Read Navajo ZECHARIAH 13 Bible Online

ZECHARIAH 13 - Navajo bible

ZECHARIAH 13

¹Éí bijį́įdi David ba'áłchíní ahoolchíiłii índa Jerúsalem kin haal'áagi kéédahat'íinii bá tó háálį́įgo ádoolnííł; éí ádił ni'iidzííh índa t'óó badaa'ihii bee bi'didéeh doo biniyé háálį́į doo.

²Áko t'áá ałtsoní bee Bóhólníihii ání, Éí bijį́įdi díí baa hodoolzhish: díí kéyahdóó e'elyaii bich'į' nidahadláii dabízhi' nahjį' nidideesh'áałgo t'óó baa hodiyoo'nah áádóó ałdó' t'áá ádzaagóó dahalne'ii índa níłch'i danchǫ́'í díí kéyahdóó nahjį' hadínéeshkał.

³Díí baa hodoolzhish: ła'da t'áá ádzaagóó halne'go t'áá hó hazhé'é índa hamá hashchíinii áhodidooniił, Doo hinínáa da doo, háálá Bóhólníihii bízhi' bee niyooch'íidgo yáníłti', áko hojoolne'ígíí bąą hazhé'é índa hamá haghá'dooshish.

⁴Díí ałdó' baa hodoolzhish: éí bijį́įdi t'áá ádzaagóó dahalne'ii t'ááłá'í nítínígo bił ádaadzaago yaa dahoolne'ii t'óó yaa yádadínóozįįł índa binda'adlo' doo biniyé beeldládí éé' dadits'ozii ak'ínídeiltihgo doo ádeił'į́į da doo.

⁵Nidi ádidooniił, Diyin God yá halne'ii doo nishłį́į da; k'éé'dídléehii nishłį́. T'áá biyázhí nishłį́į́dę́ę́' naalte' nishłį́.

⁶Áko ła'da yínahódídóołkiłgo áhodidooniił, Ha'át'íishą' ninághahdę́ę́' bee tídááná? Áko ádidooniił, Shik'isóó bighangi níyáago atídashiilaa.

⁷Diltłish nílíinii, t'áadoo íłhoshí, nídiidáahgo shina'niłkaadii bik'ijį' nílį́į le'. Diné shíighah sizíinii bik'ijį' nílį́į le', ní t'áá ałtsoní bee Bóhólníihii. Dibé da'níłts'ą́ą́góó taidoojah biniyé na'niłkaadii bił nizdííłhał. Áádóó dibé yázhí danilínígíí bik'ijį' nishłį́į doo.

⁸Díí baa hodoolzhish: Bóhólníihii ání, Kéyah t'áá át'éé nít'éé' táa'go dibé shijé'ígíí naakigo shijéé' éí atídoolníiłgo dadínóonééł, nidi t'ááłáhígo shijéé' ánászįįdii éí t'áá ákǫ́ǫ doo.

⁹Áko táá' góne' shijé'ígíí ánászįįdii kǫ' biyi' ch'ídeesh'ishgo béésh łigaii nídoolyį́'ígi át'éego índa óola kǫ' bee bóhoneestą́'ígi át'éego ádahodeeshłííł. Áko shízhi' yee shída'dókeedgo bich'į' ééhodeesįįłgo ábidideeshniił. Díí shidine'é danilį́į́ lá. Áádóó ádashididooniił, Hó éí Bóhólníihii shiDiyin God jílį́.