Read Navajo MALACHI 4 Bible Online

MALACHI 4 - Navajo bible

MALACHI 4

¹Áajį' ayííłką́ągo bááh bighan góne' honeezgai nahalin doo índa t'áá ádíláahgo deíkáahii áádóó t'áá íiyisí doo yá'áshǫ́ǫ́góó ádaaníiłii t'áá ałtso ehégod adidook'ą́ą́ł nahalingo beidoołkááł índa behétł'óól áádóó bits'áoz'a' doo ła' doodzih da, jó'akon, ní t'áá ałtsoní bee Bóhólníihii.

²Nidi nihí shízhi' dadíínóhsinii éí Jį́honaa'éí Ts'ídá T'áá Ákogi Át'éii hadoogáałgo bit'a' biyaadóó hadaałt'é nídadoohdleeł. Béégashii yáázh neeyą́ągo bighandę́ę́' ch'ílt'e' nahalingo ch'ídoohkah.

³Áádóó beiníłką́ądi t'áá íiyisí doo yá'ádajíshóonii hak'i nidoohkah, índa łeeshch'iih nahalingo nihikétł'ááh bee hak'i nidoohkah, ní t'áá ałtsoní bee Bóhólníihii.

⁴Shá naal'a'í Mózes bibee haz'áanii éí yee nihwiiz'áanii áádóó yee nihodii'aahii t'áá bił Dził Hórebgi Ízrel dine'é t'áá ałtso bee bich'į' haasdzíi'ii béédaałniih.

⁵Bóhólníihii beiníłką́ądi ayóó át'éego índa bik'ee t'óó ił ahayóigo ha'doo'áłígíí t'ah bítséedi Diyin God yá halne'ii Iiláíjah nihaa deesh'aał, jó'akon.

⁶Áádóó azhé'é éí ba'áłchíní yił łá'í nídadoodleeł índa a'áłchíní éí bizhé'é yił łá'í nídadoodleeł, áko kéyah éí doo hóyée'go bá hadeesdzihgo atídeeshłíił da.