Read Navajo ZECHARIAH 14 Bible Online

ZECHARIAH 14 - Navajo bible

ZECHARIAH 14

¹Bóhólníihii beidoołkááł baa hoolzhiizhgo nihinaalye'é nihits'ą́ą́' nídeidiinilii nihitaanídoo'nih, jó'akon.

²Jó, ał'ąą dine'é áłah ádeeshłíiłgo Jerúsalem yik'ijį' anaa' dahodoołeeł, índa kin haal'áii deidoołnééł, áádóó daakin yił nidinóodah, áko asdzání danilíinii yił nidahadeeł doo índa kin haal'áhígi diné kéédahat'íinii ałníí'dóó dabidisnáágóó adínóolkał, nidi diné daadzí'ígíí doo ábidi'dooldįįł da.

³Ákohgo átséédą́ą́' Bóhólníihii anaa' náháłeehígi át'éego ch'íhodooleełgo ał'ąą dine'é yich'į' naabaah doo.

⁴Éí bijį́įdi Jerúsalemdóó ha'a'aahjígo Dził Álivz hoolyéego bighą́ą'gi dah yidoozįįł. Áko Dził Álivz ałníí'dóó náhookǫsjigo adooldohgo, ła' éí shádi'áahjigo adooldohgo ha'a'aahdę́ę́' áádóó e'e'aahjį' ayóó áhoníłtéelgo hahodiildzis hodooleeł.

⁵Áádóó dził t'áá hahodiildzis góyaa adahizhdínóohchééł, háálá éí dził bita'góó t'áá Éízaljį' hahodiildzis. Áko Júdah dine'é aláahgo binanit'a'í Azáíyah bíyoołkááł yę́ędą́ą́' ni' nahaasnáa'go hadahinoochą́'ígi át'éego adahidínóohchééł. Ákohgo Bóhólníihii shiDiyin God honíle'go bidiyį́į́' t'áá át'é yił dookah.

⁶Éí bijį́įdi díí baa hodoolzhish: doo náádi'nídíin da doo; bits'áda'deezdíinii doo hózhǫ́ bee dadi'nídíin da doo.

⁷Áko éí ła'a jį́ Bóhólníihii t'éiyá bił bééhózin doo; doo jį́ da doo índa doo tł'éé' da doo, nidi aná'át'áahgo adinídíin doo.

⁸Éí bijį́įdi díí baa hodoolzhish: Jerúsalemdóó tó hináanii háálį́įgo ha'a'aahjį' tónteel biih yílį́į doo áádóó ła' e'e'aahjį' ałdó' tónteel biih yílį́į doo; éí t'áá áłahjį' háálį́įgo nináháhááh áádóó nináháshį́įh doo.

⁹Áko Bóhólníihii éí nahasdzáán nidahonees'ą́ą́góó t'áá át'é yinant'áa doo. Éí bijį́įdi t'ááłá'í Bóhólníihii nilį́į doo índa t'ááłá'í t'éí bízhi' doo.

¹⁰Gííba kin shijaa'dóó Jerúsalem shádi'áahjigo Ríman kin haal'áajį' kéyah t'áá át'é honíteelgo áhodoolnííł. Nidi Jerúsalem éí Bénjamin bich'é'étiinídóó áłtsé ch'é'étiin nít'é'íjį' áádóó nástł'ahgi ch'é'étiiníjį', índa Hanániyel bá ya'diitł'inii íí'áhídóó níléí naat'áanii bich'il na'atł'o'ii yiljizhgo bąąh haha'níhíjį' kin hanáánáál'áa doo.

¹¹Ákwii kénáádahat'į́į doo áádóó doo atínáádoolníił da, nidi Jerúsalemgi ts'ídá hasihgo ákwii diné kéédahat'į́į doo.

¹²Áko dadine'é t'áá ałtso Jerúsalem bich'į' anaa' nídahojiłeehii éí Bóhólníihii díí naałniih yee atíhodoolííł; t'áá nidzizį́įgo hats'íís ałtso dadidoołdził; hanáá' t'áá hanák'eejį' ałtso dadidoołdził; hatsoo' ałdó' t'áá dahazée'jį' ałtso dadidoołdził.

¹³Áko éí bijį́įdi díí baa hodoolzhish: Bóhólníihii bits'ą́ą́dę́ę́' ts'ídá ayóó át'éego bik'ee ił áhodoodįįłii bik'i hwiidooleełgo t'ááłá'í nítínígo yił kééhat'íinii deidoosiłgo yił nida'ahilbaałgo da'ahidoogą́ą́ł.

¹⁴Áko Júdah dine'é danilíinii Jerúsalemgi anaa' dahodoołeeł. Áko ał'ąą dine'é dajit'íinii t'áá át'é áłah ádeidoolííł: óola ádaat'éii índa béésh łigaii áádóó éé' ayóogo da'ílíinii bee hada'dít'éii t'óó ahayóigo áłah ádeidoolííł.

¹⁵Áádóó díí naałniihígíí łį́į́' ałdó' baa níłnii' doo; dzaanéezda, ghą́ą́'ask'idiida, téliida índa ana'í dah deínéhígi naaldlooshii t'áá ałtso ałdó' baa níłnii' doo.

¹⁶Ákohgo ał'ąą dine'é éí Jerúsalem kin haal'áii yik'i néijah nít'ée'ii t'áá nidahaasdzí'ígíí t'áá nináháhááh bik'eh Jerúsalemgóó ałnáádaakahgo Aláahgo Naat'áanii, éí t'áá ałtsoní bee Bóhólníihii nilíinii yich'į' nidahałáa doo áádóó chaha'ohgi hodílzingo áłah ná'ádleeh ádeił'į́į doo.

¹⁷Áko nihokáá' dine'é t'áá háiida Jerúsalemgóó doo ałnáádajikahígíí áádóó áadi Aláahgo Naat'áanii, éí t'áá ałtsoní bee Bóhólníihii nilíinii doo bich'į' nidahojiłáhígíí éí doo hwee nidahałtin da doo.

¹⁸Áádóó Ííjip kéyahdę́ę́' dine'é dajílíinii t'áadoo ákǫ́ǫ́ dadeeskaigóó índa t'áadoo nidadziiskaigóó doo hwee nidahałtin da doo, áádóó ał'ąą dine'é éí chaha'ohgi hodílzingo áłah ná'ádleeh doo bida'jił'ínígíí éí Bóhólníihii doo nahałtingóó yee atíhodoolííł.

¹⁹Ííjip dine'é índa ał'ąą dine'é ts'ídá t'áá ałtso chaha'ohgi hodílzingo áłah ná'ádleeh bida'jił'į́į doo biniyé doo ákǫ́ǫ́ ałnáádajikahígíí díí bee atídaho'dil'į́į doo.

²⁰Éí bijį́įdi łį́į́' biyo' bizéédadéenilígíí Bóhólníihii Bich'į' Diyinii Át'é, níigo bikáá' ak'eda'ashchį́į doo, índa Bóhólníihii bikin bii' sohodizin góne' ásaa' chodao'ínígíí éí bikáá' náá'iiniihí bíighahgi łeets'aa' sinilígíí nahalin dooleeł.

²¹Áko Jerúsalemgi índa Júdahgi ásaa' t'ááłá'í ní'ánígo t'áá ałtsoní bee Bóhólníihii bá ats'ádeet'ą́ągo dadílzin dooleeł. Ákohgo náádadi'yoołnihgo nidahakáhígíí t'áá ałtso éí yee atsį' nááhániihii nídeiłbish doo. Áádóó éí bijį́įdi t'áá ałtsoní bee Bóhólníihii bikin bii' sohodizin biyi' Kéínan dine'é doo ła' hojílǫ́ǫ da dooleeł.