Read Navajo ZECHARIAH 8 Bible Online

ZECHARIAH 8 - Navajo bible

ZECHARIAH 8

¹T'áá ałtsoní bee Bóhólníihii shich'į' hanáánáádzíí',

²T'áá ałtsoní bee Bóhólníihii kóní, Záíyan baa łe'nisingo éí ts'ídá ayóó át'éego baa łe'nisin áádóó ayóó át'éego hashké nísdzingo baa łe'nisin.

³Bóhólníihii kóní, Dził Záíyangóó nídeeshdáałgo Jerúsalem kin haal'áagi kééhasht'į́į dooleeł, áko Jerúsalem éí kin haal'áii t'áá aaníinii hoolyée doo índa t'áá ałtsoní bee Bóhólníihii bidził éí dził diyinii hoolyée doo.

⁴T'áá ałtsoní bee Bóhólníihii kóní, Diné hadaastihii índa asdzání hadaastihii éí Jerúsalemgi kintah da'nítiingóó nidaháaztą́ą doo; t'áá íiyisí hadaastihgo biniinaa t'ááłá'í nítínígo bigish nideiditsi dooleeł.

⁵Áádóó kintah da'nítiingóó ashiiké índa at'éékéda t'óó ahayóigo nidaanée doo.

⁶T'áá ałtsoní bee Bóhólníihii kóní, Éí yoołkáałdi díí dine'é daadzíi'ii binááł bik'ee t'óó bił adahayóigo, da' shíísh ałdó' bik'ee t'óó shił ahayói doo? ní t'áá ałtsoní bee Bóhólníihii.

⁷T'áá ałtsoní bee Bóhólníihii kóní, Jó, ha'a'aahdę́ę́' áádóó e'e'aahdę́ę́' shidine'é yisdádeesh'nił.

⁸Áádóó nináhideesh'ishgo Jerúsalemgi kéédahat'į́įgo shidine'é danilį́į doo índa t'áá aaníinii áádóó t'áá ákogi át'éii bee biDiyin God nishłį́į doo.

⁹T'áá ałtsoní bee Bóhólníihii kóní, Kin bii' sohodizin ádoolnííł biniyé t'áá ałtsoní bee Bóhólníihii bikin bitł'ááh nástł'inii ályaa yę́ędą́ą́' dahalne'í bizaad díí yoołkáałdi dadoohts'a'ígíí háni'dii nihigaan bidziilgo ádeínóhsin.

¹⁰Háálá íídą́ą́' béeso bik'é na'anishígíí diné bá ádin nít'éé'; naaldlooshii ałdó' béeso yik'é nidoolnishii ádin nít'éé' índa ana'í biniinaa ła'da ch'ééjiidáhígíí índa yah áńjiidáhígíí ách'į' nida'jódlíí nít'éé', háálá shí t'ááłá'í jinítínígo bił kéédahojit'íinii bił ałk'ijį' dajídlį́įgo áhwíínísin nít'éé'.

¹¹Nidi ch'óóshdą́ą́dą́ą́' ánísht'éé nít'é'ígi át'éego díí diné daadzíi'ii bich'į' k'ad doo ákónísht'ée da, ní t'áá ałtsoní bee Bóhólníihii.

¹²Jó, nihitahgóó k'é hólǫ́ǫgo ádeeshłííł, ch'il na'atł'o'ii bineest'ą' dahodooleeł áádóó łeeyi'dę́ę́' hadahidínóot'į́įłgo bik'ijį' dahtoo' naałtingo bee ída'azįįd doo, áko díí t'áá át'é diné daadzíi'ii bee bik'idahojidlíi dooleeł.

¹³Júdah dine'é danohłíinii índa Ízrel dine'é danohłíinii, ał'ąą dine'é bitahgóó yóó'abí'oodzíi'ii danohłį́į́ yę́ędą́'ígi át'éego yisdánihideesh'niłgo nihits'ą́ą́dóó ak'ihojidlí hólǫ́ǫ doo. T'áadoo nihił daayé'í, nidi háni'dii danihidziilgo ída'dołnééh.

¹⁴Háálá t'áá ałtsoní bee Bóhólníihii kóní, Danihizhé'é yę́ę shíkada'iiłhilgo shá dahóółchįįdgo atínihideeshłííł niizį́'ígi át'éego t'áadoo łahgo át'éego tsíńdíkéez da, ní t'áá ałtsoní bee Bóhólníihii.

¹⁵Kót'éego díí jį́į́góó Jerúsalem bich'į' índa Júdah dine'é danilíinii bich'į' ts'ídá yá'át'éhígi ádeeshníiłgo tsínáádíkééz. T'áadoo ádił dahonołyé'í.

¹⁶Díí éí baa naahkai doo: t'ááłá'í nootínígo bił kéédahoht'íinii saad t'áá aaníinii bee bił ałch'į' yádaałti'; nihił yah ada'iiztiingi t'áá aaníinii índa k'é hwiindzin bee nidahodiyoh'aah;

¹⁷bił kéédahoht'íinii nihijéí biyi'dóó t'áadoo nichxǫ́'ígo bee baa nitsídaahkeesí índa t'áá ádzaagóó ádee ha'diidziihii t'áadoo nihił ayóó ádaat'éhí, háálá díí kódaat'éhígíí t'áá ałtso jooshłxá, ní Bóhólníihii.

¹⁸Áko t'áá ałtsoní bee Bóhólníihii shich'į' hanáánáádzíí',

¹⁹T'áá ałtsoní bee Bóhólníihii kóní, Dį́į́' nídízííd binih áádóó ashdla' nídízííd binih áádóó tsosts'id nídízííd binih índa neeznáá nídízííd binih hodílzingo doo adánígíí nídaoł'aahgo Júdah dine'é yaa bił dahózhǫ́ǫgo bił nidahoozhǫǫh doo. Hodílzingo áłah nída'adleeh t'áá íiyisí yaa bił nidahoozhǫǫh dooleeł; éí bąą t'áá aaníinii índa k'é hwiindzin ayóó'ádeínóh'ní.

²⁰T'áá ałtsoní bee Bóhólníihii kóní, Dadine'é éí t'óó ahayóí kin hadaas'áágóó kéédahat'íinii Jerúsalemjį' nídeíkáah dooleeł.

²¹Łahgo kin haal'áagi kéédahat'íinii náánáłahjį' ádeididooniił, Sołtį'éi, Bóhólníihii bibee ak'ihojidlíii bídeídíikił, áádóó t'áá ałtsoní bee Bóhólníihii há deiit'į́į doo! Shí ałdó' ákǫ́ǫ́ díyá.

²²T'áá aaníí dadine'é t'óó ahayóí áádóó ał'ąą dine'é bidziilgo dah deíkáahii t'áá ałtsoní bee Bóhólníihii hádaat'į́įgo áádóó Bóhólníihii yee ak'ijidlíii yídayókeed biniyé Jerúsalemjį' nidahidookah.

²³T'áá ałtsoní bee Bóhólníihii kóní, Éí yoołkáałdi ał'ąą dine'é bizaad ał'ąą ádaat'éii bitahdę́ę́' diné neeznált'éego yíkaigo Jew dine'é nilíinii bi'éé' dayótą'go ádadidooniił, Haa'íshą' nił yiikah dooleeł, háálá Diyin God nił hólǫ́ǫgo naa dahosidiits'ą́ą́'.