Read Navajo NAHUM 1 Bible Online

NAHUM 1 - Navajo bible

NAHUM 1

¹Níneveh bee bide áhodooníiłii Élkash haz'ą́ą́dę́ę́' diné Néíham wolyéii bił ádzaii naaltsoos bikáá' ályaa.

²Diyin God łe'nízin áádóó Bóhólníihii k'ééhidi'nééh; Bóhólníihii k'ééhidi'néehgo hashké nídzingo atí'éł'į́. Bóhólníihii éí bik'ijį' danilíinii k'éididoodlííł áádóó t'óó báhádzidgo hashké nídzingo yee bi'ana'í t'éí atíidoolíiłgo hasht'eyósin.

³Bóhólníihii tąądee báháchįįh áádóó ts'ídá ayóó át'éego bidziil índa t'áá íiyisí doo yá'áshónígi ádajíít'įįdígíí doo t'óó haididoo'áał da. Bóhólníihii éí nááts'ó'oołdísii áádóó níyoltsoh bee bik'eh hólǫ́ índa k'osígíí éí bikétł'ááhdóó łeezh dibahí adiijoołii át'é.

⁴Tónteel néiditehgo nínéíłtsih, índa tooh danílíinii ałtso nínádeiłtsih. Béíshan kéyahgi áádóó Dził Kármelgi ałtso dahazgan. Dził Lébanangi ch'ilátah hózhóón bił dahazgango bił yóó'ahóóyá.

⁵Bóhólníihii binááł dził nídahidi'nááh, áádóó dah daask'id dahidiłhį́į́h, índa binááł nahasdzáán de áńdaat'įįh. T'áá aaníí, nahasdzáán áádóó yikáá' kéédahat'íinii ákónídaat'įįh.

⁶Doo hasht'é'égóó báháchįįhgoshą' háí bidááhdóó yidoozįįłgo yíneel'ą́? Doo chohoo'į́į́góó báhóóchįįdgoshą' háí yíníłdzilgo yíneel' ą́? Kǫ' nahalingo yee hashké nídzinii naanídzoosxih áádóó tsé ałts'ádahadlaadgo áyoolííł.

⁷Bóhólníihii jooba'. Ach'į' nahwii'náago yoołkáałgi bine' na'adzi'ii nilį́ índa biniit'aa dahinichéehii yééhósin.

⁸Nidi tó yíląądgo wó'ądadziiłhaałgo yee ałtso ni'diyoołchxǫǫł áádóó chahałheeł góne' bi'ana'í iidínóołkał.

⁹Ha'át'íishą' bee Bóhólníihii bindahohgiz? Bí t'éiyá bíniik'ehgo nihodoogáałgo doo naakidi ach'į' nináhodiyoo'naał da.

¹⁰Ch'il deeníní ałtaaneesdiz nahalingo índa adláanii nídadí'néesdlą́'ígíí nahalingo ehégod daazganii adoolk'ą́'ígi át'éego ádabidi'dooldįįł.

¹¹Nihits'ą́ą́dóó ch'íníyáii éí Bóhólníihii yik'ijį' doo yá'át'ééhgóó naha'á. Éí kót'é níinii doo yá'áshóonii nilį́.

¹²Bóhólníihii kóní, Azhą́ bił dahodéesyéel nidi, índa t'óó ahojíyóí nidi, a łtso ádahodi'dooldįįłgo hoł yóó'ahodoogááł. Azhą́ atínihish'į́į́ nít'éé' nidi, doo atínáánihideeshdlíił da.

¹³Háálá k'ad bi'azéédéetį́hí nąąh k'ídeeshtih, áádóó bee dah nidiistł'óonii k'ídeeshnish.

¹⁴Nízhi' doo bee nááni'dójíigo oochíił da dooleełígíí áádóó nidiyin dabidi'níinii bá kin si'ą́ągi eda'alyaii bik'i nida'ashk'aazhii áádóó eda'alyaii nídadoolyį́į'ii ałtso ádeeshdįįł. Jishcháá' ná áhodeeshłííł, háálá ts'ídá t'áá íiyisí t'óó baa'ihii nílį́, níigo Bóhólníihii ná haadzíí'.

¹⁵Dziłghą́ą'di hane' baa hózhóonii éí bee hózhǫ́ náhoodleełii yaa halne'ii bikee' níníł'į́! Dooládó' Júdah dine'é nohłíinii, hodílzingo áłah nídaohdleehii hazhó'ó ádeínóhsin; bee ádee hadahidohdziihii bida'íínóhsin. Háálá doo yá'ádaashóonii yę́ę ádabidisdįįdgo ts'ídá doo nihik'i nináádookah da.