Read Navajo MATTHEW 16 Bible Online

MATTHEW 16 - Navajo bible

MATTHEW 16

¹Nít'éé' Férisii índa Sádjusii danilíinii neheeskaigo hákada'iiłhilgo, Yá'ąąshdę́ę́' nibee adziilii bee bééhózinii ła' nihił ííshją́ą́ ánílééh, dahodííniid.

²Nidi Jesus hach'į' hanáádzíi'go ání, E'e'áahgo, Yá'áhoot'éeh doo lá, háálá nihoochii', dadohní.

³Abínígo, Díí jį́ doo yá'áhoot'éeh da doo lá, háálá shábítł'ájiichii' áádóó k'os diilkǫ', dadohní. [Nihí t'óó ádahodoł'íinii,] wódahgo áhoot'éii binahjį' áhoot'ée dooleełgi nihił béédahózin, nidi dahwéelzhíishii bee béédahózinii, da' éísh ts'ídá doo bik'ida'doohtįįh da?

⁴Doo yá'áshxǫ́ǫ́góó índa adilyé yee ahoolchíiłii bee ééhózinii hadeintá, nidi bee ééhózinii doo ła' bá ádoolníił da, t'áá hazhó'ó Jónah bee ééhoozinii t'éiyá, bizhdííniidgo bits'ą́ą́' dashdiiyá.

⁵Áko hódahooł'aahii wónaaníjį' ha'naa bił ha'az'éél, nít'éé' łees'áán ła' dayíjáah doo yę́ę yaa dayooznah lá.

⁶Áko Jesus áhodííniid, Férisii índa Sádjusii danilíinii bidíík'ǫsh bee taos'nii' niilyółí bits'ąą ádaa ádahołyą́.

⁷Áko éí yaa nídaat'į́įgo áda'ahidi'ní, Łees'áán t'áágééd niikai, éí biniinaa ánihidííniid.

⁸Áko Jesus éí yaa ákoniizį́į'go áhodííniid, T'įįhdígo da'iinohdláanii, ha'át'íishą' biniyé łees'áán nihee ádaadinígíí baa nídaaht'į́?

⁹Da' t'ah doósh bik'ida'dohtįįh da? Da' łees'áán ashdla'go diné ashdladi mííl yíl'áago bá nihéti'ígíí, áádóó ch'ínííłna'ígíí ts'iizis díkwíí hadadoołbįįdígíísh doo béédaałniih da?

¹⁰Índa dį́įdi mííl jíl'áago łees'áán tsosts'id há nihéti'ígíí, áádóó ch'ínííłna'ígíí ts'iizis díkwíí hadadoołbįįdígíísh doo béédaałniih da?

¹¹Ha'át'éegoshą' łees'áán doo bee nihich'į' haasdzíi' daígíí t'áadoo bik'ida'dootą́ą da? Nidi Férisii áádóó Sádjusii danilíinii bidíík'ǫsh bee taos'nii' niilyółí bits'ąą ádaa ádahołyą́.

¹²Áko índa díík'ǫsh bee taos'nii' niilyółí bits'ąą ádaa ádahołyą́ doo hałníígóó, nidi Férisii áádóó Sádjusii danilíinii bina'nitin bits'ąą ádaa ádahołyą́ hałníigo bik'idazh'diitą́.

¹³Ákohgo Jesus hódahooł'aahii bił Sesaríya Fílipai kéyahdi jíkaigo, hódahooł'aahii kóbijiníigo nabízhdééłkid, Diné ádashiłníigoshą', Diné Silį́į'ii háí át'į́, daaní?

¹⁴Áko ádadííniid, Ła' éí John Tó Yee Asį́įhii yę́ę át'į́, daniłní, ła' éí Iiláíjah, náánáła' éí Jeremáíyah, éí náádoodago Diyin God yá dahalne'ii yę́ę ła' át'į́, daniłní.

¹⁵Áko ábizhdííniid, Nidi nihíshą' éí háí ájít'į́ dashidohní?

¹⁶Nít'éé' Sáíman Peter haadzíi'go, Diyin God hináanii biYe' Christ nílį́, hodííniid.

¹⁷Áko Jesus ánááhodoo'niid, Sáíman, Jónah biye' nílíinii, nízhánee'! Háálá bits'íís índa bidił hólóonii doo nił ííshją́ą́ áyiilaa da, nidi shiTaa' yá'ąąshdi hólóonii nił ííshją́ą́ áyiilaa.

¹⁸Áádóó shí ándishní, Peter ánít'į́, áko díí tsé'éłká'ígíí bikáá'dóó dashoodláanii t'áá ła' bizhi'ee kin álnéhígi át'éego deeshtł'į́į́ł, áko hool'áágóó ti'hoo'nííh bibee adziilii doo bik'eh didoodleeł da.

¹⁹Yá'ąąshii bee bóhólníihgo bił haz'ą́ągi bee ąą ńdítį́hí naa deeshnił, áko ha'át'íhída nahasdzáán bikáa'gi doo bee a'dííní'ánígíí, t'áá éí yá'ąąshdi doo bee a'deet'ą́ą da doo, índa ha'át'íida nahasdzáán bikáa'gi bee a'dííní' ánígíí, t'áá éí yá'ąąshdi bee a'deet'ą́ą dooleeł.

²⁰Ákohgo hódahooł'aahii hó Jesus éí Christ jílínígíí diné ła'da ts'ídá doo bee bił dahozhdoolnihgóó bee bich'į' hadzoodzíí'.

²¹Áádóó bik'ijį' Jesus éí Jerúsalemjį' jideeyáago diné yá aląąjį' naazíinii áádóó aláahgo nááda'iiłniihii índa bee haz'áanii yínda'niłtinii bik'ee lą'ígóó ti'hwiizhdoonih, áádóó hodi'yoolyééł, índa tágí jį́ aleeh góne', nááhodi'doodláłígíí éí hódahooł'aahii bee bił ahozhniilne'.

²²Nít'éé' Peter ats'áhonílóozgo hodeeztehgo áháłní, Bóhólníihii, Diyin God naa jooba'go doo ákóndi'doolníił da.

²³Nidi Peter bits'ą́ąjį' nídzízyizgo ábizhdíiniid, Séítan nílíinii, shidinínáágóó aninááh! Shiníłtł'aii nílį́, háálá doo Diyin God k'ehgo nitsíníkees da, nidi diné k'ehgo t'éí nitsíníkees.

²⁴Áko Jesus éí hódahooł'aahii ábizhdííniid, Diné t'áá háiida shikéé' dashdiigháhígíí éí ádeizhdiyoo'nah, áko hatsin ałnáoszid nízhdidootį́į́ł áádóó shikéé' joogáał doo.

²⁵Háálá t'áá háiida jiinánígíí bąąh hą́ą́snízinígíí éí yóó'azhdootłish, nidi t'áá háiida shí shiniinaa jiinánígíí ninázhdiní'ą́ągo, éí jiinánígíí ádá shóizhdoołt'eeł.

²⁶Háálá diné ła'da nahasdzáán t'áá si'ą́ą́ nít'éé' hóó' dooleeł biniyé t'áá ákójínéehgo hwii' sizíinii yóó'azhdíí'ą́ągo, haa néelą́ą́' há bínéidoodił? Éí doodaii', diné ła'da t'áá hó hwii' sizíinii ha'át'íí bił aheełt'é shį́įshą' bił ałnázhdoolééł?

²⁷Diné Silį́į'ii biTaa' bee bits'ádi'nílíidii yee, bidiyingo nidaal'a'í yił dookah, áko índa diné t'ááłá'í jinítínígo ádajíít'įįdii bik'ehgo haa dadi'yoolyééł.

²⁸T'áá aaníígóó ánihidishní, Kǫ́ǫ́ naazínígíí ła' éí Diné Silį́į'ii bee bóhólníihgo bił haz'áanii yił yígháhígíí t'áadoo dayiiłtséhí aniné ts'ídá doo deidoolįh da.