihii bich'į' didlidgo łikání halchingo náádahidoołnihii éí náádahołniih dooígíí, éí dóola yázhí t'ááłá'ígo, deenásts'aa' t'ááłá'ígo índa dibé yázhí tsosts'idgo dabiką'ii ła' béédááhaii hadaałt'éii,

⁹áádóó ak'áán nááhániihii át'éego ómer bee í'neel'ąąhí bee ak'áán táadi haaką́ągo ak'ah bił ałtahgo dóola yázhí bóóltą'go, ak'áán naakidi haaką́ągo deenásts'aa' bóóltą'go,

¹⁰índa ak'áán t'ááłáhídi hahakaahgo dibé yázhí tsosts'idígíí bik'eh nítį́įgo bił náádahołniih doo,

¹¹áko tł'ízíchǫǫh t'ááłá'ígo ádił ni'iidzííhjí nááhániihii át'éego áádóó ałdó' ádił ni'iidzííhjí nááhániihii bee á k'ééhoodǫǫłii ła' ínáánáoltą'go áádóó náá'áłdó' áłahjį' didlidgo nááhániihii, éí ak'áán nááhániihii áádóó yanáadzi'go nááhániihii bił ahóóltą'go náádahołniih doo.

¹²Tsosts'id nídízídígíí binih ashdla'áadah jį́į́ góne' dahodíínóhsingo áłah náhdleehgo, ákóne' ts'ídá doo nidoołnish da, áko Bóhólníihii bich'į' tsosts'id jį́ dahodíínóhsingo áłah náhdleeh doo.

¹³Áko didlidgo nááhániihii át'éego éí dóola yázhí táá'ts'áadahgo, deenásts'aa' naakigo, dibé yázhí dį́į́'ts'áadahgo dabiką'ii ła' béédááhaii hadaałt'éii, díí Bóhólníihii bich'į' didlidgo łikání halchingo náádahołniih doo.

¹⁴Áádóó ak'áán nááhániihii át'éego ómer bee í'neel'ąąhí bee ak'áán táadi haaką́ągo ak'ah bił ałtahgo dóola yázhí táá'ts'áadahígíí bik'eh nítį́įgo áádóó naakidi haaką́ągo deenásts'aa' ła' bóóltą'go bił náádahołniih doo,

¹⁵índa ak'áán t'ááłáhídi hahakaahgo dibé yázhí dį́į́'ts'áadahígíí bik'eh nítį́įgo bił náádahołniih doo,

¹⁶áádóó tł'ízíchǫǫh t'ááłá'ígo ádił ni'iidzííhjí nááhániihii át'éego áłahjį' didlidgo nááhániihii éí ak'áán nááhániihii áádóó yanáadzi'go nááhániihii bił ahóóltą'go náádahołniih doo.

¹⁷Naaki yiłkaah bijį́ dóola yázhí naakits'áadahgo, deenásts'aa' naakigo índa dibé yázhí dį́į́'ts'áadahgo dabiką'ii ła' béédááhaii hadaałt'éii náádahołniih doo,

¹⁸áádóó ak'áán nááhániihii índa yanáadzi'go nááhániihii át'éego dóola yázhí áádóó deenásts'aa' índa dibé yázhí ánéelt'e'ígíí índa áda'ał'ínígíí bik'ehgo bił náádahołniih doo,

¹⁹índa tł'ízíchǫǫh t'ááłá'ígo éí ádił ni'iidzííhjí nááhániihii át'éego, éí áłahjį' didlidgo nááhániihii áádóó ak'áán nááhániihii índa yanáadzi'go nááhániihii bił ahóóltą'go náádahołniih doo.

²⁰Áádóó táá' yiłkaah bijį́ dóola yázhí ła'ts'áadahgo, deenásts'aa' naakigo índa dibé yázhí dį́į́'ts'áadahgo dabiką'ii ła' béédááhaii hadaałt'éii náádahołniih doo,

²¹áádóó ak'áán nááhániihii índa yanáadzi'go nááhániihii át'éego dóola yázhí áádóó deenásts'aa' índa dibé yázhí ánéelt'e'ígíí áádóó áda'ał'ínígíí bik'ehgo bił náádahołniih doo,

²²áádóó tł'ízíchǫǫh t'ááłá'ígo éí ádił ni'iidzííhjí nááhániihii át'éego áłahjį' didlidgo nááhániihii áádóó ak'áán nááhániihii índa yanáadzi'go nááhániihii óóltą'go náádahołniih doo.

²³Índa dį́į́' yiłkaah bijį́ dóola yázhí neeznáá, deenásts'aa' naaki índa dibé yázhí dį́į́'ts'áadahgo dabiką'ii ła' béédááhaii hadaałt'éii náádahołniih doo,

²⁴áádóó ak'áán nááhániihii áádóó yanáadzi'go nááhániihii át'éego dóola yázhí áádóó deenásts'aa' índa dibé yázhí ánéelt'e'ígíí áádóó áda'ał'ínígíí bik'ehgo bił náádahołniih doo,

²⁵áádóó tł'ízíchǫǫh t'ááłá'ígo ádił ni'iidzííhjí nááhániihii át'éego áłahjį' didlidgo nááhániihii áádóó ak'áán nááhániihii índa yanáadzi'go nááhániihii óóltą'go náádahołniih doo.

²⁶Índa ashdla' yiłkaah bijį́ dóola yázhí náhást'éigo, deenásts'aa' naakigo índa dibé yázhí dį́į́'ts'áadahgo dabiką'ii ła' béédááhaii hadaałt'éii náádahołniih doo,

²⁷áádóó ak'áán nááhániihii áádóó yanáadzi'go nááhániihii át'éego dóola yázhí áádóó deenásts'aa' índa dibé yázhí ánéelt'e'ígíí áádóó áda'ał'ínígíí bik'ehgo bił náádahołniih doo,

²⁸áádóó tł'ízíchǫǫh t'ááłá'ígo ádił ni'iidzííhjí nááhániihii át'éego áłahjį' didlidgo nááhániihii áádóó ak'áán nááhániihii índa yanáadzi'go nááhániihii óóltą'go náádahołniih doo.

²⁹Índa hastą́ą́h yiłkaah bijį́ dóola yázhí tseebíigo, deenásts'aa' naakigo índa dibé yázhí dį́į́'ts'áadahgo dabiką'ii ła' béédááhaii hadaałt'éii náádahołniih doo,

³⁰áádóó ak'áán nááhániihii áádóó yanáadzi'go nááhániihii át'éego dóola yázhí áádóó deenásts'aa' índa dibé yázhí ánéelt'e'ígíí áádóó áda'ał'ínígíí bik'ehgo bił náádahołniih doo,

³¹áádóó tł'ízíchǫǫh t'ááłá'ígo éí ádił ni'iidzííhjí nááhániihii át'éego áłahjį' didlidgo nááhániihii áádóó ak'áán nááhániihii índa yanáadzi'go nááhániihii óóltą'go náádahołniih doo.

³²Tsosts'id yiłkaah bijį́ dóola yázhí tsosts'idgo, deenásts'aa' naakigo índa dibé yázhí dį́į́'ts'áadahgo dabiką'ii ła' béédááhaii hadaałt'éii náádahołniih doo,

³³éí ak'áán nááhániihii áádóó yanáadzi'go nááhániihii át'éego dóola yázhí áádóó deenásts'aa' índa dibé yázhí ánéelt'e'ígíí áádóó áda'ał'ínígíí bik'ehgo bił náádahołniih doo,

³⁴áádóó tł'ízíchǫǫh t'ááłá'ígo ádił ni'iidzííhjí nááhániihii át'éego áłahjį' didlidgo nááhániihii áádóó ak'áán nááhániihii índa yanáadzi'go nááhániihii óóltą'go náádahołniih doo.

³⁵Tseebíí yiłkaah bijį́į́ góne' dahodíínóhsingo áłah náhdleeh; ákóne' doo nidoołnish da,

³⁶nidi nááda'ayołniihgo didlidgo nááhániihii, éí náádahidoonihii didlidgo łikání halchingo Bóhólníihii bich'į' náádahołniih dooígíí dóola yázhí t'ááłá'ígo, deenásts'aa' t'ááłá'ígo índa dibé yázhí tsosts'idgo dabiką'ii ła' béédááhaii hadaałt'éii,

³⁷áádóó ak'áán nááhániihii áádóó yanáadzi'go nááhániihii át'éego dóola yázhí áádóó deenásts'aa' índa dibé yázhí ánéelt'e'ígíí áádóó áda'ał'ínígíí bik'ehgo bił náádahołniih doo,

³⁸áádóó tł'ízíchǫǫh t'ááłá'ígo ádił ni'iidzííhjí nááhániihii át'éego áłahjį' didlidgo nááhániihii áádóó ak'áán nááhániihii índa yanáadzi'go nááhániihii óóltą'go náádahołniih doo.

³⁹Díí éí dahodíínóhsingo áłah náhdleeh bee nidahoot'aah góne' Bóhólníihii bich'į' náádahołniih dooleeł, éí ádee haohdzíi'go nááhidoołnihii áádóó t'áá nihí ádeinohsingo nááhidoołnihii áádóó didlidgo nááhidoołnihii áádóó ak'áán nááhidoołnihii áádóó yanáadzi'go nááhidoołnihii índa hózhǫ́ǫ́jí nááhidoołnihii óóltą'go náádahołniih doo.

⁴⁰Áko Mózes éí Ízrel dine'é bił hojilne'go Bóhólníihii yee áhodííniidígíí t'áá át'é baa hojoolne'.