Read Navajo MATTHEW 13 Bible Online

MATTHEW 13 - Navajo bible

MATTHEW 13

¹T'áá éí bijį́ Jesus éí kin si'ánídóó ch'ízhníyáago be'ek'id bąąhgi jineezdá.

²Áko diné yíl'áhígíí haa áłah silį́į́', éí bąą tsinaa'eeł biih jííyáago bii'dóó dah jineezdá, áádóó diné yíl'áhígíí t'áá át'é tábąąhdóó naazį́.

³Nít'éé' kójíníigo lą'ígóó hane' bee ak'idi'dootį́įłii bee bich'į' yájííłti', K'éé'dídléehii léi' álástsii' k'iididooléélgóó ch'íníyá.

⁴Áko álástsii' ła' nihiyiiłkaad nít'éé' ła' atiinjį' ahineezdee'. Atiinjį' ahineezdee'ígíí tsídii nidahaast'a'go ałtso yaa nahodeeskai.

⁵Náánáła' tsétahjį' ahineezdee', ákwe'é łeezh doo hózhǫ́ hólǫ́ǫ da, áko łeezh doo ditánígíí biniinaa t'áadoo hodíína'í hadaneesą́,

⁶nidi doozhǫǫgo dah adii'ą́ągo hadaneesánígíí yideez, índa bihétł'óól ádingo biniinaa daniiłna'.

⁷Náánáła' ch'il dadeeníinii bitahgóó ahineezdee', áko ch'il dadeeníinii bilááh daneesą́ągo ałtso bííghą́ą́'.

⁸Índa náánáła' łeezh yá'át'éehjį' ahineezdee', áko bineest'ą' dahazlį́į'go, ła' neeznádiindi, ła' hastą́diindi, ła' tádiindi bilááh nídaasdlį́į́'.

⁹Éí bąą t'áá hajaa' hólónígíí, háni' ajíists'ą́ą́'.

¹⁰Ákohgo hódahooł'aahii haa yíkaigo ádahodííniid, Ha'át'íí lá biniyé hane' bee ak'idi'dootį́įłii bee bich'į' yáníłti'?

¹¹Nít'éé' Jesus áháłní, Nihí nihich'į'go yá'ąąshii bee bóhólníihgo bił haz'áanii bee na'nitinii doo bééhózin da yę́ę éí nihił béédahózin dooleełgo nihaa deet'ą́, nidi bí, éí doo baa deet'ą́ą da.

¹²Háálá t'áá háiida ha' át'íida hwee hólónígíí biláahgo ła' haa náádoolyééł, áko lą'ígo hwee hólǫ́ǫ doo, nidi ha'át'íida hwee ádinígíí, éí t'áá hwee hólónígíi nidi haghadoolyééł.

¹³Díí biniinaa hane' bee ak'idi'dootį́įłii bee hoł dahashne', háálá dazhníł'į́į nidi, doo dajiiłtséeh da, áádóó dajíists'ą́ą' nidi, doo dazdiits'į́įh da, doo nidi bik'idazh'diitįįh da.

¹⁴Áko Aizéíyah kóníigo haa hoolne'ígíí t'áá aaníí silį́į́': T'áá aaníí dadoohts'a' dooleeł nidi, ts'ídá doo bik'idadi'doohtį́įł da, áádóó t'áá aaníí daah'į́į dooleeł nidi, ts'ídá doo deidoołtséeł da.

¹⁵Háálá díí dine'é bijéí tsézhin nidahalin áádóó jéé'ádahodeeskał, índa daniilch'iil, doodago éí dabináá' yee da'iidoołtsééł, áádóó dabijaa' yee dadi'doots'į́į́ł, índa dabijéí yee ak'idadi'dootį́į́ł, áko shich'į' ninádookahgo náádabidideeshłááł.

¹⁶Nidi nihí danihináá' bik'idahojidlí, háálá éí bee da'ooh'į́, áádóó nihí danihijaa' bik'idahojidlí, háálá éí bee da'doohts'a'.

¹⁷T'áá aaníí ánihidishní, Diyin God yá dahalne'ii índa diné ts'ídá t'áá ákogi ádaat'éii lą'í yilt'éego daah'ínígíí k'adę́ę dayiiłtsééh, nít'éé' t'áadoo dayiiłtsą́ą da, áádóó dadoohts'a'ígíí k'adę́ę deidiits'į́į́h, nít'éé' t'áadoo deidiizts'ą́ą' da.

¹⁸K'ad k'éé'dídléehii baa hane' bee ak'idi'dootį́įłii ááhyiłníinii dadoohts'į́į́h.

¹⁹T'áá háiida yá'ąąshii bee bóhólníihgo bił haz'áanii saad baa hozhdiits'į́į́h, nidi doo bik'izh'diitįįhgóó, bąąhági át'éii nilíinii yigháahgo, hajéí biyi' saad k'idoolyáhígíí hááyii'nííł; éí atiinjį' ahineezdee'ígíí ájít'į́.

²⁰Tsétahgóó ahineezdee'ígíí, éí saad jidiits'į́įhgo t'áá áko baa hoł hózhǫ́ǫgo nízhdiiléhígíí ájít'į́,

²¹nidi saadígíí bihétł'óól hayi'di ádin, éí bąą t'óó kónígháníjį' hwee hodina', áko saadígíí biniinaa hach'į' nahwii'náago, doodaii' atího'dil'į́įgo haa ní'diildahgo t'áá áko bits'áńjílwo'ígíí ájít'į́.

²²Ch'il dadeeníinii bitahgóó ahineezdee'ígíí, éí saad jidiits'į́į́h, nidi nahasdzáán bikáa'gi bee da'iináanii baa nitsáhákees áádóó at'į́ hodíní'ahgo éí saad ałtso yighą́ąhgo, bineest'ą' t'áadoo haleeh da.

²³Índa łeezh yá'át'éehii biyi'jį' ahineezdee'ígíí, éí saad jidiits'a'go bik'izhdi'yiitįįhígíí ájít'į́; éí t'áá aaníí honeest'ą' haleehgo, ła' neeznádiindi, ła' hastą́diindi, ła' tádiindi bilááh ninádahadleeh.

²⁴Áádóó kóníigo náánáła' hane' bee ak'idi'dootį́įłii hoł ch'ínáánéít'ą́, Yá'ąąshii bee bóhólníihgo bił haz'áanii éí kót'é: diné léi' bidá'ák'ehgi k'eelyéí yá'át'éehii k'iidíílá,

²⁵nít'éé' diné da'ałhoshgo, hwe'ana'í níyáago tł'oh naadą́ą́' bitahgóó ch'il t'áá tł'oh naadą́ą́' nahalinígíí k'iidííláago dah nídiidzá.

²⁶Áko tł'oh naadą́ą́' hadaneesą́ą́dóó bineest'ą' dahazlį́į'go, ch'il éí tł'oh naadą́ą́' nahalinígíí ałdó' bił yíl'á silį́į́'.

²⁷Áko naat'áanii jílíinii há nidaal'a'ígíí haa yíkaigo ádahodííniid, Nihinanit'a'í, da' doósh álástsii' yá'át'éehii nidá'ák'ehgi k'idííníláa da ni'? Ákoshą' ha'át'éego bitahgóó ch'il nichxǫ́'ígíí hazlį́į́'?

²⁸Nít'éé' áhodííniid, Éíyee' ana'í ła' át'į́į́ lá. Áko nidaal'a'í ádahałní, Áko daats'í ákǫ́ǫ́ jidookahgo ch'il dazhdoonishgo ahandahizhdoołjoł nihííní'ní?

²⁹Nidi áhodííniid, Dooda; ch'il ahandahołjoołgo, tł'oh naadą́ą́' ałdó' t'áá bił dadoohnish sha'shin.

³⁰Bíni'dii t'áá áłah danéeséehgo da'iigéeshjį' ahalzhíísh, áko da'iigéeshjį' ahoolzhiizhgo da'iigéeshii ábidideeshniił, Ch'il áłtsé náádahołjoołgo didoodlił biniyé bida'ohtł'o', nidi tł'oh naadą́ą́' t'éiyá nooh ná'áshchíí góne' yah adahohheeh, bidideeshniił.

³¹Áádóó kóníigo náánáła' hane' bee ak'idi'dootį́įłii yee hoł nááhoolne', Yá'ąąshii bee bóhólníihgo bił haz'áanii éí díí nahalin: diné ła' mástad bílástsii' néidii'ą́ągo, bidá'ák'ehgi k'iidíílá;

³²éí t'áá aaníí k'eelyéí t'áá ałtso ts'ídá bi'oh áníshéhígíí át'ée nidi ch'il t'áá ałtso yilááh áníłtsogo ninisééh, áko tsin sikaadii yileehgo tsídii nidahat'ahgo tsin bits'áoz'a' bąąhgóó bit'oh ádayiił'įįh.

³³Áádóó náánáła' hane' bee ak'idi'dootį́įłii yee hoł nááhoolne', Yá'ąąshii bee bóhólníihgo bił haz'áanii éí asdzání ła' bááh bee niilyółí néidii'ą́ągo ak'áán táadi haaką́ągo yił tayooznii'go niilyółígíí éí nahalin.

³⁴Áko hane' bee ak'idi'dootį́įłii binahjį' Jesus díí t'áá ałtso diné yíl'áhígíí yee yił hoolne', áádóó hane' bee ak'idi'dootį́įłii t'áágéedgo doo ha'át'íhída yee yił nahasne' da.

³⁵Diyin God yá halne'ii kóníigo yee haadzíi'ii bohodoolnííł biniyé kót'éego Jesus na'nitin: Hane' bee ak'idi'dootį́įłii bee hahideesdzih, nahasdzáán niit'ą́ą́dóó nidanil'in yę́ę bee hadeesdzih.

³⁶Ákohgo diné yíl'áhígíí yits'ą́ą́' dah diiyáago, kin biyi' góne' yah ííyá. Áádóó bídahooł'aahii, Ch'il dá'ák'ehgi hazlį́į'ii binahjį' hane' bee ak'idi'dootį́įłii ááhyiłníinii bee nihił hólne', daaníigo haa yíkai.

³⁷Áko hach'į' haadzíi'go áhodííniid, Álástsii' yá'át'éehii k'iidííláhígíí éí Diné Silį́į'ii át'į́,

³⁸áádóó dá'ák'eh éí nihokáá' dine'é át' é, índa álástsii' yá'át'éehii éí yá'ąąshii bee bóhólníihgo bił haz'áanii ba'áłchíní danilíinii ádaat'é, áádóó ch'ilígíí éí bąąhági át'éii nilíinii ba'áłchíní danilį́.

³⁹Ana'í ch'il k'iidííláhígíí éí níłch'i bida'iiníziinii binanit'a'í át'į́, índa agizhígíí, éí díí hoogáłígíí bił nihoolzhíshígíí át'é, áádóó da'dooyishii éí diyingo nidaal'a'í ádaat'į́.

⁴⁰Éí bąą ch'il ahandahaashjoolgo adoolk'ą́'ígi át'éego, nihoolzhiizhdi ádoonííł.

⁴¹Diné Silį́į'ii bidiyingo nidaal'a'í iidiyooł'aałgo, bee bóhólníihgo bił haz'áanii biyi'dóó biniinaa bąąhági ádahat'íinii t'áá ałtso índa bąąhági ádaat'íinii nídeidiyoolahgo,

⁴²hodook'ą́ą́ł góne' adeidiyoołtł'ił; áadi diné daachxa áádóó biwoo' ahídeidiłk'ash doo.

⁴³Áko índa ts'ídá t'áá ákogi ádaat'éii biTaa' bee bóhólníihgo bił haz'áanii biyi'di jį́honaa'éí nahalingo dadi'níłdíin dooleeł. Éí bąą t'áá hajaa' hólónígíí háni' ajíists'ą́ą́'.

⁴⁴Áádóó yá'ąąshii bee bóhólníihgo bił haz'áanii éí díí nahalin: naalye'é dá'ák'ehgi nées'į́į́', éí diné ła' yik'íníyáago nínéidees'į́į́', áko bił hózhǫ́ǫgo dah diiyáago, bee hólóonii ałtso baa néhéeznii', áko índa dá'ák'eh yik'é na'níláago nayiisnii'.

⁴⁵Náá'áłdó', yá'ąąshii bee bóhólníihgo bił haz'áanii éí díí nahalin: diné na'iiłniihí nilį́įgo diichiłí yá'át'éehii haintá,

⁴⁶éí diichiłí t'ááłá'í agháago ílį́į́ léi' yik'íníyáago dah diiyá, áádóó bee hólóonii ałtso baa néhéeznii'go diichiłí yik'é na'níláago nayiisnii'.

⁴⁷Náá'áłdó' yá'ąąshii bee bóhólníihgo bił haz'áanii, éí díí nahalin: łóó' bee hahaltsósí taah deistsoozgo łóó' t'áá ał'ąą ádaat'eełii áłah áyiilaa;

⁴⁸éí hadéébįįdgo tábąąhjį' hadeistsoozgo dadineezbin, áádóó yá'ádaat'éehii ásaa' biih dadziiznil, nidi doo yá'ádaat'éehii t'éiyá yóó'adadziiskaad.

⁴⁹T'áá éigi át' éego nihoolzhiizhdi ádoonííł. Diyingo nidaal'a'í éí ts'ídá t'áá ákogi ádaat'éii bitahdóó bąąhági ádaat'éii yits'ádeidiyoonił,

⁵⁰áádóó hodook'ą́ą́ł góne' adeidiyoołtł'ił; áadi diné daachxa áádóó biwoo' ahídeidiłk'ash doo.

⁵¹Díidíísh t'áá ałtso bik'ida'dootą́? bizhdííniid. Áko, Aoo' [Bóhólníihii], dahodííniid.

⁵²Áko ánáábizhdoo'niid, Éí bąą bee haz'áanii yínda'niłtinii t'ááłá'í nítínígo yá'ąąshii bee bóhólníihgo bił haz'áanii yíhooł'aahii silį́į'ii, éí diné léi' kin bee bóhólníhígíí binaalye'é da'ílíinii bitahdóó ádaaniidíii índa t'áá da'ałk'idą́'ígíí ch'íyiiníiłii nahalin.

⁵³Ákohgo Jesus, éí hane' bee ak'idi'dootį́įłii ałtso yaa hoolne'go, áádóó dah diiyá,

⁵⁴áko t'áá hó hakéyahdi nídzídzáago dabikin yii' áłah nádleeh góne' naz'neeztą́ą́', áko bik'ee t'óó bił adahóóyóigo ádadííniid, Háádę́ę'shą' díí bee hódzáanii ákót'éii shóyoost'e', índa áhooníiłii ayóó ádaat'éii yaa naagháii silį́į́'?

⁵⁵Da' díísh doo kin ííł'íní biye' át'į́į da? Da' bimáásh doo Mary wolyée da? Áádóó da' dabitsilíísh doo James índa Jóseph áádóó Sáíman índa Júdas daolyée da?

⁵⁶Áádóó da' dabideezhíísh doo t'áá ałtso bił kéédahwiit'į́į da? Áko díí diné lá háádę́ę́' díidí t'áá ałtso shóyoost'e' lá?

⁵⁷Áko hach'į' doo bił dahóózhǫǫd da. Nidi Jesus áhodííniid, Diyin God yá halne'ii t'áá ałtsogóó diné bił dajílį́, nidi t'áá hakéyahgi índa bił hajííjéé', éí doo bił ajílį́į da.

⁵⁸Áko doo da'oodlą́ą́góó biniinaa ákwe'é áhooníiłii ayóó ádaat'éii doo lą'í baa nijiyáa da.