Read Navajo ZEPHANIAH 3 Bible Online

ZEPHANIAH 3 - Navajo bible

ZEPHANIAH 3

¹Kin haal'áagi ts'ídá t'óó baa'ihii áádóó ni'iiłchǫǫhii índa ade áhósinii doo hojooba' ájíníi da!

²Doo ła' yik'eh hół'íní da; ts'ídá doo k'éhézdon nináodza' át'ée da; Bóhólníihii doo yaa dzólíi da; biDiyin God doo yit'áahjį' dóya' át'ée da.

³Binanit'a'í danilíinii éí náshdóítsoh bitsiijį' daditł'ooígíí bii' nidahodi'ni'ii nidahalin; e'e'áahgo mą'iitsoh nidaajeehígi át'éego bi'ádahwée'aahii nidaajeeh; éí abíníjį' ts'in yídeigháashgo doo ła' ninádeítįįh da.

⁴Áhodooníiłii yaa dahalne'ii t'áá ádzaagóó dahalne' áádóó doo bada'ahódlíi da; binááda'iiłniihii éí hodiyingo haz'áanii dayííłchxǫ'; bee haz'áanii nideigizgo chodayoos'įįd.

⁵Biníi'gi Bóhólníihii t'áá ákogi át'éii hólǫ́; doo yá'ádaat'éehii doo íidoolíił da. T'áá ákwíí abíní doo haada yit'éii yee nihwii'aahii yit'íní áyósin; t'áadoo ch'ééh ííł'íní da, nidi doo t'áá ákwii ájít'éii éí yáhásin doo hoł bééhózin da.

⁶Ał'ąą dine'é yíghą́ą́', yada'niiltł'ónígíí t'áá ádzaaí silį́į́'; bikintaa da'aztiinígíí t'áá ádzaaí áshłaago doo ła' ákǫ́ǫ́ naagháhí da; dabikin hadaas'áii ałtso áséłdįįd; diné doo ła' ákwii naagháhí da; doo ła' ákwii kééhat'íní da.

⁷Áko ádíshní, T'áá aaníí, shidíínísin doo, na'nitin nił nilį́į doo, áko t'áá ha'át'éegoda atíishłaago kéédahat'į́įgi doo nahjį' kódeeshłíił da, nidi t'áadoo hodinaahí nídahidiikaigo t'áá bí yaa nidaakaii ałtso dayííłchǫ'.

⁸Bóhólníihii ání, Éí bąą naalzheehii bich'į' nídiisdzá bijį́įjį' shiba' ánít'é, háálá ał'ąą dine'é áłah ádeeshłíiłgo nidiní'ą́, áko bee óhólníihgo bił nahaz'áanii áłah íishłaago ts'ídá t'óó báhádzidgo sháháchį'ii bee bik'i hwiideeshłeeł; ts'ídá doo chohoo'į́į́góó sháhodoochįįł. Jó, bee łe'nisinii bee nahasdzáán ts'ídá ałtso adideeshk'ą́ą́ł.

⁹Áko índa shidine'é saad niłts'íilgo bá ádeeshłíiłgo Bóhólníihii bízhi' dayózhíigo t'áá ła' bizhi'ee yá nidaal'a' dooleeł.

¹⁰Iithiyópiya kéyahdóó tooh danílínígíí bilááhdę́ę́' nídashookąąhii shits'ą́ą́' tadaoskaii ba'áłchíní éí nááhidoonihii shaa dayiijáah doo.

¹¹Éí bijį́įdi baa nidasoohkaii shich'į' ádił nidaałteehgo ádił nida'iyoołzí'ígíí t'áá ałtso doo nihił baa yádahasin da doo, háálá nihiníí'dóó bee ádaa dadzíínóhdlíii nahjį' kódeeshłííł, áádóó shidził diyinii biniinaa t'áadoo ła' ádaa hodzódlíigo aghá'ádooł'áhí da dooleeł.

¹²Nihiníi'jį' diné a'ohgo ádaa nitsídaakeesii áádóó hojooba' ádaat'éii bi'deeshnihgo Bóhólníihii bízhi' yaa dadzólíi dooleeł,

¹³Ízrel dine'é daadzí'ígíí doo ádił nida'iilzíih da doo, doodaii' doo dabiyooch'íid da doo; doo nidi binda'adlo'go yádaałti' da doo, háálá bida'iilzą́ą doo áádóó nídanjah dooleeł, áko doo ła'da bił yéé' áhodoolíił da.

¹⁴Záíyan bitsi' nílíinii, ayóó íits'a'go hótaał! Ízrel dine'é nohłíinii, hadadołgháásh! Jerúsalem bitsi' nílíinii, nijéí t'áá át'é bee nił nihoozhǫǫhgo nił hózhǫ́ǫ le'.

¹⁵Bóhólníihii éí nánihoot'áanii nahjį' kóyiilaa; nida'ana'í baa ch'íheezhjéé'. Ízrel dine'é aláahgo binanit'a'í éí Bóhólníihii nilíinii nihiníí'góó hólǫ́. Doo yá'ádaat'éehii doo nik'i nááhwiidoodleeł da.

¹⁶Éí bijį́įdi Jerúsalem kóbidi'doo'niił, T'áadoo nił yé'í, Záíyan nílíinii, nigaan t'áadoo t'óó nąąh nahíínilí.

¹⁷Bóhólníihii nihiDiyin God éí nihitahgi ayóó ábóodziilii nilį́; bí yisdá'iiníił doo, t'áá íiyisí naa bił hózhǫ́ǫgo naa bił nihoozhǫǫh doo; bibee ayóó'ó'ó'níinii bee bił hodéezyéel dooleeł; naa bił hózhǫ́ǫgo hataał doo.

¹⁸Záíyan bits'ą́ą́dóó danilíinii hodílzingo áłah ná'ádleeh nídeit'aahii yídin danilį́įgo bá nidahat'i' yik'ee yínííł danilíinii áłah ádeeshłííł; éí ánahat'i' bił yáádayiitsih.

¹⁹Éí hoolzhishdi nich'į' nidahwiiłnáanii t'áá ałtso baa nídéesht'įįł, jó'akon. Áádóó dadí'néesxodígíí yisdádeesh'nił, áko ch'ídabidi'niiskaadii áłah áńdeeshdlííł; kédaayahgóó t'óó baa yáhásingo ádabi'dil'íinii baa daha'niihgo áádóó ch'ídabidit'áahgo ádeeshłííł.

²⁰Éí hoolzhishdi nánihideesh'ishgo áłah ánánihideeshdlííł. T'áá aaníí, nihokáá' dine'é t'áá ałtso bitahgóó néého'dílzingo áádóó naa ha'niihgo yisnááh danohłíinii nihinááł nahjį' kódeeshłíiłgo danihíí' nít'éé' yę́ę nihíí' nídadoodleełgo ádeeshłííł, ní Bóhólníihii.