Read Navajo NAHUM 2 Bible Online

NAHUM 2 - Navajo bible

NAHUM 2

¹Adiséii nich'į' nínáádiibaa'. Bine' na'adzi'ii hazhó'ó baa ádahołyą́; deínóhkááhgóó hada'ísídół'į́į́'; bee áká dasoołzaazígíí bidziilgo ádaahłééh; ayóó át'éego nihibee adziilii bee nihits'ádahazyée'go ída'dołnééh.

²Jó, Bóhólníihii éí Ízrel dine'é yee ayóó át'éii yę́ęgi át'éego Jéíkab dine'é yee ayóó át'éii hasht'eilééh. Háálá t'áá ákohígo nida'iiníiłii t'áá ákohígo nidabiiznil áádóó bich'il na'atł'o'ii bits'ádaoz'a' nidayiishchxǫ'.

³Bisiláo ayóó ádabóodziilii binaage' daalchíi'go ádaalyaa. Diné doo nídanilyéesii bi'éé' daalchxíí'. Hasht'e'hodiidzaa bijį́į́ góne' tsindaabąąs bijáád naakiígíí bik'i dazdéedlaad áádóó tsin sáípras wolyéii bee tsiidétáán ádaalyaii daditsxiz.

⁴Kintah nida'aztiingóó tsindaabąąs bijáád naakiígíí ayóogo bił deíjeeh. Hóteelgo da'nítiingóó ahínídadeelwo'go bił deíjeeh. Honooyééł jidoonił nidahalin. Atsiniltł'ish anídahata' nahalingo deíjeeh.

⁵Bihashkééjí naat'ááh danilíinii yénálniih. Deíkáahgo nídadigoh. Ditą́ągo binaa ahéé'ítł'iníjį' tsxį́į́ł daazlį́į́'. Nidi bine' na'adzi'ii t'áá íídą́ą́' hasht'eelyaa.

⁶Tooh danílíinii bidádadeeztáanii ąą ádaalyaa, áko aláahgo naat'áanii bikin nídíí'éél.

⁷Áko asdzą́ą́ naat'ááh dah bidi'diidlóozgo bidis'ná. Hasbídí ádaanínígi át'éego bi'at'ééké daachago biyid nídeiniłts'in.

⁸Níneveh kin haal'á éí t'áá náshiinídą́'ídi tó siyį́ nahalingo haz'ą́ą nidi, t'áá ałtso éí yits'ą́ą́' dah diijéé'. Nidasoozínéii, nidasoozínéii, ch'ééh deiłníigo daachxa, nidi t'áadoo t'ą́ą́' nídadéest'į́'í aheezhjéé'.

⁹Béésh łigaii daałnééh, óola ałdó' daałnééh, háálá bee at'íinii ts'ídá t'óó ahayóí ayóó át'éego baa hózhóonii doo óodįįh át'éégóó hólǫ́.

¹⁰Kin haal'áagi hólóonii ałtso nídahasdláá' áádóó doo yiila'í da, índa kin haal'áhígi doo siláhí da. Áko bijéí bąąh náádahaka'. Bitah dahoditłidgo bigod ahídadínídah. T'áá ałtso biníí' gónaa daneezgai. T'áá ádzíłtso dajiichxii' daznoos'níí'.

¹¹Háadishą' náshdóítsoh bitsiijį' daditł'ooígíí a'áán shijéé'? Áadi náshdóítsoh bitsiijį' daditł'ooígíí biyázhí ya'altso'. Ákwii lá náshdóítsoh bitsiijį' ditł'ooígíí áádóó bi'áadii índa biyázhí doo yéédaaldzidígóó naakai.

¹²Náshdóítsoh bitsiijį' ditł'ooígíí éí kódaníshéhígo biyázhí yá ni'iiníísh áádóó naaldlooshii yizák'ídeidiyiiníihgo dabi'ádígíí yá niiníyį́. Haashzhee'ii dabi'áán góne' bee ída'azįįdgo áyiił'įįh áádóó yíkaashzhee'ii dabi'áán góne' áłah áyiił'įįhgo bee ída'azįįd.

¹³T'áá ałtsoní bee Bóhólníihii kóní, Nihik'ijį' nishłį́, áádóó łid hahíítį́įgo hatsindaabąąs bijáád naakiígíí adadideeshk'ą́ą́ł, jó'akon. Áko nihináshdóí yáázh bitsiijį' daditł'ooígíí diltłish bee ałtso deeshhą́ą́ł, áádóó nihokáá'góó hadaołzheehii ałtso ádeeshdįįł, índa nihá nidaal'a'í biinéé' doo náádadiits'a' da doo.