Read Navajo ZECHARIAH 1 Bible Online

ZECHARIAH 1 - Navajo bible

ZECHARIAH 1

¹Daráíyas aláahgo naat'áanii nilį́įgo naaki náhááh góne' tseebíí nídízííd binih Ído biye' Berekáíyah, éí biye' Diyin God yá halne'ii nilíinii Zekaráíyah éí Bóhólníihii ábíłní,

²Bóhólníihii éí danihizhé'é yę́ę yich'į' t'áá íiyisí doo bił náhójǫǫh da nít'éé'.

³Éí bąą kóbidiní, T'áá ałtsoní bee Bóhólníihii kóní, Shaa náhóhkááh, ní t'áá ałtsoní bee Bóhólníihii, áko nihaa nídeeshdááł, ní t'áá ałtsoní bee Bóhólníihii.

⁴T'áadoo danihizhé'é yę́ę ádáát'įįdígi ádanoht'éhí; éí ch'óóshdą́ą́dą́ą́' dahojilne'í dajílíinii ádazhdííniid, T'áá ałtsoní bee Bóhólníihii kónihiłní, T'áá íiyisí doo yá'áshǫ́ǫ́góó ádanoht'éii índa doo yá'áshǫ́ǫ́góó ádaaht'į́įgo deínóhkáahii bits'ą́ąjį' ninádahohkááh, nidi t'áadoo da'diizts'ą́ą' da, doo nidi dashíists'ą́ą' da, ní Bóhólníihii.

⁵Danihizhé'é yę́ęshą', háadi nidaakai? Áádóó dahojilne'í dajílíinii hool'áágóósh dajiiná?

⁶Nidi shizaad índa bee nihoyí'áanii éí shá naal'a'í dahojilne'í dajílíinii hach'į' bee haasdzíi'ii danihizhé'é yę́ę ts'ídá bik'idiyaa násdlį́į́'. Ákohgo łahgo át'éego tsíńdadeezkéezgo ádadííniid, Bee ádaniit'éii áádóó ádeii'níłígíí bik'ehgo t'áá ałtsoní bee Bóhólníihii nihá yee nihodiní'áanii yee nihainíst'įįd.

⁷Daráíyas aláahgo naat'áanii nilį́įgo naaki náhááh góne' Sííbat wolyéii ła'ts'áadah nídízííd binih naadiin dį́į́'góó yoołkáałgo Ído biye' Berekáíyah, éí biye' Diyin God yá halne'ii nilíinii Zekaráíyah kót'éego Bóhólníihii bizaad baa honíle',

⁸Tł'ée'go shił áhoodzaago diné léi' łį́į́' łichíí' léi' bił yildloshgo yiiłtsą́, jó'akon. Bokooh góyaa mértal naazkaadígíí bitahgi łį́į́' bił sizį́. Bikéédę́ę́' łį́į́' daalchíí' áádóó daastł'inii índa daalgaii naazį́.

⁹Áko ádííniid, Shibóhólníihii, díishą' ha'át'íí ádaat'é? Nít'éé' diyingo naal'a'í áshidííniidgo áshíłní, Díí ádaat'éhígíí hazhó'ó nił bééhodeesįįł.

¹⁰Jó, mértal naazkaadígíí bitahgi diné éí łį́į́' bił sizį́įgo ání, Díí éí Bóhólníihii adabiis'a'go nahasdzáán bikáá'góó háádadiikahgo bá hada'ídées'į́į́' yiniyé ádaat'į́.

¹¹Áko łį́į́' dabíyeehii éí Bóhólníihii bidiyingo naal'a'í mértal naazkaadígíí yitahgi łį́į́' bił sizíinii ádeidííniid, Nahasdzáán bikáá'góó háádadiikahgo hada'ísídíil'į́į́' nít'éé', áko nahasdzáán t'áá náhwiiz'ą́ą́ nít'éé' hasht'ehodít'éego háádaalyį́į́h, jó'akon.

¹²Ákohgo Bóhólníihii bidiyingo naal'a'í ání, T'áá ałtsoní bee Bóhólníihii nílíinii, Jerúsalem kin haal'áagi índa Júdah kéyahgi kin hadaas'áii bich'į' náháchį'go tsosts'idiin nááhai. Haa nízáagishą' doo baa a'ááh niizįįh da doo?

¹³Áko Bóhólníihii éí diyingo naal'a'í shich'į' yáłti'ii ajooba' saad índa saad bee ha'ahóníinii yee yich'į' haadzíí'.

¹⁴Ákohgo diyingo naal'a'í shich'į' yáłti'ii áshidííniid, Hadílgháásh, T'áá ałtsoní bee Bóhólníihii ání, Jerúsalem índa Záíyan t'áá íiyisí haa łe'nisin.

¹⁵T'áá áłts'íísígo doo shił hózhǫ́ yę́ędą́ą́' bee hach'į' nidahwii'náanii náás kódayiilaago biniinaa ał'ąą dine'é doo hodítéehee kéédahat'ínígíí t'áá íiyisí bich'į' doo shił hóózhǫǫd da.

¹⁶Éí bąą Bóhólníihii kóní, Jerúsalem baa a'áhí nídínéesdzįįł. T'áá ałtsoní bee Bóhólníihii ání, Shikin ninádoot'ááł áádóó Jerúsalem kin haal'áii bee ída'neel'ąąhí bee bídí'nóol'ąął.

¹⁷Hanáádílgháashgo ádíní, T'áá ałtsoní bee Bóhólníihii kóní, Shikin hadaas'áii t'áá ałtsoní bee áda'azįįdgo k'ee'ąą náádeílzhíish doo índa Bóhólníihii éí Záíyan hanááyi'diyoołnih áádóó Jerúsalem nínááhodidoo'ááł.

¹⁸Ákohgo hazhó'ó déé'į́į́' nít'éé', adee' dį́į'go yadaa'áago yiiłtsą́, jó'akon.

¹⁹Áko diyingo naal'a'í shich'į' yáłti'ígíí ábidííniid, Díishą' ha'át'íí ádaat'é? Nít'éé' áshíłní, Díí adee' dį́į'goígíí éí Júdah áádóó Ízrel índa Jerúsalem dine'é tadeinooskaadii ádaat'į́.

²⁰Ákohgo Bóhólníihii éí da'atsidii dį́į'go shił yit'íní áyiilaa.

²¹Áádóó ádíshní, Díísh ha'át'íí yaa nídiikaigo yikah? Nít'éé' áshíłní, Díí adee' danilínígíí éí Júdah dine'é tadeinooskaadii ádaat'į́, áko diné doo ła' dashdíníit'ą́ą da. Nidi ał'ąą dine'é bida'adee' éí Júdah dine'é tadeidínóołkał biniyé yik'ijį' nídahidiibaa'ii yił yéé' ádahodoolííł áádóó hadee' yóó'adahidoolkał biniyé díí da'atsidii haaskai.