Read Navajo MICAH 3 Bible Online

MICAH 3 - Navajo bible

MICAH 3

¹Áádóó ádíshní, Da'íísółts'ą́ą́', Jéíkab dine'é bá nisoozíinii, Ízrel dine'é binanit'a'í danohłíinii, ánihidishní, Doo haada yit'éii nihił béédahózin doo nít'éé'.

²Yá'ádaat'éehii deijoołáii áádóó t'áá íiyisí doo yá'áshóonii ayóó'ádayó'níinii danohłíinii, diné bikágí bik'i dahołdlaad índa bits'in bąąhdóó bitsį' nahjį' adahołdlaad;

³shidine'é bitsį' ałdó' daołghał áádóó dabikágí bik'i dahołdlaad índa dabits'in nidahohtį́įhgo dahołne'; atsį' doobish biniyé bee abézhí biih yi'nilígi át'éego ádaoł'į́.

⁴Áko índa Bóhólníihii yich'į' daacha doo, nidi doo hach'į' ééhodoosįįł da, ákwii nahalzhiishgo binii' hats'ąą neinił'in doo, háálá t'áá íiyisí doo yá'áshǫ́ǫ́góó ádajoonííł.

⁵Shidine'é ádił da'asiihgo ádayiilaii hódadéét'i'go Bóhólníihii kóní, Biwoo' yee da'a'aałgo ádaaní, K'é danohdzin áádóó doo bida'iisánígíí t'óó yik'ijį' anaa' ádeił'į́.

⁶Éí bąą nihił daatł'ée'go doo nihił ádahat'į́į da doo, índa nihił daatł'ée' doo, áko doo álílee k'ehgo nida'ídółkid da doo áádóó áhodooníiłii yaa dahalne'ii doo bá oo'áał da doo índa jínígíí chahałheeł dooleeł.

⁷Áko áhodooníiłii yaa dahalne'ii ádaa yádadínóodzįįł áádóó álílee k'ehgo nida'ídíłkidii t'óó bił dahodooląął; t'áá aaníí, t'áá ádzíłtso hazéé' dádazhdidoolnih, háálá Diyin God doo hach'į' hadoodzih da.

⁸Nidi Jéíkab dine'é bee haz'áanii dayiizti'ii, t'áá éí Ízrel dine'é yee ádił da'asziihii bee bich'į' hadeesdzihgo biniyé t'áá aaníí Bóhólníihii biníłch'i áádóó bibee adziilii áádóó doo haada yit'éii índa bee ayóó ó'óodziilii shii' hadeezbin.

⁹Jéíkab dine'é bá aląąjį' nisoozíinii, t'áá éí Ízrel dine'é binanit'a'í danohłíinii, éí doo haada yit'éii dajiinohłáii áádóó aheełt'éego baa nitsáhákeesii t'áá ałtso áts'ą́ąjį' kódaoł'íinii, díí deísółts'ą́ą́', nihidishní.

¹⁰Záíyan kin haal'áii éí dił bee dahołbį' índa Jerúsalem kin haal'áii éí doo ákwii é'ét'éii bee dahołbį'.

¹¹Aląąjį' naazíinii éí nályééh dayókeedgo nidahwii'aah áádóó nááda'iiłniihii éí adeenáago t'éí nida'ntin índa áhodooníiłii yaa dahalne'ii éí álílee k'ehgo na'ídíkid yee béeso dayókeed, ákondi Bóhólníihii yaa dadzólí nidahalingo ádaaní, Bóhólníihii nihitah hólǫ́, áko t'áá íiyisí doo yá'áshóonii doo nihik'i hwiidooleeł da.

¹²Éí bąą niniinaa Záíyan dá'ák'eh bi ł nihwiildlaadígi át'éego bił nihwidiyooldlał; Jerúsalem éí bik'i dahooyolgo yáádaalk'id dooleeł, Diyin God bikin bii' sohodizin bił haz'ánígi dził éí tsin bee hodíłch'ilgi ninádahałaah doo biniyé wódah nahaz'ą́ągo ádaalyaaígíí nahalin dooleeł.