Read Navajo NUMBERS 6 Bible Online

NUMBERS 6 - Navajo bible

NUMBERS 6

¹Áádóó Bóhólníihii éí Mózes yich'į' haadzíi'go ání,

²Ízrel dine'é bich'į' handziihgo ábidiní, Diné ła', doodaii' asdzání ła' Názarait jidooleeł biniyé ats'á'ázhdeet'aahgo ádee hadidoodzihgo éí Bóhólníihii bich'į' ádee hadidoodzihgo ats'á'ázhdidoot'ááł;

³wáin índa tó tsi'nida'iiłáii doo jidlą́ą́góó ízhdi'doolnííł; wáin dík'ǫ́ǫzhii, doodaii' tó tsi'na'iiłáii dík'ǫ́ǫzhii doo jidlą́ą da doo; ch'il na'atł'o'ii bineest'ą' ániidígíí, doodaii' bisgą' doo jiyą́ą da doo índa bitoo' doo jidlą́ą da doo.

⁴Ats'á'ázhdeeltį́įgo hóyoołkááł biyi' ch'il na'atł'o'ii sikaadii bits'ą́ą́dóó doodį́įłgo ályaii éí bílástsii' índa bikágí nidi doo jiyą́ą da doo.

⁵Ats'á'ázhdeeltį́įgo ádee hadzoodzíi'go hóyoołkááł biyi' doo hatsii' doolzhih da; Bóhólníihii bich'į' t'áá ats'á'ázhdeet'ánígíí bíighah azlį́į'jį' jidiyin doo, áádóó bíni'dii hatsii' nineez dooleeł.

⁶Bóhólníihii bá ats'á'ázhdeet'ą́ągo hóyoołkááł biyi' ats'íís daaztsáanii doo bit'áahjį' jidoogáał da.

⁷Hazhé'é, doodaii' hamá, doodaii' hak'is, doodaii' halah ła' daaztsą́ągo bee t'áá hó doo bi'didéehii doo ázhdi'doolníił da, háálá haDiyin God bá bee hwééhózinii diyingo bits'ąą hasti'go hatsii'káa'gi hólǫ́.

⁸Ats'á'ázhdeet'ą́ągo hóyoołkááł biyi' Bóhólníihii bich'į' jidiyin dooleeł.

⁹Áádóó diné ła' t'áadoo hooyání hwíighahgi daaztsą́ągo hatsii' bee hwééhózinii diyingo bits'ąą dzisti'ígíí yidoołchǫǫł, áko ho'didééh bijį́į́ hatsii' jidooshihígíí éí tsosts'id jį́į́ góne' hatsii' ałtso jidooshih.

¹⁰Áko tseebíí jį́ azlį́į'go hasbídí naakigo, doodaii' hasbídí łigaii biyázhí naakigo níbaal bii' dahozdísinii bich'éédą́ą'gi náá'iiłniihii baazhdoojih,

¹¹áádóó náá'iiłniihii náádi'yoołnihgo éí ła'ígíí ádił ni'iidzííhjí nááhániihii áádóó ła'ígíí éí didlidgo nááhániihii át'éego yee há k'ééhodoołdǫǫł, háálá daaztsáanii bíhizhdéé'náa'go bee ádił adzisiih, áádóó t'áá éí bijį́ jidiyingo ánáhodi'doolnííł.

¹²Áko diyingo bits'ąą hasti'go hóyoołkáłígíí Bóhólníihii bich'į' ats'á'ánídizhdoot'ááł, áádóó dibé yázhí biką'ii ła' binááhaaí jidoolóosgo doo ákǫ́ǫ́ áhát'į́į́jí nááhániihii át'éego nááhizhdoołnih, nidi átséédą́ą́' ats' á'ázhdeet'ą́ągo hwíiníłkánígíí doo íílįįd da, háálá ats'á'ázhdeet'áanii yíchxǫ'.

¹³Áádóó Názarait nilíinii bá díí bee haz'áanii át'é: ats'á'ádeet'ą́ągo bíyoołkáłígíí bíighah azlį́į'go níbaal bii' dahozdísinii bich'éédą́ą'jį' hoł dadookah,

¹⁴índa Bóhólníihii bich'į' nááhizhdoołnihígíí éí dibé yázhí biką'ii ła' binááhaaí hadaałt'éii didlidgo nááhániihii át'éego áádóó dibé yázhí bi'áadii ła' binááhaaí hadaałt'éii éí ádił ni'iidzííhjí nááhániihii át'éego índa deenásts'aa' t'ááłá'ígo hadaałt'éii hózhǫ́ǫ́jí nááhániihii át'éego nááhizhdoołnih,

¹⁵áádóó díík'ǫsh t'áágééd bááh ályaii ts'iizis bee yíkánígíí, tł'oh naadą́ą́' ak'áán éí ak'ah bił ałtaa násdziidgo bááh dá'áka'í nahalinígíí ak'ah bik'i yadziidii, áádóó ak'áán nááhidoonihii índa yanáadzi'go nááhániihii nááhizhdoołnih.

¹⁶Áko náá'iiłniihii éí Bóhólníihii binááł hasht'e'niidooniłgo ádił ni'iidzííhjí nááhániihii índa didlidgo nááhániihii néidiyoołnih,

¹⁷áko náádi'yoołnihgo deenásts'aa' éí hózhǫ́ǫ́jí nááhániihii át'éego Bóhólníihii yich'į' néidiyoołnih; díík'ǫsh t'áágééd bááh ályaii ts'iizis bee yíkánígíí biłgo náá'iiłniihii náádi'yoołnihgo ak'áán nááhániihii áádóó yanáadzi'go nááhániihii ałdó' néidiyoołnih.

¹⁸Áko níbaal bii' dahozdísinii bich'éédą́ą'gi Názarait nilíinii ats'á'ádeet'ánígíí bitsii' bee bééhózinígíí yidooshih, áádóó ats'á'ádeet'ą́ągo bitsii' néididoołjołgo nááhidoonihii hózhǫ́ǫ́jí nááhániihii nááhániihgo biyaa góne' tsídzaii doołjoł.

¹⁹Áádóó náá'iiłniihii éí deenásts'aa' bigaan shibézhígíí néididootį́į́ł áádóó díík'ǫsh t'áágééd bááh ályaii t'ááłá'ígo índa díík'ǫsh t'áágééd bááh dá'áka'í ályaii t'ááłá'ígo ts'iizis bii'dę́ę́' haidooniłgo Názarait ats'á'ádeet'áanii bitsii' bee bééhózin nít'éé' yę́ę yiyííshéé'dóó bik'ijį' yílák'ee yidoonił,

²⁰áko náá'iiłniihii éí hoł náásee hoł yił dideesnii'go náásee bił didiilnihgo nááhániihii Bóhólníihii binááł nááhizhdoołnih; éí náá'iiłniihii bá dílzinii ádaat'éego ajéíts'iin náásee bił didilnihgo áádóó ajáád bił dah nídi'diilnihgo nááhániihii óóltą'go áádóó bik'ijį' índa Názarait éí wáin néídlį́įhgo bee bá hwiidoo'aał.

²¹Díí éí Názarait ádee haadzí'ígíí bá bee haz'áanii át'é, áádóó ats'á'ádeet'ą́ą́jí bá Bóhólníihii yich'į' néidiyoołnihígíí, índa t'áá ha'át'íhída t'áá yíneel'ánígi néidiyoołnihígíí ałdó' bá bee haz'áanii át'é; ádee hadzoodzí'ígíí bik'ehgo ádee hadzoodzíí'; ákót'éego Názarait nilį́įgo ats'á'ádeet'ánígíí bá bee haz'áanii yik'ehgo é'éł'į́į doo.

²²Áádóó Bóhólníihii éí Mózes yich'į' haadzíi'go ání,

²³Éran áádóó biye'ké bich'į' handziihgo ábidiní, Kót'éego Ízrel dine'é bik'idajiidoohdliiłgo kódabididoohniił:

²⁴Bóhólníihii nihik'ijidlíi doo, áádóó nihaa áhályą́ą doo;

²⁵Bóhólníihii nihik'i' diiłdíin doo, áádóó nihaa jooba' doo;

²⁶Bóhólníihii nihik'iní'į́į' doo, áádóó bee hasht'ehodít'éii nihaididoo'ááł.

²⁷Ákót'éego Ízrel dine'é shízhi' bee dabi'dójíigo ádeidoolííł, áádóó bik'ijishdlíi doo.