Read Navajo MICAH 6 Bible Online

MICAH 6 - Navajo bible

MICAH 6

¹K'ad Bóhólníihii ánínígíí deísółts'ą́ą́': Nídoohjeeh, dził daní'áii bidááhdóó aghada'dooht'ááh, dah daask'idii bíni'dii nihiinéé' deidiits'į́į́h.

²Dził danohłíinii áádóó nihí bidziilgo nahasdzáán bee niłdzilii danohłíinii, Bóhólníihii agha'dit'áahgo deísółts'ą́ą́', háálá Bóhólníihii bidine'é yił ałghada'dit'ááh índa Ízrel dine'é yik'i hodidoo'ááł.

³Shidine'é nohłíinii, haa lá nihiishłaa? Ha'át'íísh bee nihíni' yiił'a'? Bee doo ákǫ́ǫ́ ánísht'éii bee shił dahołne'.

⁴Jó, Ííjip kéyahdę́ę́' naalte' danohłį́į́ nít'éé' yę́ędóó nihik'é niná'níshdláago háánihíí'eezh; Mózes áádóó Éran índa Míriyam nihilą́ąjį' adasíł' a'.

⁵Shidine'é nohłíinii, Mó'ab dine'é aláahgo binanit'a'í Béílak yinahazgizii áádóó Bíyor biye' Béílam hach'į' t'ą́ą́' yee hanáádzíi'ii índa Shíttim haz'ánídóó Gílgal kin haal'áajį' áhoodzaii béédaałniih, áko Bóhólníihii bit'áá ákogi át'éii nihił béédahodoozįįł.

⁶Ha'át'íísh yishłéełgo Bóhólníihii áádóó Diyin God aláahgo át'éii bidááhdóó nideesháałgo bich'į' yaa ádeeshnííł? Da' béégashii yáázh ła' binááhaií didlidgo nááháshniihgoósh bidááhdę́ę́' nideeshááł?

⁷Da' deenásts'aa' daamííl bíighahgoósh, doodaii' ak'ah éí neeznáadi mííl tooh danílį́ bíighahgoósh Bóhólníihii bił hóshǫ́ǫ doo? Da' alą́ąjį' shá yizhchíiniísh éí ádił ni'iisíihii bik'é nááhidoonihgo ninádideesh'ááł? Da' shits'íís bineest'ą'ásh éí shii' sizíinii ádił ni'iisíihii bik'é nááhidoonihgo ninádideesh'ááł?

⁸Diné nílíinii, yá'át'éehii nich'į' yit'íní ályaa, áko Bóhólníihii éí haa nít'ée doo, nó'ní: Éí t'áá ákogi ááníił doo áádóó ajooba' ayóó'ííní'níi doo índa a' ohgo ánít'éego niDiyin God bił yí'ash doo.

⁹Bóhólníihii éí kin haal'áii yich'į' chánahgo biinéé' diits'a' áádóó diné éí nízhi' yidósingo hóyą́; tsihał índa éí niinítáanii bik'eh dahonoł'į́.

¹⁰Doo yá'ádaashóonii bee yódí shódaozt'e'ii índa ina'adlo'go bee ha'iikaahí éí doo yildinii t'ahdiísh diné doo yá'ádaashóonii bighan góne' hólǫ́?

¹¹Bee dah nídiidlohí doo yá'áshóonii índa dah na'alo'ii bina'adlo'go azis bii' sinilii t'áá bee dahólǫ́ǫgoósh doo ádaat'éhígóó bá hadeesdzih?

¹²Jó, diné da'at'íinii éí ádílááh bii' daahééł áádóó yił kéédahat'íinii éí wooch'ííd ádeił'į́ índa na'adlo' yee yádaałti'.

¹³Éí bąą atídanihishłéhígíí ałdó' bik'ee nihitah doo dahats'íid da doo, índa ádił nida'ayohsííh biniinaa nihinaagi doo siláhígóó ádeeshłííł.

¹⁴Da'ooyą́ą' nidi, doo hwiih dadohłeeł da áádóó t'áá dichin danihiiłhée doo áádóó t'áadoo le'é hasht'e'nidasooláa nidi, doo áá dasoohsįįd da doo índa hasht'e'nidasooláhígíí diltłish bee nihighadadoolyééł.

¹⁵K'idadi'dohłéeł nidi, doo da'doohhish da áádóó áliv bineest'ą' bik'i nidoohkahgo bik'ah bąąh hadahidoohnihgo doo bee adadidoołtłah da índa ch'il na'atł'o'ii bik'i nidoohkah, nidi wáin doo dadoohdlį́įł da.

¹⁶Háálá Ámri yee nihwiiz'áanii áádóó Éíhab bighandóó baa na'aldeehii kót'éego daaníinii bida'oł'į́įgo bik'eh dayínóhkááh; éí bąą kints'iil t'éiyágo ándeeshłííł índa nii' kéédahat'íinii nihída'diłts'ǫǫsgo ádeeshłííł; kót'éego shidine'é nohłíinii bee á nahat'i'ii bił deínóhkáah doo.