Read Navajo HABAKKUK 1 Bible Online

HABAKKUK 1 - Navajo bible

HABAKKUK 1

¹Habákak éí Diyin God yá halne'ii jílíinii hanaagóó áhoot'éii baa ákozniizį́į́'.

²Bóhólníihii nílíinii, haash nízáagi ch'ééh nánooshkąąhgo doo shíísíníłts'ą́ą' da doo? Doodaii' t'áá na'níle'dii áhooníiłii biniinaa nánooshkąąhgo doósh t'áá k'ad yisdá'íínínil da?

³Ha'át'íishą' biniyé doo ákwii ádaat'éii yish'į́įgo áshiinilaa áádóó doo yá'áshóonii nísh'į́įgo áshíínísin? Jó, nida'iiłchxǫǫh índa t'áá na'níle'dii áhooníiłii t'éí shinááł baa ooldah; ahiní'diiltłáád áádóó ałgha'dit'ááh baa ooldah.

⁴Éí bąą bee haz'áanii doo bi'ólzin da, áádóó doo ts'ídá ákóne' át'éego ánihót'ááł át'ée da. Háálá doo yá'ádaashóonii éí ts'ídá t'áá ákwii ádaat'éii yináhookah, éí bąą t'óó dzólníígóó ándahwiit'aah.

⁵Ał'ąą dine'é bitahgóó dadínóh'į́į'go, dooládó' da! Ayóó át'éego ádahooníiłii t'áá íiyisí bik'ee t'óó nihił adahayóí, háálá níyoołkááł biyi' naanish baa naasháii, azhą́ éí bee nihił hóóne' nidi, doo deidoohdląął da.

⁶Háálá Kaldíya dine'é nídahidiikáahgo ádeeshłííł, jó'akon; éí dine'é bik'eda'íyée'ii índa ee nidahodilzhǫ'ii danilį́įgo kéyahgóó dabighan doo biniyé t'áadoo daabíi'ii yich'į' nídahidiibáahgo nidayiiłnée doo.

⁷T'óó báádahadzid índa bik'eda'íyéé'. Yee á nidahwii'aahii índa yee bídahólníhígíí t'éí t'áá bí yaa deíkááh.

⁸Náshdóítsoh daalkizhii dadilwo'ígíí bilááh át'éego dabilį́į́' ayóó ádeídóolwo'; e'e'áahgo mą'iitsoh hashké daniidzįįhígíí bilááh át'éego hashké dandzin. Bisiláo łį́į́' yee nidaabaahii t'áá nízaadę́ę́' łį́į́' bił yijah. Bisiláo łį́į́' yee nidaabaahii atsági át'éego yidooyį́įłii yich'į' nídiilwo'go yił haat'ahígi át'éego naaldeeh.

⁹Ha'a'aahdę́ę́' deeyolígi át'éego t'áá na'níle'dii t'óó báhádzidgo nidahakááh índa séigi ánéelą́ą'go yisnááh áłah ádeilééh.

¹⁰Aláahgo naat'áanii danilíinii t'óó yaa daadloh áádóó aláahgo bídahólníihii t'óó yá nidahałt'i'. Bine' na'adzi' bił nidahaz'áanii t'óó yaa daadloh, háálá łeezh bíilk'idgo ádeile'go deiłné.

¹¹Níyol nahalingo łahjigo ádooníiłgo ch'ídookah; bihodiit'i'ii dine'é danilį́; t'áá bí bibee adziilii t'éí bidiyin ádayósin.

¹²Bóhólníihii shiDiyin God, ni t'éiyá shiDiyin nílíinii, hool'áádę́ę́' honílǫ́. Doo dadíníi'néeł da. Bóhólníihii nílíinii, atídanihił'į́į doo biniyé náhíníláá'. Diyin God ayóó ábóodziilii nílíinii, bee hasht'eniná'dooldah biniyé hasht'einilaa.

¹³Nináá' diyingo bąą t'óó baa'ihii níníł'į́įgo doo bohónéedzą́ą da áádóó doo yá'áshóonii doo níníł'į́į da; ákoshą' ha'át'éego diné indahagizii bich'oní'ní índa diné doo yá'ádaashóonii bilááh át'éego diné t'áá ákogi át'éii ádayoołdįįłgo t'óó dííníłhéél?

¹⁴Ha'át'éegoshą' tónteel bii' łóó' naaldeehígi át'éego áádóó nidaa'na'ii binanit'a'í bee ádin nahalingo diné íinilaa?

¹⁵Kaldíya dine'é éí biłóó' bee hahadleehí yee ałtso hadayiileeh; biłóó' bee biya'ayiiltsósí bii'dę́ę́' hadayiijááh, łóó' bee hahaltsósí yii' hééł ádahale'. Éí bąą haa bił dahózhǫ́ǫgo bił nidahoozhǫǫh doo.

¹⁶Éí bąą biłóó' bee biya'ayiiltsósí yich'į' nááda'iiłniih índa biłóó' bee hahaltsósí yich'į' tsin bijeeh łikání halchinii deidiłidgo náádayiiłniih, háálá éí bee lą'í łóó' hadayiiłtsóós índa bich'iyą' bee ída'azįįd.

¹⁷Da' biłóó' bee hahaltsósíísh doo bii' siláhígóó ádeidoolííł índa ał'ąą dine'éésh doo yaa hą́ą́h nízingóó t'óó áyoołdįįł doo?