Read Navajo HABAKKUK 3 Bible Online

HABAKKUK 3 - Navajo bible

HABAKKUK 3

¹Diyin God yá halne'ii Habákak bisodizin Shigiyónoth bik'ehgo bee hatáál.

²Bóhólníihii nílíinii, naa hane'go diséts'ą́ą'go néésísdzííd. Bóhólníihii nílíinii, nináháháhígíí ałníí'góó hoolzhishgo ninaanish ániidí áńdíídlííł. Nináháháhígíí ałníí'góó hoolzhishgo ninaanish bééhózingo áńdíídlííł. Náháchįįhgo ne'a'áhí hasin béénílniih doo.

³Tíímandę́ę́' Diyin God honíle', áádóó Dził Péíran hoolyéédę́ę́' Diyin Nilíinii níyá. Síilah Yee ayóó át'éii éí yót'ááh hiníláii yik'i dah yiskaad, áádóó nahasdzáán nidahonees'ą́ą́góó bee baa ha'niih.

⁴Bee bits'ádi'nílíidii adinídínígi át'é. Bílák'eedóó shá bitł'óól hanoolzhee'; ákwe'é lą́ą bibee adziilii hólónígíí doo yit'į́į da.

⁵Bitsijį' honíłnii' áádóó bikéédę́ę́' naałniih níłnii'.

⁶Yiizį'go nahasdzáán yikáá'góó ha'íísid, áko naazghalgo ał'ąą dine'é bitah dahoditłid; t'áá ałk'idą́ą́' dził naaznilii dahidiitaa'; t'áá ałk'idą́ą́' dah daask'idii yaa ádaadzaa. Yee át'éii éí hool'áágóó hólǫ́.

⁷Kúshan kéyahgi níbaal yii' kéédahat'íinii nitseekaigo áádóó Mídiya dine'é bikéyahgi dah na'azbaalígíí daditłidgo yiiłtsą́.

⁸Łį́į́' bee nida'abaahii áádóó nitsindaabąąs bijáád naakiígíí bee yisdá'iildéehii bee nanibaah yę́ędą́ą́', Bóhólníihii nílíinii, tooh danílínígíísh bich'į' doo nił hóózhǫǫd da? Da' tooh danílínígíísh bich'į' náhóóchįįd? Doodaii' tónteel siyínígíísh bich'į' hashké ninidzį́į́'?

⁹Ne'ełtį́į́' báá'dooltsoozgo yee atí'doolíiłii yee ádee haadzíí'. Síilah Tooh danílínígíí bee nahasdzáán bikáá' dabikooh áhwiinilaa.

¹⁰Dził daniiłtsą́ągo bitah dahoditłid, tó dááląądígíí ayóó ádeits'a'go adahaazna'.

¹¹Jį́honaa'éí áádóó tł'ééhonaa'éí éí k'aa' be'adinídíinii áádóó nitsiidétáán bee i'díídláadgo yiyiiłtsą́ągo t'áá ákǫ́ǫ́ niiltłah.

¹²Kéyahgóó hashké ninidzį́į'go hadininá; ał'ąą dine'é bik'i nisíníyáago náhóóchįįdii bee yishíníłch'ii'.

¹³Nidine'é yisdáhidookah biniyé yíníyá; t'áá éí déínísį́į'ii yisdáhidookah biniyé yíníyá. Doo yá'ádaashóonii bighandóó atsijį' naazíinii dashíníłjizh; bik'ai'dóó bik'osjį' ałtso yíníłchxǫ'. Síilah

¹⁴Bi'anada'ał'íinii t'áá bí bitsiidétáán bitsiits'iin bighá dasínísi'. Nááts'ó'oołdísiitsoh nahalingo tanihiidooghas biniyé shaatįįh náásą́. T'áá nahont'inee badahojoobá'íii deildeełiigi át'éego bił nidahoozhǫǫh.

¹⁵Tónteel éí ayóó át'éego yilk'oołgo bikáá' ha'naa łį́į́' nił niikai.

¹⁶T'óó diséts'ą́'ígo bik'ee shitsą́ hoditłid silį́į́', áko iinéé' t'óó diséts'ą́'ígo shidiisnáa'go bik'ee shidaa' ditłid, shits'in dííłdzid nahalingo doo shidziil da sélį́į́' áádóó bik'ee t'áá íiyisí shitah hoditłid. Nidi diné yighadahodidoot'ááł biniyé bisiláo yił nídooséłígíí bich'į' nidahodiyoo'naał beiníłką́ bijį́į́ góne' ha'óshníigo biba' ánísht'ée doo.

¹⁷Azhą́ fig sikaadígíí bizóól doo bąąh nídahasdlį́į' da nidi, áádóó ch'il na'atł'o'ii bineest'ą' doo bąąh nídahasdlį́į' da nidi, áádóó áliv sikaadígíí bineest'ą' doo bąąh nídahasdlį́į' da nidi, áádóó dáda'ak'ehgóó ch'iyáán t'áadoo nídahasdlį́į' da nidi, áádóó dibé bighangi dibé doo ła' yidzíi' da nidi, índa béégashii nída'ałchoshígi béégashii doo ła' naagháa da nidi,

¹⁸ákondi Bóhólníihii t'ahdii baa shił nihoozhǫǫh doo, Diyin God bee yisdááyáii baa shił hózhǫ́ǫ doo.

¹⁹Bóhólníihii Diyin God bee shidziilii nilį́, bįįhtsa'ii dilwo'ígi át'éego shikee' bee doo shił nahontł'agóó áádóó shi'aghádahaz'áágóó naasháago áshósin.