Read Navajo ZECHARIAH 6 Bible Online

ZECHARIAH 6 - Navajo bible

ZECHARIAH 6

¹Áko náás náádéésht'į́į́ nít'éé', tsindaabąąs bijáád naakiígíí dį́į'go dził bita'dę́ę́' ch'ídaheezbą́ązgo yiiłtsą́, jó'akon; éí dził sinilígíí béésh łitsoii dził át'é.

²Álą́ąjį' tsinaabąąs bijáád naakiígíí łį́į́' łichíi'ii bighą́ą́h dínil; náá'ákóne' éí łį́į́shzhiin bighą́ą́h dínil;

³táá' góne' éí łį́į́łgaii bighą́ą́h dínil, índa dį́į́' góne' éí łį́į́stł'inii bidziilii bighą́ą́h dínil.

⁴Áko diyingo naal'a'í shich'į' yáłti'ii ábidishní, Shibóhólníihii, díishą' ha'át'íí ádaat'į́?

⁵Nít'éé' diyingo naal'a'í áshidííniid, Díí yá'ąąshdę́ę́' níłch'i dį́į́' ał'ąą át'éego Bóhólníihii yidááhdóó naazį́į́ nít'ée'ii ni' nidahonees'ą́ą́góó dadeeskaígíí ádaat'į́.

⁶Łį́į́shzhiin éí náhookǫsjigo kéyahgóó bee adeezbą́ą́z; náábíkéé' góne' łį́į́łgaii e'e'aahjigo bee adeezbą́ą́z; łį́į́stł'inii éí shádi'áahjigo bee adeezbą́ą́z.

⁷Łį́į́' bidziilígíí éí nahasdzáán nidahonees'ą́ą́góó ha'ídées'į́į́' biniyé dah ahiniilchééh. Áko Bóhólníihii ání, Nihílááh, nahasdzáán hazhó'ó haahsííd. Ákohgo nahasdzáán haisííd biniyé bee adeezbą́ą́z.

⁸Ákohgo shich'į' hadoolghaazhgo áshidííniid, Náhookǫsjigo bee adeezbą́zígíí éí bee shiníłch'i hasht'edíít'e', jó'akon.

⁹Áádóó Bóhólníihii kóshidííniid,

¹⁰Héldeiyai áádóó Tobáíjah índa Jedáíyah éí yisnááh danilį́į́ nít'ée'go Bábilan kéyahdę́ę́' nidahaaskai yę́ę nidayiizhjaa'ígíí nídidíínił; t'áá éí bijį́ Zefanáíyah biye' Josáíyah bighan góne' yah adíínááł.

¹¹Áko béésh łigaii áádóó óola ła' nídiiníiłgo naat'á ch'ah ádíílíił go éí Jásedek aláahgo náá'iiłniihii biye' Jéshuwa bik'i didíí'ááł.

¹²Áádóó ábididííniił, T'áá ałtsoní bee Bóhólníihii kóní, Diné Ats'áoz'a' wolyéii t'áá bí bił haz'ą́ą́dóó dínóoyééł, áádóó Bóhólníihii bikin bii' sohodizin íidoolííł, jó'akon.

¹³T'áá bí éí Bóhólníihii bikin bii' sohodizin íidoolííł áádóó t'áá íiyisí ayóó át'éego baa ha'niihgo bibikáá'dóó nahat'áii yikáá' dah sidáago nant'áa doo. Áádóó bibikáá'dóó nahat'áii yikáá' dah sidáago náá'iiłniihii nilį́į dooleeł, áko náá'iiłniihii índa aláahgo naat'áanii nilį́įgo t'áá ałhii'go bee ach'į' hózhóonii yee hoo'áał doo.

¹⁴Áko Héldeiyai áádóó Tobáíjah áádóó Jedáíyah índa Zefanáíyah biye' Josáíyah éí Bóhólníihii bikin bii' sohodizin góne' naat'á ch'ah bee béédahaniih doo.

¹⁵Díí doo deeghánídę́ę́' nidahidookahgo Bóhólníihii bikin bii' sohodizin atah ádeidoolííł, áko t'áá ałtsoní bee Bóhólníihii nihaa shiníł'a'go nihił béédahózin dooleeł. Bóhólníihii nihiDiyin God haleebee bik'eh dahonoł'į́įgo t'éiyá kót'éego nihá áhodoonííł.