Read Navajo NUMBERS 34 Bible Online

NUMBERS 34 - Navajo bible

NUMBERS 34

¹Áádóó Bóhólníihii éí Mózes yich'į' haadzíi'go ííłní,

²Ízrel dine'é bich'į' handziihgo kóbidiní, Kéínan kéyah biih woonáago, (díí Kéínan kéyah bii' nidahwiisdzooígíí nihíí' ádadoohłííł:)

³áko shádi'ááhjí hoodzo dooígíí éí honoojí Zin hoolyéédóó Íídam bihoodzo booshk'iizhgóó éí shádi'ááhjí nihoodzo dooígíí Tónteel Dók'ǫ́ǫzhii nineel'ánídóó ha'a'aahjigo hoodzo dooleeł,

⁴áádóó shádi'ááhdóogo naaná'ásdzo dooígíí éí Akrábim kéyah góde Zingóó hoodzo doo áádóó Kéídesh-barníya shádi'áahjigo ahoodzo doo, índa Héízar-ádar bíighahgóó Ázman hoolyéejį' ahoodzo doo,

⁵áádóó Ázman binaagóó ahééhoodzogo Ííjip kéyahgi tooh nílíníjį' áádóó tónteel siyíníjį' hoodzo doo.

⁶Índa e'e'aahjí hoodzooígíí éí ayóó át'é tónteel siyínígíí bibąąhgóó hoodzo doo. Díí éí e'e'aahjígo hoodzooígíí át'ée doo.

⁷Díí náhookǫsjí hoodzooígíí át'ée doo: ayóó át'é tónteel siyínídóó Dził Hor si'áníjį' hoodzogo ádíílííł,

⁸áádóó Dził Hor si'ánídóó Héímath hoolyéejį' yah ahóót'i'ígíí bíighahgóó hoodzogo ádíílííł, áádóó Zíídad hoolyéejį' hoodzo doo,

⁹áádóó Zífran hoolyéégóó hoodzogo Héízar-íínan kin shijaa'jį' hoodzo doo; díí éí náhookǫsjí hoodzooígíí át'ée doo.

¹⁰Áádóó ha'a'aahjígo hoodzooígíí éí Héízar-íínandóó Shíífam hoolyéejį' hoodzogo ádíílííł,

¹¹índa éí hoodzooígíí Shíífamdóó Ríblah kin haal'áajį' áádóó Áyiin hoolyéii ha'a'aahjígo hoodzo doo, áádóó ha'yaago hoodzooígíí tó siyínígíí Kíniireth hoolyéii ha'a'aahjí hoodzo doo.

¹²Áko hoodzooígíí éí Jórdan tooh nílíní góyaa áádóó Tónteel Dók'ǫ́zhíjį' hoodzo doo: díí éí nihináhásdzooígíí nihikéyah át'ée doo.

¹³Áádóó Mózes éí Ízrel dine'é yich'į' haadzíi'go ání, Yáá'iilt'e' bik'ehgo díí kéyah nihíí' dadooleeł; éí dine'é náhást'éiigo áádóó dine'é ałníí'dóó bee bi'dójíii baa didoot'ááł níigo Bóhólníihii haadzíí'.

¹⁴Rúben dine'é dabizhé'é yę́ę ba'áłchíní da'ahílchíihii bik'ehgo áádóó Géed dine'é dabizhé'é yę́ę ba'áłchíní da'ahílchíihii bik'ehgo índa Manáseh dine'é ałníí'dóó bee bi'dójíii éí kéyah bíí' dadooleełgo baa dahideest'ą́.

¹⁵Naakigo dine'é nilíinii áádóó dine'é ałníí'dóó bee bi'dójíii éí kéyah bíí' doogo Jériko binaashii Jórdan tooh nílíní ha'a'aahjigo háá'át'ááh bich'į'go baa dahideest'ą́.

¹⁶Áádóó Bóhólníihii éí Mózes yich'į' haadzíi'go ííłní,

¹⁷Díí náá'iiłniihii Eliyéízar áádóó Nan biye' Jáshowa éí kéyah danihíí' dooleełígíí nihá ałts'ádeidoozoh.

¹⁸Áko dine'é danilínígíí bitahdóó naat'áanii danilíinii t'ááłá'ígo éí kéyah hóó' dadooleełígíí hazhé'é deidoozoh biniyé nidíínił.

¹⁹Éí hastóí kódaolyé: Júdah dine'é bitahdóó éí Jiifáneh biye' Kéíleb niiltį́;

²⁰Símiyan dine'é bitahdóó éí Amáíhad biye' Shému'el niiltį́;

²¹Bénjamin dine'é bitahdóó éí Kíslan biye' Iiláídad niiltį́;

²²Dan dine'é bitahdóó éí Jáglai biye' naat'áanii nilíinii Bákai niiltį́.

²³Jóseph ba'áłchíní ahoolchíiłii ła' Manáseh dine'é danilíinii bitahdóó éí Íífad biye' naat'áanii nilíinii Hániyel niiltį́,

²⁴áádóó Íífreiyim dine'é bitahdóó éí Shíftan biye' naat'áanii nilíinii Kému'el niiltį́.

²⁵Zébyulan dine'é bitahdóó éí Párnak biye' naat'áanii nilíinii Elizéífan niiltį́.

²⁶Ísakar dine'é bitahdóó éí Ázan biye' naat'áanii nilíinii Páltiyel niiltį́.

²⁷Ásher dine'é bitahdóó éí Shiilómai biye' naat'áanii nilíinii Aháíhad niiltį́.

²⁸Náftalai dine'é bitahdóó éí Amáíhad biye' naat'áanii nilíinii Pédahel niiltį́.

²⁹Díí éí naat'áanii danilíinii éí Bóhólníihii haadzí'ígíí bik'ehgo kéyah íí' dooleełii Ízrel dine'é yitaadeidoozohgo Kéínan kéyah bíí' dadooleeł.