Read Navajo HAGGAI 2 Bible Online

HAGGAI 2 - Navajo bible

HAGGAI 2

¹Tsosts'id nídízííd binih naadiin ła'góó yoołkáałgo Diyin God yá halne'ii Hágeiyai éí Bóhólníihii áníinii baa hojoolne',

²Shiyáltiyel biye' Zerábabel éí Júdah kéyahgi naat'áanii áádóó Jásedek biye' Jéshuwa alą́ąjį' náá'iiłniihii nilíinii índa diné daadziihígíí kódíníigo bich'į' handziih,

³Háishą' nihitahdóó daohdziihígíí átséédą́ą́' díí kin ayóó ánóolningo si'ą́ą́ nít'éé' yę́ę daołtsą́? K'adshą' hait'éego daah'į́? T'áadoo biniyéhí daásh danohsingo danół'į́?

⁴Bóhólníihii ání, Zerábabel, nidziilgo í'díínílzin áádóó Jásedek biye' Jéshuwa alą́ąjį' náá'iiłniihii nílíinii, nidziilgo í'díínílzin índa kéyahdóó dine'é danohłíinii t'áá ánółtso, danihidziilgo ída'díínółzingo nidaałnish, ní Bóhólníihii, háálá nihił dahonishłǫ́, ní t'áá ałtsoní bee Bóhólníihii.

⁵Ííjip kéyahdę́ę́' ch'ínoohkai yę́ędą́ą́' t'áá bee nihoní'áanii bik'ehgo shiNíłch'i bee nihitahgóó honishłǫ́; t'áadoo nihił daayé'í.

⁶Jó, t'áá ałtsoní bee Bóhólníihii kóní, T'óó hodíínáá'ígo yádiłhił áádóó nahasdzáán áádóó tónteel índa ni'da t'ááłáhídi náádeeshhał,

⁷áko ał'ąą dine'é t'áá ałtso bitah dahodiyeeshnááł áádóó ał'ąą dine'é t'áá ałtso deit'íinii yił yah ahodooleeł índa kin biyi' góne' ts'ídá ayóó át'éii bii' hadideeshbį́į́ł, ní t'áá ałtsoní bee Bóhólníihii.

⁸Béésh łigaii áádóó óola éí daashí, ní t'áá ałtsoní bee Bóhólníihii.

⁹Ch'óóshdą́ą́dą́ą́' át'éé nít'éé' yę́ę biláahgo át'éego díí kin ayóó át'ée dooleeł, ní t'áá ałtsoní bee Bóhólníihii, áádóó kwe'é hasht'ehodít'éego haz'ą́ągo áhodeeshłííł, ní t'áá ałtsoní bee Bóhólníihii.

¹⁰Daráíyas aláahgo naat'áanii nilį́įgo naaki náhááh góne' náhást'éí nídízííd binih naadiin dį́į́'góó yoołkáałgo Diyin God yá halne'ii Hágeiyai éí Bóhólníihii bizaad baa hojoolne',

¹¹T'áá ałtsoní bee Bóhólníihii kóní, K'ad nááda'iiłniihii díí bee haz'áanii bídadéét'i'gi bíndabídíłkid,

¹²T'áá háiida bi'éé' yee atsį' dílzinii yoo'áałgo éí bááhda, atoo'da, wáinda, ak'ahda, doodaii' ch'iyáán ła'da ha'éé' bíhidéé'náa'go dílzinísh dooleeł? Áádóó nááda'iiłniihii hadaasdzíi'go ádaaní, Nidaga'.

¹³Ákohgo Hágeiyai ání, T'áá háiida éí diné daaztsáanii bizhdeelchidgo chin dzizlį́į'go éí díí daadáanii bizhdeelchidgo da' éísh ałdó' doo dílzin da dooleeł? Nááda'iiłniihii hadaasdzíi'go ádaaní, Doo dílzin da dooleeł.

¹⁴Áko Hágeiyai haadzíi'go ání, Lą́'ąą, díí diné áádóó díí dine'é shináałgo ákódaat'é, ní Bóhólníihii, índa t'áá ałtso yindaalnishii ałdó' ákódaat'é, áádóó áadi náádayiiłniihígíí éí doo dadílzin da.

¹⁵Áko k'ad ánihidishní, Díí jį́į́dóó náásgóó baa nitsídaohkees: t'ah doo Bóhólníihii bikin bii' sohodizingi tsé ła' ałk'i dah yit'aah yę́ędą́ą́';

¹⁶íídą́ą́' ła'da tł' oh naadą́ą́' naadiindi yikááł bíighahgo yanáa'á jinízingo biniyé jiníyáá nít'éé' t'áá neeznání yikááł lá; ła'da ch'il na'atł'o'ii yiljizhgi ashdladiindi yikááł bíighahgo jinízingo biniyé jiníyáá nít'éé' t'áá naadiiní yikááł lá.

¹⁷Nihí índa k'idadooláii dibáá' áádóó dláád índa níló bee atínihiishłaa, nidi t'áadoo shich'į' ninánoohkai da, ní Bóhólníihii.

¹⁸Díí jį́į́dóó índa náásgóó díí baa ntsídaohkees: náhást'éí nídízííd binih naadiin dį́į́'góó yoołkáałgo Bóhólníihii bikin bii' sohodizin bitł'ááh nástł'inii áłtsé ahéédasootł'inii éí hazhó'ó baa nitsídaohkees.

¹⁹Da' nooh nída'achííh góne'ésh tł'oh naadą́ą́' t'ahdii daanoo'? T'áá aaníí ch'il na'atł'o'ii áádóó fig sikaadii áádóó pámgrenit sikaadii índa áliv sikaadii t'ahdii doo bineest'ą' dahaleeh da; ákondi díí jį́į́dóó náásgóó nihik'ijishdlíi doo.

²⁰T'áá éí yiziłígíí naadiin dį́į́' yoołkááł góne' Hágeiyai éí Bóhólníihii kóníigo néidiizts'ą́ą́',

²¹Júdah dine'é binanit'a'í Zerábabel bich'į' handziihgo ábidiní, Yádiłhił índa nahasdzáán deeshhał;

²²bee ídahólníihii bił nahaz'ą́ą́góó bee bídahólníihii bik'eh dideeshdleeł, áádóó ał'ąą dine'é bił nidahaz'ą́ą́góó bee dabidziilii ádadeeshdįįł, áádóó tsindaabąąs bijáád naakiígíí áádóó yii' dah naazdáii bik'eh dadideeshdleeł índa łį́į́' áádóó yee nidaabaahii t'áá bił naa'ahidínóodah; t'ááłá'í jinítínígo hak'is éí diltłish yee nidahodoołtsił.

²³T'áá ałtsoní bee Bóhólníihii ání, Éí bijį́įdi Shiyáltiyel biye' shinaal'a'í Zerábabel nándideeshtééł, ní Bóhólníihii, áádóó yoostsah bee na'nt'áhígíí nahalingo ándeeshłííł, háálá ni nándiiłtį́, ní t'áá ałtsoní bee Bóhólníihii.