Read Navajo NUMBERS 32 Bible Online

NUMBERS 32 - Navajo bible

NUMBERS 32

¹Rúben dine'é áádóó Géed dine'é ba'áłchíní bilį́į́' t'óó adahayóí, áko Jéízer hoolyéedi áádóó Gíliyad hoolyéedi kéyah hadeidees'į́į́'; jó, éí haz'ą́ągi nida'nilkaadígi le' áhoot'é.

²Ákohgo Géed dine'é áádóó Rúben dine'é éí Mózes áádóó náá'iiłniihii Eliyéízar índa dah oonéełii binanit'a'í danilíinii yaa yíkaigo ádeiłní,

³Díí Átarath, Dáíban, Jéízer, Nímrah, Héshban, Ííliyéíleh, Shííbam, Nííbo índa Bíyan dahoolyéego kin dah naazhjaa'ígi,

⁴éí keyáhgi Ízrel dine'é dabinááł Bóhólníihii ak'eh deesdlį́'ígi nida'nilkaadígi le' ádahoot'é, áko ná nidaal'a'í bilį́į́' dahólǫ́.

⁵Áko ádadííniid, Ajooba' bee nihich'oha'néego nihąąh tsídasidookééz ládą́ą́', bíni'dii ná nidaal'a'í niidlíinii kéyah nihíí' dadooleełii nihaa dahidoh'aah, áko Jórdan tooh nílíní doo ha'naa adanihidiyooh'ish da.

⁶Mózes éí Géed dine'é áádóó Rúben dine'é ííłní, Da' nihik'isóósh t'éiyá anaa'góó dadookahgo nihí éí t'áá kǫ́ǫ́ nahísóotą́ą doo?

⁷Ha'át'íísh biniyé Ízrel dine'é éí kéyah Bóhólníihii beidiní'áanii yiih dookah nít'é'ígíí bąąh nidahoyołkaad?

⁸Danihizhé'é yę́ę ałdó' ákódáát'įįd; Kéídesh-barníyadóó kéyah hadeidoohsił biniyé nidaséł'a' yę́ędą́ą́' ákódaadzaa.

⁹Jó, Éshkol honíteel góde haaskai yę́ędą́ą́' kéyah dayiiłtsą́ągo Ízrel dine'é yąąh nidahwiiskaadgo biniinaa kéyah Bóhólníihii beidiní'áanii t'áadoo yiih yínáa da.

¹⁰Áko éí bijį́į́dą́ą́' Bóhólníihii báhóóchįįdgo ádee haadzíi'go ání,

¹¹T'áá aaníí, Ííjip kéyahdę́ę́' diné ch'ínákaígíí naadiindóó yówehgo béédááhaígíí t'ááłá'í nidi éí Éíbraham áádóó Áízak índa Jéíkab bich'į' kéyah bee ádee haasdzí'ígíí éí kéyahgi doo dahwiizdoołtséeł da, háálá doo t'áá íiyisí shik'ehgo dajíkáah da nít'éé'.

¹²T'áá hazhó'ó Jiifáneh éí Kíínez diné nilíinii biye' Kéíleb áádóó Nan biye' Jáshowa t'éiyá kéyah yiih doo'ash, háálá t'áá dzizį́į́ nít'éé' Bóhólníihii bik'ehgo joo'ash nít'éé'.

¹³Áko Bóhólníihii éí Ízrel dine'é yich' į' báhóóchįįdgo honoojíigi dízdiin nááhaijį' naanáá'néełgo áyiilaa; Bóhólníihii binááł náás ahoolchíiłgo doo yá'áshónígi ádaat'į́į́góó t'áá ałtso ábísdįįd.

¹⁴Áádóó, jó, nihí danihizhé'é yę́ę bitsásk'ehgi diné nida'iisíihgo háánoot'ánígíí danohłį́įgo Ízrel dine'é bik'ijį' Bóhólníihii t'óó yówehgo bánáádahodoołchįįł.

¹⁵Bóhólníihii bits'ą́ąjigo dah doohkaigo honoojíijį' díí dine'é t'óó yináá'doołnih, áko díí dine'é ałtso ádadoołdįįł.

¹⁶Nidi áháníjį' hach'į' niikaigo ádahodííniid, Kwe'é dibé bighan nihilį́į́' bá ádadiilnííł áádóó niha'áłchíní bá kin hadaas'áago ádadiilnííł.

¹⁷Nidi nihí éí Ízrel dine'é bilą́ąjį' anaa' biniyé hasht'e'ádadidiilnííł; kéyah daabíí' dooleełíjį' bił niniikaigo kéyahgi kéédahat'ínígíí biniinaa kin hadaas'á ditą́ągo binaa ahééda'astł'in góne' nihada'áłchíní kéédahat'į́į doo.

¹⁸Ízrel dine'é kéyah bíí' dooleełii shódayoost'e'jį' índa nihighangóó nát'ą́ą́' nihééhidiikah.

¹⁹Jórdan tooh nílíní biláahdi wónaaníjí nihik'éí bił kéyah doo ła' nihíí' dooleeł da, háálá t'áá kwe'é Jórdan tooh nílíní ha'a'aahjígo nihikéyah dahazlį́į́'.

²⁰Áko Mózes áhodííniid, Jó, ákódaahnééh ládą́ą́', t'áá nihí hasht'e'ádadołnééh ládą́ą́' Bóhólníihii binááł ákǫ́ǫ́ dadohbáahgo

²¹t'áá ánółtso Bóhólníihii binááł Jórdan tooh nílíní ha'naagóó dadohbááh ládą́ą́', Bóhólníihii ádílą́ąjį' bi'ana'í ch'íininíłkaadjį' áadi nidaahbaahgo

²²Bóhólníihii binááł éí kéyahgi kéédahat'ínígíí bik'eh dasidoohdlį́į'go índa nídoohkah, áádóó Bóhólníihii índa Ízrel dine'é binááł doo nihihodiit'i' da doo, áko Bóhólníihii binááł díí kéyah danihíí' dooleeł.

²³Nidi t'áadoo ádaahdzaagóogo, jó, Bóhólníihii bich'į' ádił da'soołziih dooleeł, áádóó t'áá aaníí ádił da'soołziihígíí ííshjání ánihidoolííł.

²⁴Nihada'áłchíní bá kin hadaas'áago ádaahłééh, nihidibé bighan ádaahłééh índa bee hadahisoohdzí'ígíí bida'ohłééh.

²⁵Géed dine'é áádóó Rúben dine'é Mózes yich'į' hadaasdzíi'go ádaaní, Nihinanit'a'í nílíinii, ná nidaal'a'í bá bee hwiinił'a'ígíí ádayoolíił doo.

²⁶Nihada'áłchíní, nihida'asdzą́ąda, danihidibéda, danihilį́į'da t'áá át'é Gíliyad kéyahdi kin hadaas'áágóó dahólǫ́ǫ doo,

²⁷nidi nihinanit'a'í ánínígi át'éego ná nidaal'a'í éí dadoobah yiniyé hasht'e'ádadiilyaaígíí t'áá ałtso Bóhólníihii yinááł ha'naa nidoonééł.

²⁸Áko t'áá bí bídadéét'i'ii Mózes éí náá'iiłniihii Eliyéízar áádóó Nan biye' Jáshowa índa Ízrel dine'é dabizhé'é á naazíinii ída'doolíłígíí yee hach'į' haadzíí'.

²⁹Ákohgo Mózes áhodííniid, Géed dine'é áádóó Rúben dine'é Jórdan tooh nílíní ha'naa nihił niikaigo Bóhólníihii binááł diné t'áá ałtso dadoobah yiniyé hasht'e'ádadiilyaaígíí nihilą́ąjį' kéyahgi kéédahat'ínígíí yik'eh dadeesdlį́į́' ládą́ą́' ííshją́ą́ Gíliyad kéyah daabíí' dooleeł biniyé baa dadidooh'ááł,

³⁰nidi dadoobah yiniyé doo nihił ha'naa niikaigóó, éí Kéínan hahoodzogi nihitahgóó kéyah ła' daabíí' dooleeł.

³¹Áádóó Géed dine'é índa Rúben dine'é hach'į' hadaasdzíi'go ádaaní, Ná nidaal'a'í bich'į' Bóhólníihii haadzí'ígi át'éego nihí ákódadii'nííł.

³²Nihí dadiibah biniyé hasht'e'ádadiilyaago Bóhólníihii binááł Kéínan kéyahjį' ha'naa nidii'nééł, áko Jórdan tooh nílíníjí kéyah nihíí' dooleeł.

³³Áko Mózes haa hodiní'ánígíí éí Géed dine'é áádóó Rúben dine'é índa Jóseph biye' Manáseh dine'é ałníí'dóóígíí éí Ámor dine'é aláahgo binanit'a'í Sáíhan bee bóhólnííh yę́ę índa Béíshan hahoodzodóó aláahgo naat'áanii Ag bee bóhólnííh yę́ę kéyahgi kin hadaas'áhígíí índa binaagóó kédaayah haidiní'ą́.

³⁴Áádóó Géed dine'é éí Dáíban, Átarath áádóó Aró'er dahoolyéegi kin hadaas'áago ádayiilaa,

³⁵áádóó Átrath, Shófan, Jéízer áádóó Jagbíyah,

³⁶Beth-nímrah índa Beth-héíran dahoolyéegi ditą́ągo binaa ahééda'astł'ingo ádayiilaa áádóó dibé dabighan ałdó' ádayiilaa.

³⁷Índa Rúben dine'é éí Héshban, Ííliyéíleh áádóó Kíriyathéíyim dahoolyéegi kin hadaas'áago ádayiilaa,

³⁸Nííbo áádóó Béíyal-míyan (éí bízhi' łahgo áńdaalyaa,) índa Shíbmah; díí kin hadaas'áago ádaalyaaígíí ałdó' náánáła' bee dayééji'.

³⁹Áádóó Manáseh biye' Méíkir ba'áłchíní éí Gíliyad kéyahgóó nidaazbaa'go deisnáago Ámor dine'é ákwii kéédahat'ínígíí yighadahodeest'ą́.

⁴⁰Áko Mózes éí Manáseh biye' Méíkir wolyéii Gíliyad kéyahgi yaa hodiní'ą́ągo ákwii niníná.

⁴¹Manáseh biye' Jéíyer éí kin naazhjaa'ígíí yisnáago Hávath-jéíyer yee dayíízhi'.

⁴²Áádóó Nóbah éí Kíínath kin haal'áii áádóó kin naazhjaa'ígíí t'áá bił yisná, áko t'áá bí bízhi'ígíí yee yiyíízhi'.