Read Navajo MATTHEW 10 Bible Online

MATTHEW 10 - Navajo bible

MATTHEW 10

¹Áádóó Jesus hódahooł'aahii naakits'áadahígíí hágo bizhdííniidgo níłch'i danchxǫ́'íii ayi'dę́ę́' hadeiniiłkaad doo biniyé bee óhólnííh bitaazdeez'ą́, áádóó nidaałniih t'áá ałtso índa ka nidaakaígíí t'áá ałtso hadaałt'é áńdazhdoodlííł ałdó' biniyé bee óhólnííh bitaazdeez'ą́.

²Áko naakits'áadahgo daal'aadii éí kódaolyé: áłtséhígíí Sáíman, éí Peter wolyéhígíí, áádóó yił háá'áázh Andrew; Zébedii biye'ké, James índa yił háá'áázh John;

³Philip áádóó Barthálemew; Thomas áádóó Matthew tax nahalyéhígíí yiniyé sidáii; James éí Alfíyas biye', índa Lebíyas, Thádiyas ałdó' wolyéhígíí;

⁴Sáíman éí Kéínan dine'é jílínígíí, índa Júdas Iskáriyat éí nináhodidoo'áłígíí.

⁵Jesus kóníigo díí diné naakits'áadahgoígíí ayiis'a', Doo Jew dine'é danilíinii t'ááká bitahjį' dadohkááh yíila', áádóó Samériya dine'é ła' bikin haal'áajį' dadohkááh lágo,

⁶nidi Ízrel dine'é éí dibé nahalingo yóó'adahaaskaígíí bich'į'go dadohkááh.

⁷Áádóó dayínóhkááhgóó kódadohníigo dahołne', Yá'ąąshii bee bóhólníihgo bił haz'áanii koshídę́ę́' bich'į' hoolzhish.

⁸Áádóó diné bitah dahoneezgaígíí náádahidoołjeeh, łóód ats'íís yiyáanii naałdzidii bee bąąh dah nidahaz'áanii hadaałt'é áńdaahdle', diné daneeznáanii hinááh áńdaahdle', níłch'i bi'iiníziinii bii' dahólóonii biyi'dę́ę́' hadahinołkaad. Nihaa dadeest'ánígíí t'áá jíík' e nihaa dadeest'ą́, áko t'áá jíík'e bee ádaahnííł.

⁹Óola áádóó béésh łigaii índa béésh łitsoida ła' nihidah na'ayizii biih daoh'ááł lágo,

¹⁰áádóó dah sidoohkaigóó azis bee na'aljidí, índa nihi'éé' naakigo, áádóó nihikee', índa nihigishda t'áadoo dayínóhjáhí, háálá naalnishí ba'dooltsołgi yą́ą́h nilį́.

¹¹Áko t'áá haa'ída kin hadaas'áagi índa kin naazhjaa'gi nidahohkáahgo, diné bił ílíinii hazhó'ó bínda'ídółkid, áko dah náádahidoohkáahjį' t'áá ákwii nahísóotą́ą doo.

¹²Índa hooghangi yah adahohkáahgo, Díí hooghangi hózhǫ́ǫ le', dadohníi doo.

¹³Áko hooghangi kéédahat'íinii bił da'ílį́įgo, bíni'dii k'é bee yínóh'níinii bił hólǫ́ǫ dooleeł, nidi doo yą́ą́h danilį́į́góó, éí k'é dadooniidii nihich'į' t'ą́ą́' nídoodleeł.

¹⁴Áádóó t'áá háiida doo danihinízingóó índa nihizaad doo deidiits'a'góó, éí hooghandóó, doodaii' kin haal'áádóó dah náádahidoohkáahgo nihikee' łeezh bąąh nidahołdéeh dooleeł.

¹⁵T'áá aaníí ánihidishní, Ánihwiit'aah beiníłką́ądi éí kin haal'áhígíí Sádam índa Gomárah biláahgo atíbidi'doolnííł.

¹⁶Jó'akon, dibé éí mą'iitsoh yitahgóó dadeeskaígi át'éego danihidish'á; éí bąą tł'iish hóyánígi át'éego dahonohsą́, áádóó hasbídí ba'át'e' ádinígi át'éego niha'át'e' ádaadin.

¹⁷Diné bits'ąą ádaa ádahołyą́, háálá á nidahwii'aahii bidááhdę́ę́' nidanihidiyoo'ish, áádóó kin yii' áłah nídaadleehí naaznilgóó ninihída'iiłtsxáas doo,

¹⁸áádóó shiniinaa naat'áanii índa aláahgo naat'áanii naazdáágóó bidááhdę́ę́' nidanihii'éeshgo, éí índa doo Jew dine'é danilíinii binááł shá nidahołne' doo.

¹⁹Nidi nidanihii'éeshgo, ha'át'éegoda índa ha'át'íida bee hadadoohdzihii t'áadoo biniinaa ádił nidahodołchiłí, háálá bee hadadoohdzihii áadi índa nihił béédahodoozįįł,

²⁰háálá nihí doo hadoohdzih da, nidi nihiTaa' biNíłch'i Diyinii nihiyi'dóó yáłti'ígíí hadoodzih.

²¹Áádóó ashiiké t'áá ła' hajíí'áazhgo ła' bidi'yoolyéełjį' niná'ahidiit'aah doo, áádóó azhé'é nilíinii ba'áłchíní ninéidii'aah doo, índa áłchíní bishchíinii yich'į' nídahidiikáahgo nahodi'dootsiłjį' ninádahodii'aah dooleeł,

²²áádóó shízhi' biniinaa diné t'áá ałtso nihik'ee dadiniih doo, nidi t'áá háiida t'áá nihoníyáajį' ha'ólnínígíí éí yisdádooltééł.

²³Nidi kin haal'áagi ła' atídanihił'į́įgo, náánáłahdi kin hanáánáál'áajį' choda'iidooł'įįł, háálá t'áá aaníí ánihidishní, Diné Silį́į'ii níyáajį' Ízrel dine'é bikin hadaas'áágóó doo ałtso tádadoohkai da dooleeł.

²⁴Íhooł'aahii éí nahonitinii doo biláahgo ájít'ée da, índa naalnishí éí hananit'a'í doo biláahgo ájít'ée da;

²⁵íhooł'aahii nahonitinii bił ahijíłt'é jileehígíí hoł t'áá áko doo, áádóó naalnishí hananit'a'í bił ahijíłt'éhígíí hoł t'áá áko doo. Kin bee bóhólníihii éí Béíyalzííbab deiłníigo, kin bee bóhólníihii ba'áłchíní ałdó' t'ah yówehgo ákódeiłníi doo!

²⁶Éí bąą kódaat'éhígíí t'áadoo béédaałdzidí, háálá t'óó bił ída'ít'éhígíí t'áá ałtso dadoo'nih, áádóó nidanil'inígíí t'áá ałtso béédahodoozįįł.

²⁷Ha'át'íhída t'áá nant'inee bee nihił hashne'ii t'áadoo bahat'aadí baa dahołne', áádóó ha'át'íhída bee nihijeeh náníshniihígíí kin bighą́ą́'dóó baa dahołne'.

²⁸Ats'íís deidiyoołhéełgo yídaneel'áanii nidi ii' sizíinii ts'ídá doo dayiyółhééł át'ée daígíí t'áadoo béédaałdzidí, nidi hool'áágóó ti'hoo'nííh bił haz'ą́ądi ii' sizíinii áádóó ats'íís t'áá yił íidoołdįįłgo yíneel'áanii béédaałdzid.

²⁹Da' tsídiiłbáhíísh naakigo doo t'ááłá'í sindáo bą́ą́h ílį́įgo nahaniih da? Ákondi nihiTaa' doo íinízingóó t'ááłá'í nidi doo ła' ni'jį' nidootłish da.

³⁰Jó nihitsii' t'ááłá'í níláhígo nidi ałtso dayéélta'.

³¹Éí bąą t'áadoo nídaałdzidí; tsídiiłbáhí t'óó ahayóí nidi biláahgo da'nohłį́.

³²Éí bąą t'áá háiida diné binááł shee ádééhodzílzinígíí, shí ałdó' shiTaa' yá'ąąshdi hólóonii bidááhdę́ę́' hwee ádééhodeeszįįł.

³³Nidi t'áá háiida diné binááł, Doo hwééhasin da, shididooniiłígíí, shí ałdó' shiTaa' yá'ąąshdi hólóonii bidááhdę́ę́', Doo hwééhasin da, hodideeshniił.

³⁴Nahasdzáán bikáa'gi t'áá k'é hólǫ́ǫ dooleeł biniyé jiníyá t'áadoo danohsingo shaa nitsídaahkeesí; k'é hólǫ́ǫ dooleeł doo biniyé níyáa da, nidi diltłish nítą́.

³⁵Háálá diné bizhé'é yik'ijį' nilį́įgo, índa ach'é'é nilíinii bimá yik'ijį' nilį́įgo, áádóó azháá'áád nilíinii yizháá'áád nilíní yik'ijį' nilį́įgo ádadeeshłííł biniyé níyá,

³⁶áko diné t'áá hó ha'áłchíní ła' hwe'ana'í danilį́į doo.

³⁷T'áá háiida hazhé'é, doodaii' hamáda shiláahgo ayóó'ájó'nínígíí, éí doo shą́ą́h jílį́į da, índa t'áá háiida haye', doodaii' hatsi' shiláahgo ayóó'ájó'nínígíí, éí doo shą́ą́h jílį́į da.

³⁸Áádóó t'áá háiida doo hatsin ałnáoszid nízhdiitįįhígíí áádóó doo shikéé' joogáłígíí, éí doo shą́ą́h jílį́į da.

³⁹T'áá háiida jiinánígíí t'áá hó ádá shójoost'e'go éí yóó'azhdoołdił, áádóó t'áá háiida shí shiniinaa jiinánígíí yóó'azhdíí'ą́ągo éí jiinánígíí shóízhdoołt'eeł.

⁴⁰T'áá háiida nihich'į' k'é nídzinígíí éí shich'į' k'éznídzin, áádóó t'áá háiida shich'į' k'éznídzinígíí éí Diyin God shiníł'a'ígíí ałdó' bich'į' k'éznídzin.

⁴¹T'áá háiida Diyin God yá halne'ii t'áá aaníí Diyin God yá halne'ii nilínígíí bąą bich'į' k'éznídzingo, éí Diyin God yá halne'ii baa doolyéełii haa doolyééł, áádóó t'áá háiida diné ts'ídá t'áá ákogi át'éii t'áá aaníí t'áá éí nilínígíí bąą bich'į' k'éznídzingo, éí diné ts'ídá t'áá ákwii át'éii baa doolyéełii haa doolyééł.

⁴²T'áá aaníí ánihidishní, T'áá háiida díí a'ohgo ádaat'éii ła' shíhooł'aahii nilínígíí bąą tó sik'azii yidoodlį́į́ł biniyé baazhníką́ągo, éí haa doolyéłígíí ts'ídá t'áá aaníí haa doolyééł.