Read Navajo ZECHARIAH 11 Bible Online

ZECHARIAH 11 - Navajo bible

ZECHARIAH 11

¹Lébanan nílíinii, nigadtsoh deíl'áhígíí dadidoodlił biniyé nidáádílkał ąą ádanile'.

²Ch'ó sikaadii nílíinii, nichxa, háálá gadtsoh naazkaadii naa'adahineezkaad, háálá tsin ayóó ánóolningo naazkaadii dááchxǫ'. Béíshandóó chéch'iltsoh danohłíinii, cha nidahohłe', háálá tsin bee hodíłch'ilii ałtso heesne'.

³Nida'niłkaadii éí cha nidahałe'go hodiists'ą́ą́', háálá yee ayóó ádaat'éii bił ahóóyá. Náshdóí yáázh bitsiijį' daditł'ooígíí biyi' nidahodi'ni'go hodiists'ą́ą́', háálá Jórdan tooh yee ádaa ha'niih yę́ę t'áadoo biniyéhí da silį́į́'.

⁴Bóhólníihii shiDiyin God kóní, Dibé nidadootsiłii dah noołkałígíí ba'ołtso'.

⁵Dibé nidayiiłniihgo t'óó nideiłtseed, áko doo ádáát'įįdí da nidahalin, áádóó baa nida'iiniihii ádaaní, Bóhólníihii baa hwii'niih, háálá bee asist'įįd. Jó, t'áá hó há nida'niłkaadígíí doo hak'édí danilį́į da.

⁶Jó, díí kéyahgi kéédahojit'íinii doo hak'édí náádínéesdzįįł da, ní Bóhólníihii. Nidi diné t'áá ałtso bił kééhojit'íinii índa aláahgo binanit'a'í bílák'ee hodíí'ą́ą doo, jó'akon. Áko kéyah atídeidoolííł, áádóó éí bits'ą́ą́dóó doo yisdáhóshnííł át'ée da doo.

⁷Dibé nidadootsiłii éí hojooba' ádaat'éii ba'astso', áko tsihał naakigo dibé bá shóisíłt'e'. Ła' éí Ił Hóshóonii bee yíníshí, náánáła' éí Łá'í Ídlį́ bee yíníshí. Áko dibé ba'níłtsood.

⁸Ła' nídízííd binih nida'niłkaadii tált'éego ásíłdįįd, háálá éí bá deeshnih nít'éé' áádóó éí ałdó' doo dashíłdin da nít'éé'.

⁹Ákohgo ábidííniid, Doo nihaa ánááháshyą́ą da doo. Dadootsaałii éí bíni'dii daatsaah; ádooldįįłii éí bíni'dii ábi'dildįįh índa daadziihígíí bíni'dii t'áá bí nída'ahildeeł.

¹⁰Áko bee aha'deet'áanii éí dadine'é t'áá ałtso bá íishłaa nít'ée'ii k'ídeeshtih biniyé shitsihał Ił Hóshóonii bee yíníshí yę́ę k'íníti'.

¹¹Éí bijį́į́ góne' k'íníti', áko dibé hojooba' ádaat'éii dashiníł'į́įgo Bóhólníihii bizaad át'éego bił béédahoozin.

¹²Ákohgo ábidishní, Yá'át'éehgo nitsídaahkeesgo shich'į' nida'nohłéego shich'į' nida'nohłé, nidi, Dooda, danohsingo nílááh nidaohjaah. Áko béésh łigaii tádiin dah deidiilo'go shich'į' naalyá.

¹³Ákohgo Bóhólníihii áshidííniid, Łeets'aa' ííł'íní bich'į' aniłkaad; éí doozhǫǫgo ílį́įgo shą́ą́h azlį́į'ii át'é. Ákohgo béésh łigaii tádiingo nídiinilígíí Bóhólníihii bikin bii' sohodizin góne' łeets'aa' ííł'íní bich'į' ííłkaad.

¹⁴Ákohgo Júdah dine'é índa Ízrel dine'é yee ałk'is nidlíinii bits'ą́ą́' k'ídeeshtih biniyé náánáła' shitsihał bee Łá'í Ídlį́ bee yíníshí yę́ę k'ínááníti'.

¹⁵Ákohgo Bóhólníihii ánááshidoo'niid, Na'niłkaadii doo áhályáanii bibee na'anishí nídiinííł.

¹⁶Háálá kéyahgóó na'niłkaadii léi' nábidideeshłááł, jó'akon; éí ti'dahooníhígíí doo yaa nantáa da doo, ayázhí doo haintáa da doo, doodaii' bitah dahwiistǫ'ii doo nááyidiiłáah da doo, doodaii' t'óó naazínígíí nidi, doo ya'ółtsóód át'ée da doo, ákondi daneesk'ahii t'óó yildeeł doo índa bikéshgaan yik'i yiizǫ́ǫsgo niyiitíih doo.

¹⁷Na'ni łkaadii doo ajílíinii dibé t'óó bizh'níłnii'ii doo hojooba' ájíníi da! Diyin God bidiltłish yee hagaan k'íidookał índa hanáá' nish'náájí hayí'dooshish; hagaan ałtso doogą́ą́ł índa hanáá' nish'náájí t'áá íiyisí bił chahodoołhił.