Read Navajo NUMBERS 35 Bible Online

NUMBERS 35 - Navajo bible

NUMBERS 35

¹Áádóó Mó'ab kéyah nidzisgaigi éí Jériko binaashiijí Jórdan tooh nílíní ha'a'aahjigo haz'ánígi Bóhólníihii éí Mózes yich'į' haadzíi'go ííłní,

²Ízrel dine'é díí bee bich'į' handziih; Líívai dine'é bíí' dooleełii kin hadaas'áii yii' kéédahat'į́į doo biniyé yaa deididoo'ááł, áádóó kin hadaas'áii binaagóó dahootsooígíí ałdó' baa dadidooh'ááł.

³Áko kin hadaas'áii bíí' dadooleełgo yii' kéédahat'į́į doo, áádóó binaagóó dahootsooígi bilį́į́' dah danéelkaadii t'áá át'é ákwii nidanilkaad doo.

⁴Áádóó kin hadaas'á binaagóó dahootsooígi Líívai dine'é bá dahwiidooł'aał; éí kin haal'á binaa ahéé'ítł'inídóó t'ááłáhídi mííldóó ba'aan ashdladi neeznádiin ké silá bíighahgo ahééhool'áa doo.

⁵Áko kin haal'á binaagi ahééhool'áhídóó bínáádí'nííł'ąął; ha'a'aahjigo táadi mííl ké silá áhonízahjį'; shádi'áahjigo táadi mííl ké silá áhonízahjį'; e'e'aahjigo táadi mííl ké silá áhonízahjį'; náhookǫsjigo táadi mííl ké silá áhonízahjį' bídadí'nííł'ąął, áko éí ałníi'gi kin haal'áa dooleeł. Díí kin hadaas'áago binaagi dahootsooígíí daabíí' dooleeł.

⁶Áádóó kin hadaas'áii Líívai dine'é baa dahodidooh'áłígíí éí hastą́ągo kin haal'áii bii'jį' yisdá'niichéeh dooleeł biniyé baa dahodidooh'ááł; éí diné yiyiisxíinii áajį' yisdádahinichéeh doo; éí bighą́ąhjį' dízdiindóó ba'aan naakigo kin haal'áii bá bídeidoohnił.

⁷Áko kin hadaas'áhígíí t'áá át'é Líívai dine'é baa deet'aahgo dízdiindóó ba'aan tseebíí kin haal'á índa binaagóó dahootsooígíí ałdó' baa didoot'ááł.

⁸Kin hadaas'áii aa dahidoh'aah dooígíí éí Ízrel dine'é danilíinii kin hadaas'áii t'óó ahayóí bee dahólónígíí kin hadaas'áii lą'í nideidii'aah doo; t'áá díkwíí bee dahólónígíí kin hadaas'áii t'áá díkwíí nideidii'aah doo; dine'é t'áá ádzíłtso hakin hadaas'áii hóó' daazlį́į'ii bik' ehgo Líívai dine'é baa dahizhdidoo'ááł.

⁹Áádóó Bóhólníihii éí Mózes yich'į' haadzíi'go ííłní,

¹⁰Ízrel dine'é bich'į' handziihgo ábidiní, Jórdan tooh nílíní ha' naa ninoonáago Kéínan kéyah biih doohnéełgo

¹¹kin hadaas'áii bii'jį' yisdá'niichéeh dooígíí t'áá nihí ádá ádahodoohłííł, áko doo t'áá ákójínééhgóó diné jiisxíinii áajį' yisdázhdínóochééł.

¹²Áko dił biniinaa diné k'ééhodidoodlíiłii bits'ąą kin hadaas'áii bii' yisdá'niichéehjį' azhdínóochééł, áko diné jiisxíinii doo dazdootsaałígíí biniyé átsé hazhó'ó haa hwiidínóot'įįł.

¹³Díí kin hadaas'áii aa dahidoh'aah dooígíí éí hastą́ągo kin haal'áii bii'jį' yisdádahinohchéehii át'ée doo.

¹⁴Jórdan tooh nílíní ha'a'aahjígo táa'go kin haal'áii áádóó Kéínan kéyah bii' táa'go kin haal'áii éí Líívai dine'é baa dadidooh'ááł; éí kin hadaas'áii bii'jį' yisdá'niichééh biniyé nihá át'ée doo.

¹⁵Díí hastą́ągo kin haal'áii bii'jį' yisdá'niichééh biniyéhígíí Ízrel dine'é áádóó dé'éyóní nilíinii índa t'óó átsééd nihitahgi kéédahat'ínígíí bá át'ée doo, áko t'áá háiida doo t'áá ákójínééhgóó diné jiisxíinii áajį' yisdázhdínóochééł.

¹⁶Áko béésh bee diné bił niizhníłhaalgo éí diné jiisxíinii jílį́; diné jiisxíinii ts'ídá hodi'yoolyéłí.

¹⁷Índa tsé bee diné bił niizhníłne'go éí diné jiisxíinii jílį́; diné jiisxíinii ts'ídá hodi'yoolyéłí.

¹⁸Doodaii' tsin bee diné bił niizhníłhaalgo éí diné jiisxíinii jílį́; diné jiisxíinii ts'ídá hodi'yoolyéłí.

¹⁹Bik'éí bidił biniinaa diné k'éédidoo'níłígíí t'áá bí diné iisxínígíí yidááh níyáago yidiyoołhééł.

²⁰Doodaii' yik'ee diniihgo t'áá na'níle'dii nihíideestsisgo, doodaii' yaa niheedzáago t'áadoo le'é yee yííníiłne'go yiyiisxį́į́ ládą́ą́',

²¹doodaii' yijoołxáago yił niizníłts'in ládą́ą́'; éí ił niizníłts'inígíí ts'ídá hodi'yoolyéłí, háálá diné yiyiisxíinii jílį́, áko bik'éí bidił biniinaa diné k'éédidoo'níłígíí t'áá bí diné iisxínígíí yidááh níyáago yidiyoołhééł.

²²Nidi doo yijoołxáágóó t'áadoo kót'é ílíní atíyiilaago, doodaii' doo yaa neheedzáágóó t'áadoo le'é yik'ijį' ayiyííłhango,

²³doodaii' t'áadoo yoo'íní tsé yee néidííłne'ígíí daaztsą́ą́ ládą́ą́'; éí doo yi'ana'í nilį́į́góó, doodaii' atízhdoolíiłgi doo binahodziz'ą́ą́góó,

²⁴áko dah oonéłígíí díí diné iisxínígíí áádóó k'éézhdidoo'níłígíí díí bee nihodiit'aahii bik'ehgo haa hwiidínóot'įįł.

²⁵Áádóó dah oonéłígíí éí diné bik'éí bidił biniinaa k'éédidoo'níłígíí bits'ą́ąjį' diné iisxíinii yisdádeidoołtééł, áko kin haal'áii bii' yisdá'niichéehjį' anííchą́ą́' yę́ęjį' yił nídadookah, áádóó aláahgo náá'iiłniihii ak'ah bik'i yaadziidgo bi'doolzį́'ígíí daaztsą́ąjį' ákwii kééhojit'į́į doo.

²⁶Nidi diné iisxíinii kin haal'áii bii'jį' yisdázhnííchą́'ídóó t'áá hoolzhishgi hoodzo bitis jííyáago

²⁷áádóó kin haal'áii bii'jį' yisdázhnííchą́'ídóó hoodzo bitisdi nijigháago diné bik'éí bidił biniinaa k'éédidoo'níłígíí hak'íníyáago hwiisxį́įgo hadił biniinaa doo bohodidoot'ih da,

²⁸háálá diné iisxíinii éí aláahgo náá'iiłniihii daaztsą́ąjį' kin haal'áii bii'jį' yisdá'niichéehgi kééhat'į́į doo nít'éé'. Nidi aláahgo náá'ii łniihii daaztsą́ą́dóó bik'ijį' índa diné iisxíinii hakéyahgóó nihéézhdoodááł.

²⁹Díí náás ahoołchííłgóó t'áá ánółtso kéédahoht'į́į́góó t'áá át'é nihá bee nihwiist'áanii bee nidahodiyoh'aah doo.

³⁰T'áá háiida diné ła' yiyiisxį́įgo éí da'oo'íinii bik'ehgo hodi'yoolyééł, nidi oo'íinii t'ááłá'í hoolne'ígíí bik'ehgo doo hodi'yoolyéeł da.

³¹Náá'áłdó' diné yiyiisxíinii bá nihoot'ą́ągo be'iina' doo bik'énináda'doohdléeł da, nidi ts'ídá bidi'yoolyéłí.

³²Índa diné ła' kin haal'áii bii' yisdá'niichéehjį' anííchą́ą'go éí aláahgo náá'iiłniihii t'ah doo daatsaahgóó hakéyahdi kénááhojit'į́į doo biniyé doo hak'énináda'doohdléeł da.

³³Áko kéyah bii' kéédahoht'ínígi doo dahodoołchxǫǫł da; jó, dił biniinaa kéyah nehechxǫǫh, áádóó kéyah bii' dił deezna'ígíí éí t'áá bąąh hólǫ́ǫ doo; t'áá hazhó'ó diné jiisxínígíí ho'diisyį́įgo t'éiyá bee nahjį' kónídoo'nííł.

³⁴Éí bąą kéyah bii' kéédahoht'į́į dooígi t'ááká dahoołchxǫǫh lágo, háálá ákwii shí kééhasht'į́; jó, shí Bóhólníihii nishłį́įgo Ízrel dine'é bitahgi kééhasht'į́.