Read Navajo ZECHARIAH 10 Bible Online

ZECHARIAH 10 - Navajo bible

ZECHARIAH 10

¹Dąąjį' anáhálzhishgo Bóhólníihii éí níłtsą́ bídayínóhkeed. T'áá áko Bóhólníihii éí k'os áyiił'įįhgo ádaho'niiłtį́į́h; diné bee nidahałtį́įhgo t'ááłá'í nítínígo nída'niłt'į́į́h.

²Háálá eda'alyaii biyooch'íidgo yádaałti' áádóó nida'ídíłkidii wooch'ííd k'ehgo bił ádahat'į́ índa t'áá áhoodzaagóó nidayiiyeełgo dahalne'. Áko t'áadoo biniyéhígóó yee ák'i dahalta'. Éí bąą dibé doo idadiziniigi át'éego t'óó yóó'adahakááh; dibé yaa áhályáanii ádingo bąą bich'į' nidahwii'ná.

³Doo yá'át'ééhgóó na'niłkaadii danilínígíí t'áá íiyisí bich'į' sháhóóchįįd índa tł'ízíchǫǫh atídeeshłííł; jó, t'áá ałtsoní bee Bóhólníihii bidibé dah danéelkaadii éí Júdah dine'é át'éego yaa naneeztą́ą́' áádóó bilį́į́' bee na'abaahígi át'éego adiih ádaat'į́įgo áyiilaa.

⁴Bits'ą́ą́dóó tsé bee naaná'ástł'inii hodooleeł; bits'ą́ą́dóó níbaal bá adaaskaalii hodooleeł; bits'ą́ą́dóó ałtį́į́' bee na'abaahii hodooleeł; bits'ą́ą́dóó nidanit'áii t'áá ałtso t'áá łahjį' ch'íhidookah.

⁵Diné ayóó át'éii nidahalingo kintah da'nítiingóó bida'ana'í danilíinii hashtł'ish biyi'góó anadeił'į́įgo yik'i nidookah, áko Bóhólníihii bił hólónígíí bąą anadadoot'įįł áádóó bida'ana'í łį́į́' bił nidaaldlooshii t'óó ádaa yádadínóodzįįł.

⁶Júdah dine'é danilíinii bidziilgo ádeeshłííł, índa Jóseph dine'é danilíinii yisdádeeshnił. Baa a'ááh nisingo biniinaa t'ą́ą́' nináhideesh'ish áádóó ts'ídá t'áadoo yóó'adíí'ą́ą da nahalin doo, háálá shí éí biBóhólníihii Diyin God nishłį́, áko bisodizin bá bi'íínísin dooleeł.

⁷Íífreiyim dine'é éí diné ayóó át'éii nidahalin dooleeł, áko wáin bee ił hózhónígi át'éego bijéí bił dahózhǫ́ǫ doo; bada'áłchíní ałdó' éí dayiiłtsą́ągo t'áá íiyisí yaa bił dahózhǫ́ǫ doo; bijéí tł'ááhdę́ę́' Bóhólníihii yee bił nidahoozhǫǫh doo.

⁸Bíká ídideesołgo áłah áńdeeshdlííł, háálá t'áá shí bik'é niná'níshdláago shíí' násdlį́į́'. K'ee'ąą deeshzhiizhígi át'éego t'áá íiyisí k'ee'ąą noot'į́įł dooleeł.

⁹Ał'ąą dine'é bitahgóó k' ihodideeshłééł índa kéyah nízaadi t'ahdii shéédaalniihgo ha'áłchíní bił dajiináago nináhizhdookah.

¹⁰Ííjip kéyahdę́ę́' nináhodiyeesh'ish, áádóó Asíriya kéyahdę́ę́' áłah ánáhodeeshdlííł. Áko kéyah Gíliyad áádóó Lébananjį' náhodeesh'ish índa kéyah doo hohóoghah da hodooleeł.

¹¹Tónteel ach'į' nahwiiłnáanii yii'dę́ę́' tó deílk'oołii hasht'eididoołt'eeł, áádóó Náil tooh daditánígóó ałtso néidoołtsih. Áko Asíriya yee ádeidzódlíii a'ohgo át'éego ádoolnííł, áádóó Ííjip dine'é binaat'á gish bighadootį́į́ł.

¹²Bóhólníihii bee shidine'é dabidziilgo ádeeshłííł, áádóó shízhi' binahjį' shibee adziilii yee deíkáah dooleeł, ní Bóhólníihii.