Read Navajo ZECHARIAH 3 Bible Online

ZECHARIAH 3 - Navajo bible

ZECHARIAH 3

¹Ákohgo alą́ąjį' náá'iiłniihii Jéshuwa éí Bóhólníihii bidiyingo naal'a'í bidááhdóó dzizį́įgo áádóó níłch'i bida'iiníziinii binanit'a'í Séítan éí Jéshuwa yik'i hodii'aah doo biniyé honish'náájí sizį́įgo shił ádzaa.

²Áko Bóhólníihii éí Séítan ííłní, Séítan nílíinii, Bóhólníihii nideezteh. Bóhólníihii éí Jerúsalem kin haal'áii niidiní'áanii nideezteh. Dííyee' kǫ' bii'dę́ę́' hahoolghanii át'į́!

³Bóhólníihii bidiyingo naal'a'í bidááhdóó Jéshuwa bi'éé' chinii yii' sitį́įgo sizį́.

⁴Áko diyingo naal'a'í éí ła' ákǫ́ǫ́ bidááhdę́ę́' naazínígíí áyidííniid, Éé' chinii baa doołtsóosgo nahjį' kódaohłééh. Áko ánááhodi'ní, Doo ákwii é'ét'éii yę́ę ná yóó'adish'aahgo éé' ílínígíí bee handideeshłííł, jó'akon.

⁵Áko ádíshní, Bíni'dii ch'ah dijoolí chin bąąh ádinii bik'i doh'aah. Ákohgo Bóhólníihii bidiyingo naal'a'í t'áá biná sézį́įgo ch'ah dijoolí chin bąąh ádinii ła' bik'i deideez'ą́ áádóó ééh deistį́.

⁶Áádóó Bóhólníihii bidiyingo naal'a'í éí Jéshuwa neintingo áyidííniid,

⁷T'áá ałtsoní bee Bóhólníihii kóní, Ádíshníinii bik'ehgo yínáałgo índa shá nanil'a'go honíyą́ągo yínááł ládą́ą́', ákohgo shikin índa bee shíhólníihii ałdó' t'áá át'é binanít'áa doo, índa ákǫ́ǫ́ naazínígíí bitahgi ałnáánídáahgo naa dideesh'ááł.

⁸Jéshuwa alą́ąjį' náá'iiłniihii nílíinii, ni áádóó nik'is danilíinii nidááhgóó naháaztánígíí k'ad dashidoohts'į́į́h; jó, yá'át'éehgo diné bee éédahózinii ádaat'į́. Shá naal'a'í Ats'áoz'a' nilíinii bił deesh'ash, jó'akon.

⁹Jó, Jéshuwa binááł díí tsé niní'ánígíí níníł'į́; díí tsé niní'ánígíí bináá' tsosts'id; tsé bik'i na'ashk'aazhgo bik'e'ashchį́įgo ádeeshłííł, jó'akon, ní t'áá ałtsoní bee Bóhólníihii, áádóó díí kéyah haz'ánígi doo ákwii é'ét'éii t'áá ła'a jį́ ałtso nahjį' kódeeshłííł.

¹⁰T'áá ałtsoní bee Bóhólníihii ání, Éí bijį́įdi ch'il na'atł'o'ii áádóó fig naazkaadii biyaagi t'ááłá'í nootínígo bił kéédahoht'íinii hágo dabididoohniiłgo bił nahísóotą́ą doo.