Read Navajo ZECHARIAH 4 Bible Online

ZECHARIAH 4 - Navajo bible

ZECHARIAH 4

¹Áko diyingo naal'a'í shich'į' yáłti'ii shaa náánádzáago diné ałhoshdę́ę́' nídiilt'e'ígi át'éego náshidiiłt'e'

²áádóó, Ha'át'íísh yíní'į́? shidííniid. Áko ádíshní, Déé'į́į́' nít'éé', jó'akon, áko bee hool'iní bá yadaa'áhígíí áádóó bílátahgi dah azkánígíí áádóó éí bikáá'dóó bee dahool'iní tsosts'idgo dah naaznil índa t'ááłá'í ní'ánígo óola níyizgo biih dahasdzą́ągo bidadii'áago yiiłtsą́.

³Áádóó bílátahgi dah azkánígíí binahjį' t'áá ałch'ijí áliv sikaadii naakigo ałdó' íí'á.

⁴Ákohgo diyingo naal'a'í shich'į' yáłti'ii ábidishní, Shibóhólníihii, díishą' ha'át'íí ádaat'é?

⁵Áko diyingo naal'a'í shich'į' yáłti'ii áshíłní, Da' díí ádaat'éhígíísh doo nił bééhózin da? Áko ábidishní, Dooda, shibóhólníihii.

⁶Nít'éé' áshidííniid, Díí Bóhólníihii bizaad éí Zerábabel bee bich'į' ha'oodzíi'ii át'é. Atsxe' bee dooda, adziil bee dooda, nidi shiNíłch'i Diyinii bee, ní t'áá ałtsoní bee Bóhólníihii.

⁷Dził ayóó ánít'éii nílíinii, háísh ánít'į́? Zerábabel bidáahjį' k'íhoneezlá dííleeł áádóó tsé á si'ánígíí ch'íí'aahgo, Ajooba' bee bik'ihojidlíi le', dajiníigo chánahgo dazhdilwosh doo.

⁸Bóhólníihii kónááshidoo'niidgo ání,

⁹Zerábabel t'áá bí díí kin bii' sohodizin bitł'ááh nástł'iní áyiilaa áádóó éí ałdó' t'áá bí ts'ídá ałtso íidoolííł. Ákohgo éí t'áá ałtsoní bee Bóhólníihii naa shiníł'a'go nił bééhodoozįįł.

¹⁰Háishą' t'áá áłts'íísígo ádahóót'įįdígíí dayíí'įįd? Áko díí bił dahózhǫ́ǫ doo, áádóó tł'óół bik'ehgo k'éhézdon ha'iitł'inii Zerábabel dah yooléełgo deizdoołtsééł. Díí tsosts'idígíí éí Bóhólníihii bináá' ádaat'éego nahasdzáán t'áá si'ą́ą́ nít'éé' yikáá'góó háádadiigał.

¹¹Ákohgo ábidishní, Díí áliv naakigo sikaadii éí bee hool'iní bá yadaa'áago binahjį' ałch'ijí íí'áhígíishą' ha'át'íí át'é?

¹²Áádóó hanáánáásdzíi'go ábidííniid, Díí áliv bits'áoz'a' naakiígíí bits'ą́ą́dóó ak'ah bii' nílíní óola bee ályaii biyi'dę́ę́' ak'ah yahiidzíidii ha'át'íísh át'é?

¹³Nít'éé' áshíłní, Da' díí kódaat'éégóósh doo nił bééhózin da? Áko ádíshní, Dooda, shibóhólníihii.

¹⁴Ákohgo áshidííniid, Díí nizhdilt'éego ak'ah bee alzį́įhii bee ats'áho'dee'nilgo nahasdzáán t'áá si'ą́ą́ nít'éé' bee Bóhólníihii bíighahdóó dzizíinii ájít'į́.