Read Navajo MICAH 2 Bible Online

MICAH 2 - Navajo bible

MICAH 2

¹Bitsásk'eh yikáá' naazhjée'go doo ákwii át'éii yindahagizii bich'į' doo hojooba' ájíníi da! Yee hasht'enitsídaazkéezii hool'įįhgo bidziil yaa dadzólíigo doo shódaat'į́į da.

²Áádóó dáda'ak'eh yidádanoolníigo yił hadahidilchííd, índa daakin yidádanoolníigo t'áá na'níle'dii aghadayii'nííł, áko diné áádóó ba'áłchíní éí t'áá bí áádóó bíí' dadooleełii yide ádahósin.

³Éí bąą Bóhólníihii kóní, Díí dine'é bik'ijį' doo yá'áshóonii binahosí'ą́; éí bits'ą́ą́dóó doo nahjį' háádadínóołniił da; doo ádaa dahohniih da doo, háálá díí hoolzhishii doo yá'áshǫ́ǫ da.

⁴Éí bijį́ ła'da yéego atínídindleehgo niheel'į́įgo yichago yee nihá nahodoołt'ih kóníigo, Ałtso ásiidįįd; shidine'é daabíi'ii łahgo áyiilaa; dooládó' lá shits'ą́ą́jí hasdlį́į' da! Nihits'ą́ą́jí danilíinii éí nihikédaayah yitaideez'ą́.

⁵Éí bąą Bóhólníihii bidine'é bitahdóó doo ła'da tł'óół bee kéyah ałts'á daadzoii nináázhdoołdił da.

⁶Dahalne'ii, T'áadoo daho łne'í, deiłní, nidi doo hoł dahalne'góó t'óó baa yádahodoosįįł.

⁷Jéíkab dine'é danohłį́įgo nihi'dójíii, Bóhólníihii biNíłch'i doósh ha'ólníi da? Díísh bí át'į́? T'áá ákogi át'éego deíkáahii bá shizaad yá'át'éehgo áánííł.

⁸T'áá ániidígo shidine'é ana'ígi át'éego deizį'; bíighah dahizhdikáahii ha'éétsoh áádóó ha'éé' t'áá bił haa deidiyiiłtł'iid, áko anaa'dę́ę́' nináhaaskai nidahojílin.

⁹Shidine'é bitahdóó sáanii danilíinii dabighan yaa bił dahózhóonii biyi'dóó ch'ídahoołtł'ííd; bee ak'ihojidlíii ba'áłchíní baa diní'áanii hool'áágóó bits'ą́ąjį' kódaohłaa.

¹⁰Nídoohjeeh, áádóó nahgóó haohkááh; kwe'é doo háádadoołyįh da; t'óó bahoo'ih hazlį́į'go biniinaa ts'ídá yéego bik'ee ti'hoo'níihgo ó'ooldįįłii bee ánihidi'dooldįįł.

¹¹Diné ła' t'óó áhodil'į́įgo tádígháahii biyooch'íidgo kódííniidgo, Wáin áádóó tó diłhił bee nihił hashne' doo, áko éí díí dine'é yá halne' doo.

¹²Jéíkab dine'é danohłíinii, t'áá ánółtso t'áá aaníí áłah ánihideeshłííł; Ízrel dine'é daadziihígíí t'áá aaníí áłah ádeeshłííł; dibé bighangi dibé ahanineelkaadígi át'éego ahanihodínéeshkał, áko dibé bighan góne' dibé shijée'go hahóół'áhígi át'éego dine'é t'óó ahayóí hahóół'áa doo.

¹³Áko bá ch'íhóót'i'go áyiilaii doogááł, áádóó ąą deideeztą́ągo dáń'dítį́į́h góne' tł'óó'góó ch'ídookah; aláahgo binanit'a'í nilíinii bilą́ąjį' yigáał doo, áko bilą́ąjį' Bóhólníihii hólǫ́ǫgo ch'íhidookah.