Read Navajo MATTHEW 14 Bible Online

MATTHEW 14 - Navajo bible

MATTHEW 14

¹Áko íídą́ą́' Hérad, naat'áaniishchíín jílíinii, Jesus baa hozdiizts'ą́ą'go

²há nidaal'a'í ábizhdííniid, Díí John Tó Yee Asį́įhii daaztsą́ą́dę́ę́' náádiidzáago át'į́į́ lá; éí bąą díí adziil bee ayóó át'éego ádahooníiłii bii' hólǫ́ǫgo yinahjį' áánííł lá.

³Háálá Hérad éí hatsilí Philip be'asdzą́ą́ Heródiyas wolyéii biniinaa John jiiłtsood, áko be'dziztł'ǫ́ǫgo awáalyaa góne' yah ajííłt'e'.

⁴Háálá íídą́ą́' John áhodííniid, Nitsilí be'asdzą́ą́ bił nani'aashgo doo bee ná haz'ą́ą da.

⁵Áko azhą́ hodiyeeshxééł hó'níi nidi diné áłah nilínígíí yinásdzííd, háálá John éí Diyin God yá halne'ii nilį́ dayó'ní.

⁶Nidi Hérad bi'dizhchį́į́ yę́ęjį' anáhoolzhiizhgo, áłah silį́'ígíí binááł Heródiyas bich'é'é oolzhiizhgo Hérad yił hóóshǫǫd,

⁷áko at'ééd t'áá yiyííkeedígíí yeididoo'áałgo yee ádee hadoodzíí'.

⁸Áko at'ééd bimá ábíłníigo kódííniid, John Tó Yee Asį́įhii bitsiits'iin kwe'é łeets'aat'ą́hí bii' si'ą́ągo shaa níkaah.

⁹Áko aláahgo naat'áanii t'áá íiyisí bąąh bíni', nidi ádee hadoodzí'ígíí índa baa iisdee'ígíí biniinaa baa doot'áałgo yee hooł'a',

¹⁰áko ákǫ́ǫ́ i'ííł'a'go awáalyaadi John bitsiits'iin k'élne',

¹¹áko bitsiits'iin łeets'aat'ą́hí bee náką́ągo at'ééd baa yíką́, áádóó at'ééd éí bimá yeiníką́.

¹²Nít'éé' John hódahooł'aahii danilį́į́ nít'ée'ii yíkaigo hats'íís dah deidiiłtį́įgo yóó'ádayiilaa, áádóó dah diikaigo Jesus yił dahoolne'.

¹³Ákohgo Jesus éidíígíí yiyíínii'go, áádóó dah diiyáago tsinaa'eeł bee doo naagháhígóó i'jííł'éél. Nidi diné yíl'áhígíí haa dahodiizts'ą́ą'go kin hadaas'áádę́ę́' t'áá ni' hakéé' niheezhjéé'.

¹⁴Áko tsinaa'eeł bii'dę́ę́' Jesus hajííyáago, ayóó át'éego diné yíl'áago jiiłtsą́, áko baa a'ááh jiniizį́į'go bąąh dah nidahaz'ánígíí náádabizhdiyiisá.

¹⁵Nít'éé' hííłch'į'go hódahooł'aahii kódaaníigo haa yíkai, Kwe'é doo naagháhí da, áádóó t'áá íídą́ą́' k'adę́ę anáá'át'aah; diné yíl'áhígíí nídayínóhkááh bidiní, áko bíni'dii kin dah naazhjaa'góó ch'iyáán deidooyį́łígíí t'áá bí ádá nideidiyoołnih.

¹⁶Nidi Jesus áhodííniid, Doo nihidahaaskai da nidi t'áá nihí bada'nołtsóód.

¹⁷Áko ádahałní, Łees'áán t'áá ashdla'í áádóó łóó' t'áá naakíhí t'éiyá nideiijaah.

¹⁸Áko, Wóshdę́ę́' shaa nohnííł, jidííniid.

¹⁹Áko diné yíl'áhígíí, Hootsogóó dinohbįįh, bizhdííniid, áádóó łees'áán ashdla'ígíí índa łóó' naakiígíí nízhdiinilgo, yá'ąąshgóó jidéez'į́į'go bik'i sozdoolzin, áádóó nijiitíihgo łees'ánígíí hódahooł'aahii bitaa jiniihgo, éí diné yíl'áhígíí yitaa deiznii'.

²⁰Áko t'áá ałtso da'ííyą́ą'go hwiih daazlį́į́'. Áko nidahaasti'go bi'oh da'jííyą́'ígíí náádadziisdláa'go ts'iizis naakits'áadah hadazdeesbįįd.

²¹Asdzání áádóó áłchíní t'áadoo wólta'í dinéhígíí t'áá bízhánígo ashdladi mííl daats'í da'ííyą́ą́' lá.

²²Ákohgo Jesus hódahooł'aahii, Tsinaa'eeł biih hohkáahgo wónaanígóó shilą́ąjį' da'doł'eeł, áko shí éí jíl'áhígíí nídayínóhkááh bidideeshniił, bizhdííniid.

²³Áko jíl'áhígíí nídayínóhkááh bizhdííniidóó bik'ijį' sozdidoolzįįł biniyé t'áá sáhí dził bíjiiyá. Áko i'íí'ą́ągo t'áá sáhí áadi nijighá,

²⁴ákohgo tsinaa'eeł tá'ałníí'góó yi'oł, nít'éé' bidááhdę́ę́' níyolgo biniinaa tó bínízdiiłhałgo yi'oł.

²⁵Áko yikáíht'áahjį' ayííłką́ągo, táłkáá'góó joogáałgo baa nídzídzá.

²⁶Nít'éé' hódahooł'aahii táłkáá' joogáałgo dahoołtsą́ągo hwéédaasdzííd, áko, Ha'át'íí shį́į́ bich'į́įdii át'į́! daaníigo hak'ee bił yéé' dahazlį́į'go hadadeeshghaazh.

²⁷Nidi t'áá áko Jesus kóníigo hach'į' haadzíí', Nihił dahózhǫ́, shíyee' ásht'į́; t'áadoo nídaałdzidí.

²⁸Nít'éé' Peter hach'į' haadzíi'go ádííniid, Bóhólníihii, ni ánít'į́į́ ládą́ą́' táłkáa'gi shaa nínááh, shidiní.

²⁹Áko, Hágo, bizhdííniid. Áádóó tsinaa'eeł bii'dę́ę́' Peter hajííyáago Jesus baazhdoogááł biniyé táłkáá' jideeyá,

³⁰nidi níyol bidziilgo hoł bééhoozingo nídzísdzííd, áko yaazhdeezhtłizhgo, Bóhólníihii, yisdáshíłteeh, jiníigo hazhdoolghaazh.

³¹T'áá áko Jesus k'ídeeshchidgo hasił kóháłníigo, T'įįhdígo iinídláanii! Ha'át'éegoshą' nił naaki hazlį́į́'?

³²Áko tsinaa'eeł biih níjoot'áazhgo ííyol.

³³Nít'éé' tsinaa'eeł yii' naháaztánígíí hach'į' nitsidadeezgo'go ádaaní, T'áá aaníí Diyin God biYe' nílį́į́ lá.

³⁴Tsé'naa hoł ni'ní'éelgo kéyah Genésaret hoolyéejį' jíkai.

³⁵Ákwii diné kéédahat'ínígíí hwéédahoosįįdgo, éí kéyah bikáa'gi t'áá níłtéél nít'éé' hane' ádayiilaa, áko bąąh dah nidahaz'ánígíí t'áá ałtso haa dayiizhjaa'go,

³⁶Bíni'dii ni'éé' bijánil t'éiyá nidi yidahidilchííd, dahałníigo nídahooskan, áko hodahideeshchidígíí t'áá ałtso hadaałt'é nídaasdlį́į́'.